Read Kernewek Ezra 4 Bible Online

Ezra 4 - Kernewek bible

Ezra 4

¹Pan glewas eskerens Yuda ha Benyamin mebyon an divroedh dhe dhrehevel tempel rag an ARLOEDH, Duw Ysrael,

²i a dheuth dhe Zerubbabel, ha dhe bennow an teyluyow, ha leverel dhedha, ‘Gesiwgh ni dhe dhrehevel genowgh: rag avelowgh hwi ni a hwila agas Duw; ha ni re beu ow sakrifia dhodho a-dhia dhydhyow Esarhaddon myghtern Asshur, neb a'gan dros yn-bann bys omma.’

³Mes Zerubbabel, Yeshua ha'n bennow teyluyow erell a Ysrael, a leveris dhedha, ‘Ny'gas beus travyth dhe wul genen rag drehevel chi dh'agan Duw; mes ni agan honan war-barth a vynn drehevel rag an ARLOEDH, Duw Ysrael, dell erghis dhyn myghtern Syrus, myghtern Persia.’

⁴Ytho pobel an pow a dhiskonfortyas[4] pobel Yuda, hag a's ownhas, ma na dhrehaffens.

⁵Hag i a falswobras kusulyadoryon er aga fynn, dhe lesta aga thowl, der oll dydhyow Syrus myghtern Persia, bys yn reyn Darius myghtern Persia.

⁶Yn reyn Ahasuerus, yn dalleth y reyn, i a skrifas kuhudhans erbynn annedhysi Yuda ha Yerusalem.

⁷Hag yn dydhyow Artakserkses, Bishlam, Mithredath, Tabeel ha'ga heskowetha erell a skrifas dhe Artakserkses myghtern Persia; an lyther o skrifys yn skrif aramaek, hag y'n yeth aramaek.

⁸Rehum an chansler ha Shimshay an skrifwas a skrifas lyther erbynn Yerusalem dhe Artakserkses an myghtern dell siw:[5]

⁹Ena Rehum an chansler, ha Shimshay an skrifwas, ha'ga heskowetha erell — an vreusysi, an wovernours, an soedhogyon, an Persianys, tus a Erek, Babylon, Shushan, henn yw an Elamysi,

¹⁰ha'n kenedhlow erell, hag a wrug Ashurbanipal bras ha nobyl aga divroa, ha gorra yn sitys Samaria hag y'n rann arall a'n rannvro Dres-an-Avon.

¹¹Ottomma dasskrif a'n lyther a dhannvonsons dhodho: Dhe Artakserkses an myghtern: Dhiworth dha servysi an wer y'n rannvro Dres-an-Avon:

¹²Re bo godhvedhys dhe'n myghtern, an Yedhewon neb a dheuth yn-bann a-dhiworthis dhyn ni re dheuth dhe Yerusalem. Yth esons ow trehevel an sita dhiwostydh ha drog na, ow korfenna hy fosow, hag owth ewnhe hy selyow.

¹³Re bo godhvedhys lemmyn dhe'n myghtern, mar pydh drehevys an sita ma, ha'n fosow gorfennys, alena ny dalvydhons na toll-benn, na toll-wara, na toll-dir, ha les an myghternedh a vydh aperys yn sur.

¹⁴Lemmyn, drefenn agan bos ow tybri hoelan palys an myghtern, ha nag o gwiw ni dhe weles disenor an myghtern, rakhenna ni re dhannvonas rag may fo godhvedhys dhe'n myghtern,

¹⁵may hwiller yn lyver kovadhow dha dasow: yndella ty a gyv yn lyver an kovadhow, ha dyski bos an sita ma sita dhiwostydh, hag a wra pystiga myghternedh ha rannvroyow, hag rebellyans re sordyas ynni a-henys: rakhenna an sita ma a veu difeythys.

¹⁶Ni a dheriv dhe'n myghtern, mar pydh an sita ma dastrehevys, ha'y fosow gorfennys, ena ny vydh perghennogeth dhis y'n rannvro Dres-an-Avon.

¹⁷Ena an myghtern a dhannvonas gorthyp: Dhe Rehum an chansler, ha dhe Shimshay an skrifwas, ha dh'aga heskowetha erell trigys yn Samaria, hag yn rannow erell an rannvro Dres-an-Avon: Salusyans.

¹⁸An lyther a dhannvensowgh dhyn re beu treylys ha lennys a-ragov.

¹⁹Ytho my a dhellos arghadow, hag i a hwithras, ha dyski an sita ma dhe omsevel a-henys erbynn myghternedh, ha rebellyans hag ankres re beu gwrys ynni.

²⁰Byttegyns, re beu myghternedh galloesek dhe Yerusalem, neb a rewlyas oll an rannvro Dres-an-Avon; ha toll-benn ha toll-wara, ha toll-dir, a veu tylys dhedha.

²¹Dyllewgh ytho arghadow mayth ynnier an wer ma dhe hedhi, ha na vo an sita ma drehevys, bys pan vo arghadow dyllys dhiworthiv.

²²Gwaytyewgh ma na vydhowgh logh y'n mater ma, ma na deffo dregynn, ha dhe bystiga myghternedh.

²³Ena, pan veu lennys dasskrif lyther myghtern Artakserkses a-rag Rehum, ha Shimshay an skrifwas, ha'ga heskowetha, i eth war-not dhe Yerusalem, dhe'n Yedhewon, ha'ga honstryna dhe hedhi dre nerth ha galloes.

²⁴Yndella yn eur na ober chi Duw usi yn Yerusalem a hedhis, ha pesya yndella bys y'n nessa blydhen a reyn Darius myghtern Persia.