Read Kernewek Ezra 5 Bible Online

Ezra 5 - Kernewek bible

Ezra 5

¹Ena an brofoesi, Haggay ha Zekaria mab Iddo, a brofoesas dhe'n Yedhewon esa yn Yuda ha Yerusalem yn hanow Duw Ysrael, esa warnedha.

²Ena Zerubbabel mab Shealtiel, ha Yeshua mab Yosadak a sevis, ha dalleth dastrehevel chi Duw usi yn Yerusalem: ha gansa yth esa brofoesi Duw, orth aga gweres.

³Yn kettermyn Tattenay, governour an rannvro Dres-an-Avon, ha Shethar-bozenay, ha'ga heskowetha a dheuth dhedha, ha kewsel dhedha yndella, ‘Piw re ros dhywgh arghadow dhe dhrehevel an chi ma, ha dhe gowlwul an fosow ma?’

⁴I a wovynnas orta ynwedh, ‘Pyth yw henwyn an wer esons ow trehevel an drehevyans ma?’

⁵Mes yth esa lagas aga Duw ow kwitha war henavogyon an Yedhewon, ma na wrussons aga lettya, bys pan dheffa an derivas dhe Darius: ha bys pan vo degemmerys gorthyp dre lyther dhe'n mater ma.

⁶Dasskrif a lyther Tattenay, governour an rannvro Dres-an-Avon, ha Shethar-bozenay, ha'ga heskowetha an soedhogyon, esa yn rannvro Dres-an-Avon, a dhannvonsons dhe Darius an myghtern;

⁷i a dhannvonas lyther dhodho hag ynno skrifys veu yndellma: Dhe Darius an myghtern. Salusyans oll.

⁸Re bo godhvedhys dhe'n myghtern, ni eth yn rannvro Yuda, dhe ji an Duw meur; yma ow pos drehevys gans meyn bras, hag yma prennyer desedhys y'n fosow, ha'n ober ma a bes gans diwysygneth, hag a siwen yn aga leuv.

⁹Ena ni a wovynnas orth an henavogyon na, ha leverel dhedha yndellma, ‘Piw re ros dhywgh arghadow dhe dhrehevel an chi ma, ha dhe worfenna an fosow ma?’

¹⁰Ynwedh, ni a wovynnas orta aga henwyn rag avisya dhis, may skriffyn henwyn an wer o aga ledyoryon.

¹¹Ha hemma yw an gorthyp a rosons dhyn: ‘Servysi Duw nev ha leur on ni, hag yth esons ow dastrehevel an chi a veu drehevys nans yw lies blydhen, may hwrug myghtern bras a Ysrael y dhrehevel ha gorfenna.

¹²Mes drefenn agan tasow dhe serri Duw nev, ev a's delivras yn leuv Nebukadnessar myghtern Babylon, an Kaldean, neb a dorras an chi ma dhe'n dor, ha doen an bobel yn-kerdh dhe Babylon.

¹³‘Byttegyns, yn kynsa blydhen Syrus myghtern Babylon, Syrus an myghtern a dhellos arghadow rag dastrehevel an chi ma a Dhuw.

¹⁴Ha'n lestri ynwedh gwrys a owr hag a arghans yn chi Duw, a wrug Nebukadnessar aga hemmeres mes a'n tempel usi yn Yerusalem, ha'ga dri a-ji dhe dempel Babylon — Syrus an myghtern a's kemmeras mes a dempel Babylon, ha'ga ri dhe nebonan henwys Sheshbassar, neb a apoyntyas governour.

¹⁵Yn-medh ev dhodho, “Kemmer an lestri ma, ke, ha'ga gorra a-ji dhe'n tempel usi yn Yerusalem, ha gas chi Duw dhe vos dastrehevys yn y dyller.”

¹⁶Ena an keth Sheshbassar a dheuth, ha settya selyow chi Duw usi yn Yerusalem: hag a-dhia'n eur na bys lemmyn ev re beu ow pos drehevys, ha nyns yw gorfennys hwath.’

¹⁷Ytho lemmyn, mar hevel da dhe'n myghtern, re hwiller yn kovadhow an myghtern, usi ena yn Babylon, mar peu arghadow dyllys gans Syrus an myghtern dhe dhrehevel an chi ma a Dhuw yn Yerusalem. Ha dhannvones an myghtern y vynnas dhyn a-dro dhe'n mater ma.