Read Kernewek Ezra 7 Bible Online

Ezra 7 - Kernewek bible

Ezra 7

¹Lemmyn wosa an hwarvosow ma, yn reyn Artakserkses myghtern Persia, Ezra mab Seraya, mab Azaria, mab Hilkia,

²mab Shallum, mab Sadok, mab Ahitub,

³mab Amaria, mab Azaria, mab Merayoth,

⁴mab Zerahia, mab Uzzi, mab Bukki,

⁵mab Abishua, mab Finehas, mab Eleazar, mab Aron an pennoferyas:

⁶an Ezra ma a dheuth yn-bann a-dhiworth Babylon; hag ev o skriba skentel yn lagha Moyses, a wrug an ARLOEDH Duw a Ysrael hy ri. An myghtern a wrontyas dhodho oll y worholedhow, rag bos leuv an ARLOEDH y Dhuw warnodho.

⁷Ha rann a vebyon Ysrael, ha rann a'n oferysi, an Levysi, an ganoryon, an borthoryon, ha'n Nethinim[7] eth yn-bann dhe Yerusalem ynwedh, y'n seythves blydhen a Artakserkses an myghtern.

⁸Ezra a dheuth dhe Yerusalem y'n pympes mis, henn o y'n seythves blydhen a'n myghtern.

⁹Ev a erviras mos yn-bann a-dhiworth Babylon yn kynsa dydh an kynsa mis, hag ev a dheuth dhe Yerusalem yn kynsa dydh an pympes mis, drefenn bos leuv dha y Dhuw warnodho.

¹⁰Rag Ezra re settsa y golonn dhe hwilas lagha an ARLOEDH, ha dh'y gul, ha dhe dhyski ordenansow ha breusow yn Ysrael.

¹¹Ytho, ottomma dasskrif a'n lyther a wrug myghtern Artakserkses y ri dhe Ezra an oferyas, an skriba, dyskys yn mater gorhemmynnow an ARLOEDH, ha'y ordenansow rag Ysrael:

¹²Artakserkses, myghtern myghternedh. Dhe Ezra an oferyas, dyskys yn lagha Duw nev, salusyans. Ha lemmyn:[8]

¹³Arghadow yw dyllys genev, y hyll mos genes pubonan y'm ruvaneth a bobel Ysrael, ha'y oferysi ha'n levysi, yw bodhek dhe vos dhe Yerusalem.

¹⁴Rag ty yw dannvenys gans an myghtern, ha'y seyth kusulyador, may hwovynni a-dro dhe Yuda ha Yerusalem, herwydh lagha dha Dhuw usi y'th leuv;

¹⁵ha dhe dhoen an arghans ha'n owr a wra an myghtern ha'y gusulyadoryon profya a-vodh dhe Dhuw Ysrael, a'n jeves y drigva yn Yerusalem,

¹⁶hag oll an arghans ha'n owr a yllydh aga huntell yn rannvro Babylon oll, gans offrynnow bolonjedhek an bobel ha'n oferysi, ambosys a-vodh rag chi aga Duw usi yn Yerusalem.

¹⁷Gans an arghans ytho ty a vydh diwysyk ow prena lodhnow, hordhes, hag eyn, gans aga offrynnow greun hag offrynnow diwes, ha ty a's offrynn war alter chi agas Duw usi yn Yerusalem.

¹⁸Gans remenant an arghans ha'n owr ty ha'th vreder a yll gul pynagoll a havallo da, herwydh bodh agas Duw.

¹⁹Ty a dhelirv a-rag an Duw a Yerusalem an lestri a veu res dhis rag servis chi dha Dhuw.

²⁰Ha pynagoll moy a vo edhomm dhis anodho rag chi dha Duw, mayth yw res dhis y ri, ty a yll y ri a-dhiworth tresorva an myghtern.

²¹Ha my, Artakserkses an myghtern ow honan, a dhyllo arghadow dhe oll an alhwedhoryon usi y'n rannvro Dres-an-Avon, may fo gwrys yn uskis pynagoll Ezra an oferyas, skriba lagha Duw nev, a wovynno orthowgh,

²²bys kans talent a arghans, ha bys kans kor a waneth, ha bys kans bath a win,[9] ha bys kans bath olew, ha hoelan heb ragsettya an myns.

²³Pynagoll a vo erghys gans Duw nev, bedhes gwrys gans rach a-barth chi Duw nev: rag prag y fydh sorr erbynn myghterneth an myghtern ha'y vebyon?

²⁴Bedhewgh avisys ynwedh, na vydh laghel beghya na toll-benn, na toll-wara, na toll-dir war denvyth a'n oferysi an Levysi, an ganoryon, an borthoryon, gwesyon an tempel, na servysi erell a'n chi ma a Dhuw.

²⁵Ha ty, Ezra, herwydh furneth dha Dhuw, usi yn dha leuv, orden justisyow ha breusysi, a yll breusi oll an dus usi y'n rannvro Dres-an-Avon, oll an re a aswonn laghys dha Dhuw; ha dyskewgh piwpynag ny's aswonn.

²⁶Ha piwpynag na vynn bos gostydh dhe lagha dha Dhuw ha lagha an myghtern, bedhes breus gwrys warnodho yn straght, po mernans, po divroedh, po kemmeryans y byth, po prisonyans.

²⁷Bennigys re bo an ARLOEDH, Duw agan tasow, re worras mater a'n par ma yn kolonn an myghtern, rag ri enor dhe ji an ARLOEDH usi yn Yerusalem,

²⁸ha neb re ystynnas tregeredh dhymm a-rag y gusulyoryon hag oll soedhogyon alloesek an myghtern. Ha my a veu kennerthys, rag bos leuv an ARLOEDH ow Duw warnav, ha my a guntellas ledyoryon yn-mes a Ysrael rag mos yn-bann genev.