Read Kernewek Ezra 8 Bible Online

Ezra 8 - Kernewek bible

Ezra 8

¹An re ma yw pennow teyluyow, ha'ga hovskrifans yn rol an aghskrifow, neb eth yn-bann genev a-dhiworth Babylon, yn reyn Artakserkses an myghtern.

²A vebyon Finehas, Gershom; a vebyon Ithamar, Daniel; a vebyon Davydh, Hattush

³a vebyon Shekania; a vebyon Parosh, Zekaria, ha ganso kans gour ha hanter-kans kovskrifys;

⁴a vebyon Pahath-moab, Eliehoenay mab Zerahia, ha ganso dew kans gour.

⁵Dhe vebyon Shekania; mab Yahaziel, ha ganso tri hans gour;

⁶a vebyon Adin, Ebed mab Yonathan, ha ganso hanter-kans gour;

⁷a vebyon Elam; Yeshaya mab Athalia, ha ganso deg gour ha tri-ugens;

⁸a vebyon Shefatia, Zebadia mab Mighael, ha ganso peswar-ugens gour;

⁹a vebyon Yoab, Obadia mab Yehiel, ha ganso dew kans gour hag etek;

¹⁰a vebyon Bani,[10] Shelomith mab Yosifia, ha ganso kans gour ha tri-ugens;

¹¹a vebyon Bebay, Zekaria mab Bebay, ha ganso eth gour warn ugens;

¹²a vebyon Azgad, Yohanan mab Hakkatan, ha ganso kans gour ha deg;

¹³a vebyon Adonikam, an re a dheuth a-wosa, Elifelet, Yeiel ha Shemaia, ha gansa tri-ugens gour;

¹⁴a vebyon Bigvay, Uthay ha Zakkur, ha gansa deg gour ha tri-ugens.

¹⁵My a's kuntellas war-barth orth an avon a res troha Ahava; ha ni a gampyas ena tri dydh. My a dhaswelas an bobel ha'n oferysi, ha ny gevis ena denvyth a vebyon Levi.

¹⁶Ena my a dhannvonas war-lergh Eliezer, Ariel, Shemaia, Elnathan, Yarib, Elnathan, Nathan, Zekaria, ha Meshullam, ledyoryon; ynwedh Yoyarib hag Elnathan, gwer a skians.

¹⁷Ha my a's dannvonas dhe Iddo, an penn y'n tyller sans Kasifia, hag a dherivas dhedha an pyth y talvia dhedha leverel dhe Iddo ha'y vreder, an Nethinim,[11] yn Kasifia, may trollens dhyn menystrys rag chi agan Duw.

¹⁸Ha dre leuv dha agan Duw warnan i a dhros dhyn gour a skians da, a vebyon Mahli mab Levi, mab Ysrael; ha mebyon ha breder Sherebia, etek;

¹⁹ha Hashabia, ha ganso Yeshaia a vebyon Merari, y vreder ha'ga mebyon, ugens;

²⁰ynwedh a'n Nethinim, a wrug Davydh ha'n bennsevigyon aga ordena rag gonisogeth an Levysi, dew kans hag ugens; i oll o kovskrifys dre hanow.

²¹Ena my a elwis rag penys ena, ryb an avon Ahava, mayth omuvelhyn a-rag agan Duw, rag hwilas a-dhiworto hyns heb kaletter ragon, ha rag agan fleghes, gans oll agan pythow.

²²Rag meth a'm bia govynn orth an myghtern kowethas soudoryon ha marghogyon dh'agan gweres erbynn ladron fordh; rag ni a leveris dhe'n myghtern, ‘Yma leuv agan Duw war oll an re a'n hwila; mes yma y alloes ha'y sorr erbynn oll a'n eskas.’

²³Ytho ni a benysas ha pysi dh'agan Duw rag hemma, hag a woslowas orthyn.

²⁴Ena my a settyas dhe denewen dewdhek a'n bennoferysi, Sherebia, Hashabia, ha deg a'ga breder,

²⁵ha my a boesas dhedha an arghans ha'n owr, ha'n lestri, henn yw an offrynn rag chi agan Duw, a offrynnas an myghtern, ha'y gusulyadoryon, ha'y bennsevigyon, hag oll tus Ysrael esa ena.

²⁶My a boesas yn aga diwla hwegh kans talent a arghans ha hanter-kans, ha kans talent a lestri gwrys a arghans, ha kans talent[12] a owr;

²⁷ugens bason a owr, a vil dharik,[13] ha dew lester a vrons lentrus, mar dhrudh avel owr.

²⁸Yn-medhav dhedha, ‘Hwi yw sans dhe'n ARLOEDH ha'n lestri yw sans ynwedh. An arghans ha'n owr yw offrynn bolonjedhek dhe'n ARLOEDH, Duw agas tasow;

²⁹Goelyewgh, ha'ga gwitha, bys pan y's poesowgh yn helyow chi an ARLOEDH yn Yerusalem a-rag an bennoferysi ha'n Levysi, ha pennow teyluyow Ysrael.’

³⁰Ytho an oferysi ha'n Levysi a dhegemmeras poes an arghans ha'n owr ha'n lestri, rag aga doen dhe Yerusalem dhe ji agan Duw.

³¹Ena ni eth yn-kerdh dhiworth an avon Ahava yn dewdhegves dydh an kynsa mis, rag mos dhe Yerusalem; yth esa leuv agan Duw warnan, hag ev a'n sawyas dhiworth leuv an eskar, ha dhiworth neb a gontrewayt ryb an fordh.

³²Ni a dheuth dhe Yerusalem, ha powes ena tri dydh.

³³Lemmyn y'n peswora dydh an arghans ha'n owr ha'n lestri a veu poesys yn chi agan Duw yn leuv Meremoth mab Uria an oferyas. Ganso yth esa Eleazar mab Finehas, hag ynwedh an Levysi Yozabad mab Yeshua, ha Noadia mab Binnuy.

³⁴An niver ha'n poes a bup-tra a veu komptys: ha'n poes kowal a veu kovadhys yn eur na.

³⁵Ena mebyon an divroedh, esa devedhys mes a'n gethneth, a offrynnas offrynnow leskys dhe Dhuw Ysrael, dewdhek lodhen rag oll Ysrael, hwetek hordh ha peswar-ugens, seytek oen ha tri-ugens, ha dewdhek bogh avel offrynn pegh: oll an re ma o offrynn leskys dhe'n ARLOEDH.

³⁶Hag i a dhelivras arghadowyow an myghtern dhe wahalyethow an myghtern, ha dhe wovernours an rannvro Dres-an-Avon: hag i a skoedhyas an bobel ha chi Duw.