Read Kernewek Nehemia 11 Bible Online

Nehemia 11 - Kernewek bible

Nehemia 11

¹Yth esa trigys hembrenkysi an bobel yn Yerusalem ha remenant an bobel a dewlis prenn dhe dhewis unn deylu mes a bub deg dhe driga yn Yerusalem, an sita sans, ha'n naw arall yn trevow erell.

²Ha'n bobel a vennigas oll an wer neb a offras aga honan a'ga bodh dhe driga yn Yerusalem.

³An re ma yw hembrenkysi an rannvro esa trigys yn Yerusalem; mes yn sitys Yuda yth esa pubonan trigys yn y berghennogeth y honan yn aga sitys: Ysrael, an oferysi, an Levysi ha'n Nethinim,[10] ha mebyon servysi Solomon.

⁴Hag yn Yerusalem yth esa trigys sertan a vebyon Yuda, hag a vebyon Benyamin. A vebyon Yuda: Athaya mab Uzzia mab Zekaria mab Amaria mab Shefatia mab Mahalalel a vebyon Peres;

⁵ha Maaseya mab Baruk mab Kol-hoze mab Hazaya mab Adaya mab Yoyarib, mab Zekaria mab an Shilonyas.

⁶Oll mebyon Peres trigys yn Yerusalem o peswar kans eth ha tri-ugens a wer golonnek.

⁷Ha'n re ma yw mebyon Benyamin: Sallu mab Meshullam mab Yoed mab Pedaya mab Kolaya mab Maaseya mab Ithiel mab Yeshaia.

⁸Ha war y lergh Gabbay, Sallay,[11] naw kans eth warn ugens.

⁹Ha Yoel mab Zikri o an pennsoedhek ha Yuda mab Hassenua o nessa yn charj a'n sita.

¹⁰A'n oferysi: Yedaya mab Yoyarib, Yakin,

¹¹Seraya mab Hilkia mab Meshullam mab Sadok mab Merayoth mab Ahitub, rewler chi Duw,

¹²ha'ga breder esa ow kul an ober y'n tempel o eth kans dew warn ugens; hag Adaya mab Yeroham, mab Pelalia, mab Amsi, mab Zekaria, mab Pashhur, mab Malkia,

¹³ha'y vreder, pennow teyluyow, dew kans, dew ha dew-ugens; hag Amashsay mab Azarel, mab Ahzay, mab Meshillemoth, mab Immer,

¹⁴ha'ga breder, kasoryon alloesek, kans eth warn ugens ha'ga hembrenkyas o Zabdiel, mab Haggedolim.

¹⁵Ynwedh a'n Levysi: Shemaia mab Hasshub mab Azrikam mab Hashabia mab Bunni;

¹⁶ha Shabbethay ha Yozabad, a bennow an Levysi, yn charj a'n ober a-ves rag chi Duw,

¹⁷ha Mattania mab Mika mab Zabdi mab Asaf, an pennkenyas neb a vedha ow talleth pysadow an grasyans ha Bakbukia an nessa yn mysk y vreder; hag Abda mab Shammua, mab Galal, mab Yeduthun.

¹⁸Oll an Levysi y'n sita sans o dew kans peswar ha peswar ugens.

¹⁹An borthoryon, Akkub, Talmon ha'ga breder, a witha an porthow, o kans ha dewdhek ha tri ugens.

²⁰Hag yth esa remenant Ysrael a'n oferysi ha'n Levysi, yn oll an trevow a Yuda, pubonan yn y eretons y honan.

²¹Mes yth esa an Nethinim trigys yn Ofel ha Siha ha Gishpa a'n jeva charj a'n Nethinim.

²²Hembrenkyas an Levysi yn Yerusalem o Uzzi mab Bani mab Hashabia mab Mattania mab Mika, a vebyon Asaf, an kanoryon, a'n jevo charj servis an tempel.

²³Rag yth esa gorhemmynn dhiworth an myghtern a-dro dhedha hag arghadow ryel rag an ganoryon ow tochya aga deverow a dhydh dhe dhydh.

²⁴Hag yth esa Pethahia mab Meshezabel, a vebyon Zeragh mab Yuda, ryb an myghtern rag y gusulya yn oll materyow a-dro dhe'n bobel.

²⁵Hag ow tochya an godrevow, gans aga gwelyow a-derdro, yth esa re a bobel Yuda trigys yn Kiryath-arba ha'y threvow, hag yn Dibon ha'y threvow, hag yn Yekabseel hag yn y godrevow,

²⁶hag yn Yeshua hag yn Molada hag yn Beth-pelet,

²⁷hag yn Hasar-shual, hag yn Beer-sheba ha'y drevow,

²⁸hag yn Siklag, hag yn Mekona ha'y drevow,

²⁹yn En-rimmon, yn Sora, yn Yarmuth,

³⁰Zanoagh, Adullam, ha'ga threvow, yn Lakish hag y welyow a-derdro, yn Azeka ha'y drevow. Ytho i a drigas dhiworth Beer-sheba bys yn nans Hinnom y'n gogledh.

³¹Mebyon Benyamin a drigas yn Geba, Mikmash, Ayya, Bethel ha'y threvow,

³²hag yn Anathoth, Nob, Anania,

³³Hasor, Rama, Gittaym,

³⁴Hadid, Seboim, Neballat,

³⁵Lod, hag Ono, nans an greftoryon.

³⁶Ha rann a'n Levysi yn Yuda eth dhe Benyamin.