Read Kernewek Nehemia 13 Bible Online

Nehemia 13 - Kernewek bible

Nehemia 13

¹Y'n jydh na, i a lennas yn-mes a lyver Moyses yn klewans an bobel; hag ynno y feu kevys skrifys na dal entra nevra naneyl Ammonyas na Moabyas a-ji dhe guntelles Duw,

²drefenn na vetsons fleghes Ysrael gans bara ha dowr, mes i a arvethas Balaam er aga fynn rag aga mollethi. Byttegyns, agan Duw a dreylyas an volleth dhe vennath.

³Pan glewsons an lagha ma, oll an re a linyeth kemmyskys a veu diberthys dhiworth Ysrael.

⁴Mes kyns hemma, Elyashib an oferyas a'n jevo charj a jambouryow chi agan Duw, neb o kar-ogas a Tobia

⁵a dharbarsa dhodho chambour bras may hwithsens ynno kyns-lemmyn an offrynnow greun, an frankynkys, ha'n lestri, ha'n degedhow a ys, gwin nowydh hag oyl, ragsettys rag an Levysi, an ganoryon ha'n borthoryon, ha'n kevrohow rag an oferysi.

⁶Dres oll an termyn ma ny veuv yn Yerusalem, rag y'n dewdhegves blydhen warn ugens a Artakserkses myghtern Babylon, my eth dhe'n myghtern. Wosa dydhyow pals my a wovynnas kummyas a'n myghtern

⁷ha my a dheuth dhe Yerusalem hag yn eur na my a gonvedhas an drog re wrussa Elyashib, ow tarbari dhe Tobia roum yn klosyow chi Duw.

⁸Pur serrys veuv, ha my a wrug dhe oll daffar-chi Tobia bos tewlys yn-mes a'n chambour.

⁹My a erghis hag i a lanhas an chambouryow, ha my a wrug dhe dhaffar chi Duw, gans an offrynn greun ha'n frankynkys, bos dres ena arta.

¹⁰My a dhyskas ynwedh na via res rannow an Levysi dhedha, ha'n Levysi ha'n ganoryon a asas an ober yn chi Duw ha slynkya dhe-ves rag gonedha aga gwelyow aga honan.

¹¹Ytho my a geredhis an soedhogyon ha leverel, ‘Prag yth yw forsakys chi Duw?’ Ha my a's kuntellas war-barth, ha'ga gorra yn aga thylleryow.

¹²Ena oll Yuda a dhros an dega a ys, gwin nowydh, hag oyl dhe'n gwithvaow.

¹³Ha my a apoyntyas avel tresoryoryon yn charj a'n gwithvaow Shelemia an oferyas, Sadok an skriba, ha Pedaya a'n Levysi, hag avel aga gwereser Hanan mab Zakkur mab Mattania, rag i dhe vos akontys lel. Aga dever o lesranna proviansow dh'aga breder.

¹⁴Porth kov ahanav, ow Duw, rag oll hemma, ha na dhefend ow oberow da a wrug vy rag chi ow Duw, hag yn y servis.

¹⁵Y'n dydhyow na my a welas tus yn Yuda ow trettya gwinwaskow y'n sabot, hag ow tri a-ji bernyow ys hag orth aga beghya war asenes; hag ynwedh gwin, gwinreun, figys, ha pub eghenn arall a veghyow. I a's dhros yn Yerusalem yn dydh sabot; ytho my a's gwarnyas erbynn kwertha boes y'n jydh na.

¹⁶Yth esa tus a Tyr trigys ena ynwedh, ow tri pysk ha marchondis a bub eghenn ha'ga gwertha y'n sabot dhe dus Yuda yn Yerusalem

¹⁷Ytho my a geredhis ugheloryon Yuda ha leverel dhedha, ‘Pyth yw an droktra ma esowgh hwi ow kul, ow tisakra dydh sabot?

¹⁸A ny wrug agas tasow gul yndella, hag a ny dhros agan Duw oll an drog ma warnan, ha war an sita ma? Hwath hwi a dhre moy sorr war Ysrael pan dhisakrowgh an sabot.’

¹⁹Pan dhallathas tewlhe orth yetow Yerusalem kyns an sabot, yth erghis vy may fe degeys an yetow ha ri gorhemmynnow ma na vens igerys bys wosa an sabot. Ha my a settyas re a'm servysi orth an yetow ma na fe beghyow dres a-ji yn dydh sabot.

²⁰Ytho an varchons ha'n werthoryon a varchondis a bub eghenn a wodrigas dres nos a-ves dhe Yerusalem unnweyth po diwweyth.

²¹Mes my a's gwarnyas ha leverel dhedha, ‘Prag yth esowgh ow spena an nos ryb an fos? Mar kwrewgh hemma arta, my a sett dalghenn ynnowgh.’ Wosa an termyn na ny dheuthons y'n sabot.

²²Ena my a erghis dhe'n Levysi may omlanhahens ha mos ha gwitha an yetow rag sanshe dydh an sabot. Porth kov a hemma ynwedh y'm favour, ow Duw, ha kemmer truedh ahanav herwydh braster dha dregeredh.

²³Y'n dydhyow na ynwedh my a welas Yedhewon re dhemmedhsa benynes dhiworth Ashdod, Ammon, ha Moab;

²⁴ha hanter aga fleghes esa ow kewsel taves Ashdod po taves onan a'n poblow erell, ha ny wodhvons kewsel taves Yuda.

²⁵Ha my a's keredhis ha'ga mollethi ha gweskel re anedha ha tenna yn-mes aga blew; ha my a wrug dhedha ti re Dhuw, ow leverel, ‘Na rewgh agas myrghes dh'aga mebyon, na kemmeres aga myrghes rag agas mebyon na ragowgh hwi agas honan.

²⁶A ny wrug Solomon myghtern Ysrael pegha drefenn benynes a'n par na? Yn mysk lies kenedhel nyns esa myghtern kepar hag ev, hag ev o gerys gans y Dhuw, ha Duw a'n gwrug myghtern dres oll Ysrael; mes ev ynwedh a veu gwrys dhe begha gans benynes estren.

²⁷A woslewyn orthowgh ytho, ha gul oll an drog bras ma, ha bos dislel dh'agan Duw ow temmedhi benynes estren?’

²⁸Onan a vebyon Yoyada mab Elyashib an arghoferyas, o deuv dhe Sanballat an Horonyas; rakhenna my a'n pellhas yn-mes a'm lok.

²⁹Porth kov anedha, ow Duw, drefenn i dhe dhefola an oferyaseth, ha kevambos an oferyaseth ha'n Levysi.

³⁰Yndella my a's lanhas dhiworth pup-tra estren, ha my a settyas deverow rag an oferysi ha'n Levysi, pubonan anedha dh'y oberenn y honan,

³¹Ha my a brovias keunys rag an offrynn yn termynyow apoyntys, ha'n kynsa frut. Porth kov ahanav, ow Duw, rag da.