Read Kernewek Nehemia 2 Bible Online

Nehemia 2 - Kernewek bible

Nehemia 2

¹Y'n mis Nisan, y'n ugensves blydhen a Artakserkses an myghtern, pan o termyn dhe servya gwin dhodho, my a gemmeras yn-bann an gwin ha'y ri dhe'n myghtern. Ny vien vy trist kyns yn y lok.

²Ytho an myghtern a leveris dhymm, ‘Prag yth yw trist dha fas, kyn nag os jy klav? Nyns yw hemma travyth marnas tristans an golonn.’ Ena my a borthas own bras.

³My a leveris dhe'n myghtern, ‘Re vewo an myghtern bys vykken! Prag na via ow fas trist, pan yw difeyth an sita, tyller bedhow ow thasow, ha hy yetow re beu distruys gans tan?’

⁴An myghtern a leveris dhymm, ‘Pandr'a wovynnydh orthiv?’ Ytho my a bysis dhe Dhuw an nevow.

⁵Ha my a leveris dhe'n myghtern, ‘Mar pleg dhe'n myghtern ha mar kavas dha was favour y'th wolok, dannvon vy dhe Yuda, dhe sita bedhow ow thasow, ma's dastrehaffen vy.’

⁶Ha'n myghtern a leveris dhymm, (gans an vyghternes owth esedha rybdho), ‘Pana dermyn y fydh dha vyaj, ha p'eur tehwelydh?’ Ytho pes da o an myghtern dhe'm dannvon, ha my a settyas termyn ragdho.

⁷Ynwedh my a leveris dhe'n myghtern, ‘Mar pleg dhe'n myghtern, bedhes lytherow res dhymm dhe wovernours an rannvro Dres-an-Avon, may hwrontyons dhymm tremen saw bys pan dhyffiv bys yn Yuda;

⁸ha lyther dhe Asaf, gwithyas koeswik an myghtern, may rollo dhymm prenn dhe wul jistys rag yetow an palys, ha rag fos an sita, ha rag an chi may fydhav trigys.’ Ha'n myghtern a wrontyas dhymm ow gorholedhow, rag bos leuv dha ow Duw warnav.

⁹Yn eur na my a dheuth dhe wovernours an rannvro Dres-an-Avon, ha ri dhedha lytherow an myghtern. Lemmyn an myghtern re dhannvonsa kaptenyon an lu ha marghogyon genev.

¹⁰Pan glewas Sanballat an Horonyas, ha Tobia an gwas, an Ammonyas, anodho, bras o aga displesour, nebonan dhe dhos dhe hwilas les mebyon Ysrael.

¹¹Ytho my a dheuth dhe Yerusalem, hag yth en vy ena tri dydh,

¹²Ena my a sevis y'n nos, my ha nebes tus genev; ha ny dherivis vy dhe dhenvyth an pyth re worrsa ow Duw y'm kolonn dhe wul rag Yerusalem. Nyns esa best vyth genev saw an best esen vy ow marghogeth warnodho.

¹³Ytho my eth yn-mes dre Yet an Nans y'n nos, troha Fenten an Dhragon, ha dhe Yet an Kawgh, ow hwithra fosow Yerusalem, re bia terrys dhe'n dor, ha'y yetow, re bia distruys gans tan.

¹⁴Ena my a dremenas dhe Yet an Fenten ha dhe Boll an Myghtern; saw nyns esa tyller rag an best esa yn-dannov dhe bassya dredho.

¹⁵Ena my eth yn-bann der an nans y'n nos ow hwithra an fos. Ena my a dreylyas war-dhelergh hag entra dre Yet an Nans, ha dehweles.

¹⁶Ha ny wodhya an soedhogyon ple'th yth vy na pandra esen vy ow kul; ha ny dherivsen vy hwath dhe'n Yedhewon, na dhe'n oferysi, na dhe'n ugheloryon, na dhe'n soedhogyon, na dhe nebonan arall a vedha ow kemmeres rann y'n ober.

¹⁷Ena my a leveris dhedha, ‘Hwi a wel an ahwer eson ni ynno, fatell yw Yerusalem difeyth, ha'y yetow leskys gans tan. Dewgh, ha drehevyn ni fos Yerusalem, ma na vydhyn synsys yn disenor namoy.’

¹⁸Ena my a dherivas dhedha a leuv ow Duw re bia warnav rag da, ha'n geryow a gowssa an myghtern dhymm. Hag i a leveris, ‘Sevyn yn-bann ha dastrehevel!’ Ytho i a ombareusis dhe dhalleth an ober da.

¹⁹Mes pan glewas Sanballat an Horonyas, ha Tobia an gwas, an Ammonyas, ha Geshem an Arab a-dro dh'agan towlow, i a wrug ges ahanan ha'gan dispresya, ow leverel, ‘Pyth yw an dra ma esowgh hwi ow kul? Esowgh hwi ow rebellya erbynn an myghtern?’

²⁰Ena my a worthybis dhedha, ow leverel, ‘Duw nev a re dhyn siwena; ha ni, y servysi, a sev ha drehevel, mes ny'gas beus rann na titel na kovadh yn Yerusalem.’