Read Kernewek Nehemia 4 Bible Online

Nehemia 4 - Kernewek bible

Nehemia 4

¹Pan glewas Sanballat agan bos ow tastrehevel an fos, y sorr a dhewis, ha konnar bras a'n jeva, hag ev a wrug ges a'n Yedhewon.[3]

²Hag ev a leveris a-rag y vreder ha lu Samaria, ‘Pyth usi an Yedhewon wann ma ow kul? A vynnons daswul taklow ragdha i aga honan? A sakrifions i? A worfennons yn unn jydh? A wrons an veyn dhe dhasvewa mes a vernyow radell leskys?’

³Yth esa Tobia an Ammonyas rybdho, hag ev a leveris, ‘An pyth a wrons y dhrehevel — mar yskynna lowarn warnodho, ev a dorrsa dhe'n dor aga fos a veyn!’

⁴Klew, A agan Duw, rag dispresys on ni. Treyl aga thontyans war-dhelergh war aga fenn aga honan, ha'ga delivra dhe vos preydh yn bro mayth ons i kethyon.

⁵Na gudh aga hammweyth ha na as aga fegh dhe vos dileys a'th wolok rag i re'th provokyas dhe sorr a-rag an weythoryon.

⁶Ytho ni a dhrehevis an fos. Hag oll an fos a veu junys war-barth dhe hanter hy ughelder, rag an bobel a lavuryas yn kolonnek.

⁷Mes pan glewas Sanballat ha Tobia ha'n Arabyon ha'n Ammonysi ha'n Ashdodysi bos ewnheans fosow Yerusalem ow mos yn-rag ha'n aswaow ow talleth dhe vos degeys, y fons pur serrys.[4]

⁸Hag i oll a vrasas war-barth dhe dhos hag omladh erbynn Yerusalem, ha gul deray ynni.

⁹Ha ni a bysis dh'agan Duw ha settya goelyador er aga fynn dydh ha nos.

¹⁰Mes tus Yuda a leverys, ‘Nerth degoryon an beghyow a fyll, hag yma kemmys radell ma na yllyn drehevel an fos.’

¹¹Ha'gan eskerens a leveris, ‘Kyns i dhe wodhvos po gweles travyth, ni a dheu yn aga mysk ha'ga ladha hag astel an ober.’

¹²Pan dheuth an Yedhewon esa trigys rybdha, i a leveris dhyn dekkweyth, ‘Y tegoedh hwi dhe dhehweles dhyn ni.’

¹³Ytho my a worras tus y'n tylleryow isella a-dryv an fos, yn tylleryow igor; my a worras an bobel yn bagasow teylu, gans aga kledhedhyow, aga guwow, ha'ga gwaregow.

¹⁴Ha my a viras ha sevel ha leverel dhe'n ugheloryon, ha dhe'n soedhogyon ha dhe remenant an bobel, ‘Na berthewgh own anedha. Perthewgh kov a'n Arloedh yw meur hag euthyk, hag omledhewgh rag agas breder, agas mebyon, agas myrghes, agas gwragedh ha'gas chiow.’

¹⁵Pan glewas agan eskerens aga thowl dhe vos godhvedhys dhyn, ha Duw dh'y lesta, ni oll a dhehwelis dhe'n fos, peub dh'y ober y honan.

¹⁶A-dhia'n jydh na, hanter a'm servysi a wre an ober, ha hanter anedha a synsi an guwow, an skoesow, an gwaregow ha'n kaspowsyow. Ha'n ledyoryon a sevis a-dryv oll chi Yuda,

¹⁷esa ow tastrehevel an fos. An re esa ow toen beghyow a oberi gans an eyl leuv ha synsi arv yn hy ben.

¹⁸Ha dhe bub byldyer yth esa y gledha kelmys war y vordhos hag ev ow trehevel. Rybov yth esa an den a seni an trompa.

¹⁹Ena my a leveris dhe'n ugheloryon, dhe'n soedhogyon, ha dhe remenant an bobel, ‘Meur hag omlesys a-les yw an ober, hag yth on ni diberthys war an fos, an eyl pell dhiworth y gila.

²⁰Y'n tyller may klewowgh hwi son an trompa, kuntellewgh dhyn ena. Agan Duw a omladh ragon ni.’

²¹Ytho ni a besyas oberi ha hanter anedha ow synsi an guwow, dhiworth drehevel an myttin bys pan omdhiskwedhas an ster.

²²My a leveris dhe'n bobel ynwedh y'n eur na, ‘Passyes pub den ha'y servont an nos a-ji dhe Yerusalem, ma'gan gwitthons y'n nos hag oberi y'n jydh.’

²³Ytho na my na'm breder na'm servysi na'n withysi neb a'm holyas, ny omdhiwiskas nagonan ahanan; peub a'n jevo y arv pan e rag dowr.