Read Kernewek Nehemia 5 Bible Online

Nehemia 5 - Kernewek bible

Nehemia 5

¹Y yth esa garm ughel a'n bobel ha'ga gwragedh erbynn aga breder an Yedhewon.

²Yth esa re a leveri, ‘Ni ha'gan mebyon ha'gan myrghes yw lies: kevyn ni ys ragdha, may typpryn ha bewa.’

³Yth esa ynwedh neb a leveri, ‘Ni re arwoestlas agan gwelyow, agan gwinlannow, ha'gan chiow rag prena ys drefenn an divoetter.’

⁴Ynwedh yth esa re a leveri, ‘Ni re jevisyas mona rag toll an myghtern war agan gwelyow ha war agan gwinlannow.

⁵Byttegyns lemmyn kepar hag yw kig agan breder, yndella yw agan kig ni; kepar ha'ga mebyon i, yndella yw agan mebyon ni; otta, yth eson ow konstryna agan mebyon ha'gan myrghes yn kethneth ha rann a'gan myrghes re beu kethhes seulabrys, mes dialloes on dh'aga dasprena drefenn tus erell dhe gavoes agan gwelyow ha'gan gwinlannow.’

⁶Ha my o pur serrys pan glewis aga garm ha'n geryow ma.

⁷Lemmyn my a ombrederis y'm brys ha my a gedrynnas gans an ugheloryon ha'n soedhogyon. My a leveris dhedha, ‘Hwi a gemmer oker, pubonan dhiworth y vroder.’ Ytho my a elwis kuntelles bras er aga fynn.

⁸Hag yn-medhav dhedha, ‘Oll dh'agan galloes, ni re dhasprenas agan breder, an Yedhewon, a veu gwerthys dhe'n kenedhlow; mes yth esowgh hwi ow kwertha agas breder, may fons gwerthys dhyn!’ Yth ens tawesek ha ny allsons kavoes ger dhe leverel.

⁹Ytho my a leveris, ‘Nyns yw da an pyth esowgh orth y wul. A ny dalvia dhywgh kerdhes yn own agan Duw rag goheles keredh an kenedhlow, agan eskerens?

¹⁰Keffrys, yma my ha'm breder ha'm servysi ow ri mona hag ys yn kendon dhedha. My a'gas pys, hedhyn ni ow kemmeres an oker ma.

¹¹Daskorrewgh dhedha an jydh ma, my a'gas pys, aga gwelyow, aga gwinlannow, aga olewbrennyer ha'ga chiow ha'n oker[5] war vona, ys, gwin hag oyl re bewgh ow kemmeres anedha.’

¹²Ytho i a leveris, ‘Ni a's daskorr ha ny vynnyn travyth orta; ytho ni a wra dell leverydh.’ Ena my a elwis an oferysi ha my a wrug dhedha ti y hwrens war-lergh an ambos ma.

¹³Ynwedh my a shakyas pleg ow fows ha leverel, ‘Yndellma re shakkyo Duw yn-mes dhiworth y ji ha dhiworth y lavur pub gour na with an ambos ma. Yndella re bo shakys yn-mes ha gwakhes.’ Hag oll an gesva a leveris ‘Amen’ ha gormel an ARLOEDH. Ha'n bobel a wrug war-lergh an ambos ma.

¹⁴Kekeffrys, a-dhia'n termyn may feus apoyntys dhe vos aga governour yn pow Yuda, a-dhia'n ugensves blydhen dhe'n dewdhegves blydhen a Artakserkses an myghtern, dewdhek blydhen, ny dhybri my na'm breder boes an governour.

¹⁵Mes an governours kyns, re bia kyns ow thermyn vy, a settsa beghyow poes war an bobel ha kemmeres dhiworta dew-ugens shekel a arghans war-barth gans boes ha gwin. Aga servysi ynwedh a lordya war an bobel. Mes ny wrug vy yndella rag own Duw.

¹⁶Ynwedh my a besyas oberi gans nerth war an fos ma ha ny brensyn tir vyth: hag oll ow servysi a veu kuntellys ena rag an ober.

¹⁷Kekeffrys, y fedha orth ow moes kans gour ha hanter-kans, Yedhewon ha soedhogyon, dres an re a dheuth dhyn a'n kenedhlow esa a-dro dhyn.

¹⁸Lemmyn y fedha darbarys pub dydh unn ojyon ha hwegh davas dhewisys; ydhyn yn kepar maner a vedha darbarys ha pub deg dydh pub eghenn gwin yn lanwes; byttegyns yn spit dhe oll hemma ny erghis boes an governour drefenn begh an ober dhe vos poes war an bobel ma.

¹⁹Porth kov ahanav rag ow les, ow Duw, war-lergh pup-tra a wrug vy rag an bobel ma.