Read Kernewek Nehemia 8 Bible Online

Nehemia 8 - Kernewek bible

Nehemia 8

¹Oll an bobel a omguntellas gans unn akord y'n plen a-dherag Yet an Dowr; hag i a leveris dhe Ezra an skriba dhe dhri lyver lagha Moyses a wrussa an ARLOEDH erghi dhe Ysrael.

²Hag Ezra an oferyas a dhros an lagha a-dherag an kuntelles, keffrys gwer ha benynes, ha peub a allas klewes gans konvedhes, yn kynsa dydh an seythves mis.

³Hag ev a lennas an lagha y'n plen a-dherag Yet an Dowr dhiworth myttin a-varr bys hanter-dydh, a-dherag gwer ha benynes, ha tus a allas konvedhes; hag oll an bobel a woslowas gans rach orth lyver an lagha.

⁴Hag Ezra an skriba a sevis war arethva a brenn re wrussons rag an porpos; ha rybdho y sevis Mattithia, Shema, Anaya, Uria, Hilkia, ha Maaseya, a dhyghow dhodho; hag a-gledh dhodho, Pedaya, Mishael, Malkia, Hashum, Hashbaddana, Zekaria ha Meshullam

⁵Ena Ezra a igoras an lyver yn golok oll an bobel, drefenn y vos ow sevel a-ughta; ha pan y'n igoras, oll an bobel a sevis yn-bann.

⁶Hag Ezra a vennigas an ARLOEDH, an Duw meur. Hag oll an bobel a worthybis, ‘Amen, Amen’, ow trehevel aga diwleuv: hag i a blegyas aga fenn, ha gordhya an ARLOEDH gans aga fas dhe'n dor.

⁷Ynwedh Yeshua, Bani, Sherebia, Yamin, Akkub, Shabbethay, Hodia, Maaseya, Kelita, Azaria, Yozabad, Hanan, ha Pelaya, an Levysi, a weresas an bobel dhe gonvedhes an lagha, ha'n bobel ow kortos yn aga thyller.

⁸Ytho i a lennas a lyver lagha Duw diblans, ha ri an styr, may hallo an bobel konvedhes an pyth a veu lennys.

⁹Ena Nehemia, an governour, hag Ezra an oferyas ha'n skriba, ha'n Levysi a dhyski an bobel, a leveris dhe oll an bobel, ‘Sans yw an jydh ma dhe'n ARLOEDH agas Duw; na gynewgh, na nag oelewgh.’ Rag oll an bobel a oelas, pan glewsons geryow an lagha.

¹⁰Yn eur na ev a leveris dhedha, ‘Kewgh, dybrewgh an blonek, hag evewgh an gwin hweg ha dannvenewgh rannow dhodho ev na'n jeves travyth parys ragdho. Sans yw an jydh ma dh'agan Arloedh: na bedhewgh grevys, rag lowena an ARLOEDH yw agas nerth.’

¹¹Ytho an Levysi a goselhas oll an bobel, ow leverel, ‘Taw taves, rag sans yw an jydh; na vedhewgh grevys.’

¹²Hag oll an bobel eth yn-kerdh dhe dhybri ha dhe eva, ha dhe dhannvon rannow ha dhe wul lowender bras, drefenn i dhe gonvedhes an geryow a veu disklerys dhedha.

¹³Y'n nessa dydh pennow teyluyow oll an bobel gans an oferysi ha'n Levysi a dheuth war-barth dhe Ezra rag konvedhes geryow an lagha.

¹⁴Hag i a gavas skrifys y'n lagha a wrug an ARLOEDH hy erghi dre Moyses, may trikka mebyon Ysrael yn skovvaow yn goel an seythves mis,

¹⁵ha may teklarryens ha dyllo yn oll aga threvow hag yn Yerusalem, ow leverel, ‘Kewgh yn-mes war an menydhyow ha kyrghewgh skorrennow a oliv, oliv gwyls, myrtwydh, palm ha gwydh delyek arall rag gul skovvaow, dell yw skrifys.’

¹⁶Ytho an bobel eth yn-mes ha'ga hyrghes, ha gul dhedha aga honan skovvaow, pubonan war do y ji, hag yn aga klosyow, ha klosyow chi Duw, hag yn stret Yet an Dowr, hag yn stret Yet Efraym.

¹⁷Hag oll an kuntelles, an re hag a dhehwelsa dhiworth an gethneth, a wrug skovvaow ha triga ynna; rag a-dhia dhydhyow Yeshua mab Nun bys y'n jydh na ny wrussa fleghes Ysrael yndella. Ha'n lowena o pur vras.

¹⁸Ha pub-dydh, a-dhia'n kynsa dydh dhe'n jydh diwettha, ev a lennas yn-mes a lyver lagha Duw. Hag i a withas an goel seyth dydh; ha'n ethves dydh yth esa kuntelles solem, war-lergh an ordenans.