Read Kernewek 1 Esdras 1 Bible Online

1 Esdras 1 - Kernewek bible

1 Esdras 1

¹Yosia a solempnyas an pask yn Yerusalem dh'y Arloedh, hag ev a offrynnas an pask yn peswardhegves dydh an kynsa mis,[1]

²wosa settya an oferysi herwydh aga rannow, arayys yn aga gwiskasow, yn tempel an Arloedh.

³Ev a leveris dhe'n Levysi, servysi tempel Ysrael, mayth omsakrens dhe'n Arloedh ha gorra argh sans an Arloedh y'n chi a wrussa myghtern Solomon mab Davydh y dhrehevel;

⁴hag yn-medh ev, ‘Nyns eus edhomm na fella hwi dh'y doen war agas diwskoedh. 4 Lemmyn gordhyewgh an Arloedh agas Duw ha servya y bobel Ysrael; ombareusiwgh herwydh agas teyluyow ha loethow,

⁵herwydh kevarwoedh Davydh myghtern Ysrael, ha herwydh splannder y vab Solomon. 5 Sevewgh y'n tempel yn aray herwydh chiow agas tasow an Levysi, a venyster a-rag agas breder mebyon Ysrael.

⁶Offrynnewgh an pask ha pareusi an sakrifisow rag agas breder hag gwitha an pask herwydh gorhemmynn an Arloedh a veu res dhe Moyses.’

⁷Dhe'n dus esa ena Yosia a ros deg mil warn ugens a eyn hag a vynnow ha tri mil leugh; res vons dhiworth pyth an myghtern, dell ambosas, dhe'n bobel ha dhe'n oferysi ha dhe'n Levysi.

⁸Hilkia, Zekaria, ha Yehiel, governours an tempel, a ros dhe'n oferysi rag an pask dew mil davas ha hwegh kans ha tri kans leugh.

⁹Ha Yekonia ha Shemaia ha'y vroder Nathanael, ha Hashabia hag Okiel ha Yoram, kaptenyon milyow, a ros dhe'n Levysi rag an pask pymp mil davas ha seyth kans leugh.

¹⁰Hemm yw an pyth a hwarva. An oferysi ha'n Levysi, 11 ha gansa an bara heb goell, a sevis yn aray kempenn herwydh aga loethow

¹¹ha chiow aga thasow, a-rag an bobel, dhe wul an offrynn dhe'n Arloedh dell yw skrifys yn lyver Moyses; yndella y hwrussons myttin.

¹²I a rostyas an pask gans tan, dell dhelledh; hag i a vrojyas an sakrifisow yn chekys a vrons ha kalteryow, gans sawer plegadow,

¹³ha'ga doen dhe oll an bobel. 14 A-wosa i a bareusis an pask ragdha i aga honan ha rag aga breder an oferysi, mebyon Aron,

¹⁴rag yth esa an oferysi owth offrynna an blonek bys tewlwolow; ytho an Levysi a'n pareusis ragdha i aga honan ha rag aga breder an oferysi, mebyon Aron.

¹⁵Yth esa kenysi an tempel, mebyon Asaf, yn aga thyller herwydh an aray gwrys gans Davydh, ynwedh Asaf, Zekaria, hag Eddinus, kannasow an myghtern.

¹⁶Yth esa an borthoryon orth pub yet; ny veu edhomm dhedha gasa aga asrann, rag aga breder an Levysi re bareussas an pask ragdha.

¹⁷Ytho an taklow rag sakrifisow an Arloedh a veu kowlwrys y'n jydh na: an pask a veu gwithys

¹⁸ha'n sakrifisow a veu offrynnys war alter an Arloedh, herwydh gorhemmynn myghtern Yosia.

¹⁹Ha mebyon Ysrael esa ena y'n termyn na a withas an pask ha goel an bara heb goell seyth dydh.

²⁰Ny veu pask a'n par na goelys yn Ysrael a-dhia termynyow Samuel an profoes;

²¹ny withas nagonan a vyghternedh Ysrael pask a'n par na, dell veu goelys gans Yosia ha'n oferysi ha'n Levysi ha'n Yedhewon hag oll Ysrael esa trigys yn Yerusalem.

²²Y'n etegves blydhen a reyn Yosia y feu goelys an pask ma.

²³Ha gweythresow Yosia o ewnhynsek yn golok an Arloedh, rag y golonn o leun a sansoleth.

²⁴Hwarvosow y reyn re beu kovedhys yn termynyow passys, a-dro dhe'n re a beghas ha gul drog troha'n Arloedh dres pub pobel po gwlas, ha fatell y'n grevsons yn town, bys may koedhas geryow an Arloedh war Ysrael.

²⁵Wosa oll an gweythresow ma a Yosia, Faro, myghtern Ejyp eth dhe werrya yn Karkemish war an Ewfrates, ha Yosia eth yn-mes dh'y dhyerbynna.

²⁶Mes myghtern Ejyp a dhannvonas dhodho ow leverel,

²⁷‘Pandra yw dhiso jy ha dhymmo vy, A vyghtern Yuda? 25 Ny veu er dha bynn jy may feuv dannvenys gans an Arloedh Duw, rag yma ow bresel orth an Ewfrates. Ha lemmyn, yma an Arloedh genev, hag yma an Arloedh genev ow kul dhymm fyski yn-rag. Sav a-denewen, ha na omsett erbynn an Arloedh.’

²⁸Ny dreylyas Yosia arta dh'y jarett, mes ev a assayas batalyas orto, ha ny wrug vri a eryow an profoes Yeremia, dhiworth ganow an Arloedh.

²⁹Ev a junyas ganso yn batel yn plen Megiddo, ha'n gaslewydhyon a dheuth yn-nans erbynn myghtern Yosia.

³⁰Yn-medh an myghtern dh'y wesyon, ‘Kemmerewgh vy dhiworth an vatel, rag fest gwannhes ov.’ Ha'y wesyon a'n kemmeras dison dhiworth aray an vatel.

³¹Ev a yskynnas yn y nessa charett; ha wosa bos dres arta dhe Yerusalem ev a verwis, hag a veu ynkleudhys yn bedh y dasow.

³²Yn oll Yudi i a gynis rag Yosia. An profoes Yeremia a gynis rag Yosia, ha'n ugheloryon gans an benynes re gynis ragdho bys y'n jydh hedhyw; ordenys veu, hemma dhe vos gwrys pup-prys dre oll kenedhel Ysrael.

³³An taklow ma yw skrifys yn lyver istoriow myghternedh Yuda; ha pubonan a weythresow Yosia, ha'y splannder, ha'y gonvedhes a lagha an Arloedh, ha'n taklow gwrys ganso kyns ha'n taklow derivys lemmyn, kovedhys yns yn lyver myghternedh Ysrael ha Yuda.

³⁴Tus an kenedhel a gemmeras Yekonia mab Yosia, ha'y apoyntya myghtern yn le y das Yosia; ev a veu teyr bloedh warn ugens y oes.

³⁵Ev a reynyas tri mis yn Yudi ha Yerusalem. Ena myghtern Ejyp a'n removas a'y reyn yn Yerusalem,

³⁶hag a spalyas an wlaskor kans talent a arghans hag unn talent a owr.

³⁷Myghtern Ejyp a wrug y vroder Yehoyakim myghtern Yudi ha Yerusalem.

³⁸Yehoyakim a worras an ugheloryon yn prison, hag a dhalghennas y vroder Zarius ha'y dhoen yn-bann dhiworth Ejyp.

³⁹Yehoyakim a veu pymp bloedh warn ugens pan dhallathas reynya yn Yudi ha Yerusalem; hag ev a wrug an drog yn golok an Arloedh.

⁴⁰Myghtern Nebukadnessar a Babylon a dheuth yn-bann rag metya ganso; ev a'n kolmas gans kadonyow a vrons ha'y doen dhe Babylon.

⁴¹Nebukadnessar a gemmeras ynwedh nebes a lestri sans an Arloedh, ha'ga doen dhe-ves, ha'ga gorra yn y dempel yn Babylon.

⁴²Mes an taklow derivys a-dro dhe Yehoyakim, ha'y avlander ha'y dhiskryjyans yw skrifys yn kovadhow an vyghternedh.

⁴³Y vab Yehoyaghin eth ha bos myghtern yn y le; pan veu gwrys myghtern ev a veu etek bloedh,

⁴⁴hag ev a reynyas tri mis ha deg dydh yn Yerusalem. Ev a wrug an drog yn golok an Arloedh.

⁴⁵Unn vlydhen a-wosa, Nebukadnessar a dhannvonas ha'y removya dhe Babylon war-barth ha lestri sans an Arloedh,

⁴⁶hag ev a wrug Sedekia myghtern Yuda ha Yerusalem. Sedekia a veu unn vlydhen warn ugens, hag ev a reynyas unnek blydhen.

⁴⁷Ev ynwedh a wrug an drog yn golok an Arloedh, ha ny goela orth an geryow o kewsys gans an profoes Yeremia dhiworth ganow an Arloedh.

⁴⁸Kyn hwrug myghtern Nebukadnessar dhodho ti re hanow an Arloedh, ev a dorras y di hag a rebellyas; ev a galeshas y gonna ha'y golonn ha kammdremena erbynn laghys an Arloedh, Duw Ysrael.

⁴⁹Hwath ledyoryon an bobel ha ledyoryon an oferysi a wrug lies gweythres blasfemus hag anlaghel dres pub gweythres avlan a'n gwlaskordhow oll, ha defola tempel an Arloedh yn Yerusalem — an tempel re wrussa Duw y sakra.

⁵⁰Duw aga thasow a dhannvonas der y gannas rag aga daskelwel, rag ev a vynnas aga sparya, i ha'y drigva.

⁵¹Mes i a wrug ges a'y gannasow, ha peskweyth may kewsis an Arloedh, yth esens owskonya y brofoesi,

⁵²bys may sorras orth y bobel drefenn aga gweythresow diskryjyk, ha'ga gorhemmynn may fe myghternedh an Kaldeanys dres yn-bann er aga fynn.

⁵³An re ma a ladhas aga gwer yowynk gans an kledha, a-dro dhe'n tempel sans ha ny sparsons gour yowynk na benyn yowynk, kothwas na flogh, rag ev a's ros yn aga diwleuv.

⁵⁴I a gemmeras oll lestri sans an Arloedh, an re bras keffrys ha'n re byghan, kofrow tresor an Arloedh, ha'n taklow y'n gwithtiow ryel, ha'ga doen dhe-ves, dhe Babylon.

⁵⁵I a loskas chi an Arloedh, hag i a dennas dhe'n dor fosow Yerusalem ha leski aga thouryow gans tan,

⁵⁶ha distrui oll hy thaklow splann. An re gesys hwath yn few ev a ledyas mes dhe Babylon gans an kledha,

⁵⁷hag i o servysi dhodho ha dh'y vebyon bys may tallathas an Persianys aga reyn, yndella ow kewera ger an Arloedh dre anow an profoes Yeremia:

⁵⁸‘Kettell y'n jeffo an tir oll y sabotys, ev a with an sabotys oll termyn y ynyalder bys pan vo kowlwrys y seytek blydhen ha tri ugens.’