Read Kernewek 1 Esdras 6 Bible Online

1 Esdras 6 - Kernewek bible

1 Esdras 6

¹Lemmyn y'n nessa blydhen a reyn Darius, an brofoesi Haggay ha Zekaria mab Iddo a brofoesas dhe'n Yedhewon esa yn Yudi ha Yerusalem; i a brofoesas dhedha yn hanow an Arloedh, Duw Ysrael.

²Ena Zerubbabel mab Shealtiel ha Yeshua mab Yosadak a dhallathas drehevel chi an Arloedh usi yn Yerusalem, gans gweres profoesi an Arloedh esa gansa.

³Yn kettermyn Sisinnes governour Syria ha Fenikia ha Sathrabuzanes ha'ga howetha a dheuth dhedha ha leverel,

⁴‘Piw a ros an gorhemmynn ganso mayth esowgh hwi ow trehevel an chi ma ha'n to ma hag ow korfenna oll an taklow erell? Ha piw yw an weythoryon usi ow korfenna an taklow ma?’

⁵Byttegyns dyghtys yn hegar o henavogyon an Yedhewon, rag yth esa gwith an Arloedh war an kethneth.

⁶Ny vons lettys rag dhrehevel bys pan veu ger dannvenys dhe Darius a-dro dhedha, ha'y gorthyp degemmerys.

⁷Dasskrif an lyther a skrifas Sisinnes governour Syria ha Fenikia, ha Sathrabuzanes, ha'ga howetha, hembrenkysi Syria ha Fenikia ha'y dhannvon dhe Darius:

⁸‘Dhe vyghtern Darius, salusyans. Bedhes godhvedhys yn ta dh'agan arloedh an myghtern, pan ethen dhe bow Yudi hag entra y'n sita Yerusalem, y kevsyn henavogyon an Yedhewon, re bia yn kethneth,

⁹ow trehevel y'n sita Yerusalem chi bras rag an Arloedh, a ven treghys gans prennyer kostek gorrys y'n fosow.

¹⁰Yma an oberennow ma ow mos yn-rag fest yn skav, ha'n ober a siwen yn aga diwdhorn, hag yma ev ow pos gorfennys gans oll splannder ha rach.

¹¹Ena ni a wovynnas orth an henavogyon ma, “Piw a ros an gorhemmynn ganso mayth esowgh hwi ow trehevel an chi ma ha gorra selyow an drehevyans ma?”

¹²Rag may hyllyn derivas dhis yn skrif, piw yw an ledyoryon, ni a wovynnas orta, ha govynn dhiworta rol henwyn aga ledyoryon.

¹³I a worthybis, “Ni yw gwesyon an Arloedh a wrug an nev ha'n norvys.

¹⁴An chi a veu drehevys nans yw lies blydhen gans myghtern a Ysrael o meur y vri ha krev, ha gorfennys o.

¹⁵Mes pan beghas agan tasow orth Arloedh Ysrael, usi y'n nev, ha'y brosa, ev a'n ros yn diwdhorn Nebukadnessar myghtern Babylon, myghtern an Kaldeanys;

¹⁶hag i a dennas an chi dhe'n dor ha'y leski, ha doen an bobel dhe-ves yn kethneth dhe Babylon.

¹⁷Mes yn kynsa blydhen may reynya Syrus war wlaskor Babylon, myghtern Syrus a skrifas may fe an chi ma dastrehevys.

¹⁸Ha'n lestri sans a owr hag a arghans, re gemmmersa Nebukadnessar a'n chi yn Yerusalem ha'ga gwitha yn y dempel y honan, Syrus an myghtern a's kemmeras yn-mes arta a dempel Babylon, hag i a veu daskorrys dhe Zerubbabel ha Sheshbassar, an governour

¹⁹gans an gorhemmynn may trollo oll an lestri ma tre ha'ga gorra y'n tempel yn Yerusalem, ha may fo an tempel ma a'n Arloedh dastrehevys yn y dyller.

²⁰Ena an Sheshbassar ma, wosa ev dhe dhos omma, a worras selyow chi an Arloedh usi yn Yerusalem. Kynth usi y dhrehevel ow mos yn-rag a'n termyn na bys y'n jydh ma, ny veu gorfennys hwath.”

²¹Ytho lemmyn, A vyghtern, mar hevel fur y wul, bedhes hwithrans gwrys yn kovlyvrow ryel agan arloedh an myghtern, an re usi yn Babylon;

²²mara pydh kevys dastrehevel chi an Arloedh dhe vos gans kummyas myghtern Syrus, ha mara pydh da gans agan arloedh an myghtern, dannvenes ev kevarwoedhyans a-dro dhe'n taklow ma.’

²³Ena Darius a worhemmynnis may fe hwithrans gwrys y'n kovlyvrow ryel esa ow krowedha yn Babylon. Hag yn Ekbatana an kastell usi yn pow Media, kevys veu rol mayth esa hemma kovadhys ynno:

²⁴‘Yn kynsa blydhen reyn Syrus, myghtern Syrus a worhemmynnis may fo drehevys chi an Arloedh yn Yerusalem, may sakrifir gans tan heb hedhi;

²⁵yma y ughelder dhe vos tri ugens kevelin ha'y les tri ugens kevelin, gans tri gweli a ven treghys hag unn gweli a brenn nowydh, a'n pow na, ha'n kost dhe vos tylys a dresorva Syrus an myghtern,

²⁶ha'n lestri sans a ji an Arloedh keffrys a owr hag a arghans re bia kemmerys dhiworth an chi yn Yerusalem gans Nebukadnessar ha degys dhe Babylon, y tegoedh aga bos daskorrys dhe'n chi yn Yerusalem ha'ga gorra y'n tyller may fiens kyns.’

²⁷Yndella Darius a worhemmynnis dhe Sisinnes, governour Syria ha Fenikia, ha dhe Sathrabuzanes, ha'ga howetha, ha'n re apoyntys avel hembrenkysi yn Syria ha Fenikia, may fens a-ves a'n tyller, ha may rollens kummyas dhe Zerubbabel, gwas an Arloedh ha governour Yudi, ha henavogyon an Yedhewon a dhrehevel chi an Arloedh war y dyller.

²⁸‘Ha my a worhemmynn may fo kowldhrehevys, ha may fons diwysyk rag gweres an re a gethneth Yudi bys pan vo chi an Arloedh gorfennys.

²⁹Ha may roller gans rach rann a drubyt Kelesyria ha Fenikia dhe'n dus ma, henn yw dhe Zerubbabel an governour, rag sakrifia dhe'n Arloedh rag terewi ha hordhes hag eyn,

³⁰hag ynwedh ys ha hoelan ha gwin hag oyl, prest pub blydhen heb hokya, rag us pub-dydhyek dell dhiskwettho an oferysi yn Yerusalem,

³¹rag may fo offrynnow diwes gwrys dhe'n ughella Duw rag an myghtern ha'y fleghes, ha may pyssons rag aga bewnans.’

³²Ev a worhemmynnis, mar kwrella nebonan kammdremena po mannhe an taklow yw skrifys omma, may fo keber kemmerys dhiworth y ji ha'n gwrier kregys warnedhi, ha ma fo oll y pythow daskorrys dhe'n myghtern.

³³Rakhenna re dhiswrello an Arloedh, may helwir war y hanow ena, pub myghtern ha kenedhel hag a ystynn aga diwleuv rag lettya po shyndya chi an Arloedh usi yn Yerusalem.

³⁴‘My, myghtern Darius, re ordenas may fo gwrys gans rach, dell yw ragsettys omma.’