Read Kernewek 1 Esdras 8 Bible Online

1 Esdras 8 - Kernewek bible

1 Esdras 8

¹Wosa an taklow ma, pan esa Artakserkses myghtern an Persianys ow reynya, Ezra a dheuth, mab Seraya mab Azaria mab Hilkia mab Shallum

²mab Sadok mab Ahitub mab Amaria mab Uzzi mab Bukki mab Abishua mab Finehas mab Eleazar mab Aron an arghoferyas.

³An Ezra ma a dheuth yn-bann a Babylon avel skriba skentel yn lagha Moyses, a veu res gans Duw Ysrael;

⁴ha'n myghtern a dhiskwedhas dhodho enor, rag ev a gavas favour dherag an myghtern yn oll y worholedhow.

⁵Ganso y teuth dhe Yerusalem re a vebyon Ysrael ha re a'n oferysi ha'n Levysi ha re a ganoryon an tempel ha'n borthoryon ha servysi an tempel,

⁶y'n seythves blydhen a reyn Artakserkses, y'n pympes mis (hemm o an seythves blydhen a reyn an myghtern); rag i a asas Babylon yn loer nowydh an kynsa mis ha dos dhe Yerusalem yn loer nowydh an pympes mis, der an vyaj siwen a ros an Arloedh dhedha.

⁷Rag Ezra a'n jevo skentoleth veur, bys ma na asa travyth a lagha an Arloedh nag a'n gorhemmynnow, mes ev a dhyski oll Ysrael oll an ordenansow ha'n breusow.

⁸An pyth a siw yw dasskrif a'n charj skrifys dhiworth Artakserkses an myghtern dhe Ezra an oferyas ha lenner a lagha an Arloedh.

⁹‘Myghtern Artakserkses dhe Ezra an oferyas ha lenner a lagha an Arloedh, salusyans.

¹⁰Herwydh ow ervirans kuv, my re worhemmynnis y hyll mos genes dhe Yerusalem an re yw a genedhel an Yedhewon hag a'n oferysi hag a'n Levysi, ha'n re erell a'gan wlaskor a's teves hwans dhe vos.

¹¹Ytho omdennes myns a vynno mos genes, par dell evirsyn, my ha'm seyth kar yw ow honseloryon,

¹²rag hwithra taklow yn Yudi hag yn Yerusalem, herwydh an pyth usi yn lagha an Arloedh,

¹³ha rag doen dhe Yerusalem an rohow rag Arloedh Ysrael re desen ni ha'm kerens, ha dhe guntell rag an Arloedh yn Yerusalem oll an owr hag arghans a yll bos kevys yn tiredh Babylon,

¹⁴war-barth gans an pyth a rer gans an genedhel rag tempel aga Arloedh usi yn Yerusalem, keffrys owr hag arghans rag terewi ha hordhes hag eyn ha'n pyth a gansa,

¹⁵rag sakrifia war alter aga Arloedh usi yn Yerusalem.

¹⁶Pypynag a wrewgh, ty ha'th vreder, gans an owr ha'n arghans, gwra henna herwydh bodh dha Dhuw,

¹⁷ha deliver lestri sans an Arloedh yw res dhis rag us tempel dha Dhuw usi yn Yerusalem.

¹⁸Ha pypynag a brederydh anodho may ma edhomm anodho rag tempel dha Dhuw, ty a yll y brovia a'n dresorva ryel.

¹⁹‘My, Artakserkses an myghtern, re worhemmynnis dhe alhwedhoryon Syria ha Fenikia gwaytyas ri dhe Ezra, oferyas ha lenner lagha an ughella Duw, pypynag a vynn ev y gavoes,

²⁰bys kans talent a arghans, hag ynwedh bys kans kor a ys, kans bath a win, ha hoelan pals.

²¹Bedhes oll an taklow gorhemmynnys yn lagha Duw gwrys gans rach rag ughella Duw, ma na dheffo konnar war vyghternses an myghtern ha'y vebyon.

²²Dhiso y leverir ynwedh na vo trubyt na toll vyth arall gorrys war an oferysi na'n Levysi, na kanoryon an tempel, na'n borthoryon nag a servysi an tempel nag a dus a ober y'n tempel ma, ha na's teves nebonan awtorita dhe worra toll vyth warnedha.

²³‘Ha ty, Ezra, herwydh furneth Duw, orden breusysi ha justisyow rag vreusi oll an re hag a aswonn lagha dha Dhuw der oll Syria ha Fenikia; ha ty a dhysk dhe'n re na's aswonn.

²⁴Oll an re hag a derr lagha dha Duw po lagha an ruvaneth a vydh kessydhys yn tynn, po gans mernans po gans kessydhyans arall, po gans spal po gans prisonyans.’

²⁵Ena Ezra an lenner a leveris, ‘Bennigys re bo an Arloedh y honan neb a worras hemma yn kolonn an myghtern, dhe wul gloryus y ji usi yn Yerusalem,

²⁶hag a'm enoras yn golok an myghtern ha'y gonseloryon hag oll y gerens hag ugheloryon.

²⁷My o kolonnekhes gans gweres an Arloedh ow Duw, ha my a guntellas gwer yn-mes a Ysrael rag mos yn-bann genev.’

²⁸An re ma yw an ledyoryon herwydh chiow aga thasow ha'ga bagasow a dheuth yn-bann genev a Babylon yn reyn Artakserkses an myghtern:

²⁹A vebyon Finehas, Gershom. A vebyon Ithamar, Gamael. A vebyon Davydh, Hattush mab Shekania.

³⁰A vebyon Parosh, Zekaria, ha ganso kans ha hanter-kans gour omrolys.

³¹A vebyon Pahath-moab, Eliehoenay mab Zerahia, ha ganso dew kans gour.

³²A vebyon Zattu, Shekania mab Yahaziel, ha ganso tri hans gour. A vebyon Adin, Obed mab Yonathan, ha ganso dew kans gour ha hanter-kans.

³³A vebyon Elam, Yeshaia mab Gotholia, ha ganso deg gour ha tri ugens.

³⁴A vebyon Shefatia, Zerahia mab Mighael, ha ganso deg gour ha tri ugens.

³⁵A vebyon Yoab, Obadia mab Yehiel, ha ganso dew kans gour ha dewdhek.

³⁶A vebyon Bani, Shelomith mab Yosifia, ha ganso kans gour ha tri ugens. A vebyon Bebay, Zekaria mab Bebay ha ganso eth ugens gour.

³⁷A henedh Bebay, Zekaria mab Bebay, ha ganso eth gour warn ugens.

³⁸A vebyon Azgad, Yohanan mab Hakkatan, ha ganso kans gour ha deg.

³⁹A vebyon Adonikam, an diwettha re, ha'ga henwyn Elifelet, Yeuel, ha Shemaia ha gansa deg gour ha tri ugens.

⁴⁰A vebyon Bigvay, Uthay mab Istalkurus, ha gansa deg gour ha tri ugens.

⁴¹My a's kuntellas orth an avon henwys Theras, ha ni a gampyas ena tri dydh, ha my a's hwithras.

⁴²Pan na gevis ena nagonan a vebyon an oferysi nag an Levysi,

⁴³my a dhannvonas dhe Eliezar, Iduel, Maasmas,

⁴⁴Elnathan, Shemaia, Yarib, Nathan, Elnathan, Zekaria, ha Meshullam, o ledyoryon ha tus a gonvedhes,

⁴⁵my a leveris dhedha mayth ellens dhe Iddo, o penn yn tyller an dresorva,

⁴⁶ha my a worhemmynnis dhedha may lavarrens dhe Iddo ha dh'y vreder ha'n alhwedhoryon y'n tyller na, may tannvonnens gwer dhe servya avel oferysi yn chi agan Arloedh.

⁴⁷Ha dre leuv grev agan Arloedh i a dhros gwer sleygh a vebyon Mahli mab Levi, mab Ysrael, henn yw Sherebia gans y vebyon ha'y vroder, etek;

⁴⁸ynwedh Hashabia hag Annunus ha'y vroder Yeshaia a vebyon Hanania, ha'ga mebyon i, ugens gour;

⁴⁹hag a servysi an tempel, a wrussa Davydh ha'n ledyoryon aga ri rag servis an Levysi, ugens servyas ha dew kans; an rol a oll aga henwyn a veu diskwedhys.

⁵⁰Ena my a dos ti a benys rag oll an wer yowynk dherag an Arloedh 50 rag hwilas ganso vyaj siwen ragon ni agan honan ha rag agan fleghes ha'n chatel esa genen.

⁵¹Rag meth a'm bo a bysi dhiworth an myghtern troeslu ha marghoglu ha gwithysi dh'agan gwitha saw rag agan eskerens,

⁵²rag ni re lavarsa dhe'n myghtern, ‘Galloes agan Arloedh a vydh gans an re a'n hwila, hag a's skoedh yn pub fordh.’

⁵³Hag arta y pysyn ni a-dro dhe'n taklow ma ha ni a'n kavas fest tregeredhus.

⁵⁴Ena my a worras a-denewen dewdhek gour a ledyoryon an oferysi, Sherebia ha Hashabia, ha deg a'ga breder gansa,

⁵⁵ha my a boesas dhedha an arghans ha'n owr ha'n lestri sans a ji agan Arloedh, re rossa an myghtern y honan ha'y gonseloryon ha'n ugheloryon hag oll Ysrael.

⁵⁶My a boesas hag a ros dhedha hwegh kans talent ha hanter a arghans ha lestri a arghans kans talent aga talvosogeth, ha kans talent a owr,

⁵⁷hag ugens bolla a owr ha dewdhek lester a vrons fethus ow terlentri avel owr.

⁵⁸Hag yn-medhav dhedha, ‘Hwi yw sans dhe'n Arloedh, ha'n lestri yw sans, ha'n arghans ha'n owr yw ambosys dhe'n Arloedh gans ti, Arloedh agan tasow.

⁵⁹Bedhewgh war ha hewoel bys pan y's delivrowgh dhe ledyoryon an oferysi ha'n Levysi, ha dhe bennow chiow tasow Ysrael, yn Yerusalem, yn chambouryow chi an Arloedh.

⁶⁰Yndella an oferysi ha'n Levysi hag a gemmeras an arghans ha'n owr ha'n lestri re bia yn Yerusalem, a's dros dhe dempel an Arloedh.’

⁶¹Ni a asas an avon Theras yn dewdhegves dydh an kynsa mis; ha ni a dheuth yn Yerusalem dre leuv grev agan Arloedh, esa warnan; ev a'gan delivras dhiworth pub eskar war an fordh, ytho ni a dheuth dhe Yerusalem.

⁶²Wosa ni dhe vos ena tri dydh, an arghans ha'n owr a veu poesys ha dres yn chi agan Arloedh, dhe'n oferyas Meremoth mab Uria;

⁶³ganso yth esa Eleazar mab Finehas, ha gansa yth esa Yozabad mab Yeshua ha Moeth mab Binnuy, an Levysi.

⁶⁴An myns oll a veu komptys ha poesys, ha poes pup-tra a veu rekordys poran y'n termyn na.

⁶⁵Ha'n re re dhehwelsa a'n divroedh a offrynnas sakrifisow dhe'n Arloedh, Duw Ysrael, dewdhek tarow rag oll Ysrael, hwetek hordh ha peswar ugens,

⁶⁶dewdhek oen ha tri ugens, hag avel offrynn kres dewdhek bogh — oll avel sakrifis dhe'n Arloedh.

⁶⁷I a ros gorhemmynnow an myghtern dhe'n rennysi ryel ha dhe wovernours Kelesyria ha Fenikia; ha'n re ma a enoras an genedhel ha tempel an Arloedh.

⁶⁸Wosa an taklow ma dhe vos gwrys, an ledyoryon a dheuth dhymm hag a leveris dhymm,

⁶⁹‘Ny wrug kenedhel Ysrael, na'n rewloryon, na'n oferysi na'n Levysi omwitha yn tiblans dhiworth poblow estren an tir ha'ga flosedhes, an Kananysi, an Hittysi, an Perizzysi, an Yebusysi, an Moabysi, an Ejyptianys, ha'n Edomysi.

⁷⁰Rag i aga honan ha'ga mebyon re dhemmedhis myrghes an bobel ma, ha'n has sans re beu kemmyskys gans poblow estren an tir; hag a-dhia dhalleth an mater ma an ledyoryon ha'n ugheloryon re beu ow kevrenna y'n anlaghedh ma.’

⁷¹Kettell glewis an taklow ma my a skwardyas ow dillas ha'm mantell sans ha tenna ow blew a'm penn ha'm barv, hag esedha yn prederow hag ahwer.

⁷²Ha myns o bythkweth movys dre er an Arloedh a omguntellas a-dro dhymm, ha my ow kyni war an anlaghedh ma, owth esedha yn galar meur bys sakrifis an gorthugher.

⁷³Ena my a sevis a'm penys gans ow dillas ha'm mantell sans skwardys, ha war benn-dewlin my a ystynnas ow diwleuv dhe'n Arloedh,

⁷⁴ha leverel: 71 ‘A Arloedh, meth a'm beus ha penndegys ov dherag dha fas.

⁷⁵Rag agan peghosow re sevis ughella ages agan penn, ha'gan kammwriansow re sevis dhe'n nev

⁷⁶a-dhia dermynyow agan tasow, hag yth eson ni yn peghes meur bys y'n jydh ma.

⁷⁷Drefenn agan peghosow ha peghosow agan tasow, ni gans agan breder ha'gan myghternedh ha'gan oferysi a veu daskorrys dhe vyghternedh an norvys, dhe'n kledha ha dhe gethneth ha ravna ha meth bys y'n jydh ma.

⁷⁸Ha lemmyn, ass yw meur[3] an mersi re dheuth dhyn gansa, A Arloedh, rag gasa dhyn gwreydhenn ha hanow y'th tyller sans,

⁷⁹Ha rag diskudha golow yn chi an Arloedh agan Duw ha rag ri dhyn boes yn termyn agan kethneth.

⁸⁰Yn termyn agan kethneth hogen, nyns en forsakys gans agan Arloedh, mes ev a'gan dug yn favour gans myghternedh an Persianys, bys may rossons boes dhyn

⁸¹ha gormel tempel agan Arloedh, ha drehevel Sion dhiworth ynyalder dhe ri dhyn dinas yn Yudi hag yn Yerusalem.

⁸²‘Ha lemmyn, A Arloedh pandr'a leveryn, pan y'gan beus an taklow ma? Rag ni re gammdremenas yn-mes a'th worhemmynnow, a resys dhyn dre dha servysi an brofoesi, ow leverel,

⁸³“An tiredh mayth esowgh owth entra ynno rag y gemmeres yw tiredh defolys gans defolans alyons an tir, hag i re'n lenwis a'ga avlander.

⁸⁴Ytho lemmyn na rewgh agas myrghes yn demmedhyans dh'aga mebyon, ha na gemmerewgh aga myrghes rag agas mebyon hwi;

⁸⁵na hwilewgh bythkweth kavoes kres gansa, rag may fowgh krev ha dybri taklow da an tiredh ha'y asa rag eretons dh'agas fleghes bys vykken.”

⁸⁶Hag oll re hwarva dhyn re hwarva rag agan drog weythresow, ha'gan peghosow bras. 84 Rag ty, A Arloedh, re skavhas begh agan peghosow

⁸⁷hag a ros dhyn gwreydhenn a'n par ma; mes ni a dreylyas dhelergh arta dhe gammdremena erbynn dha lagha ow kemmyska gans avlander poblow an tir.

⁸⁸A nyns es serrys orthyn dh'agan diswul heb gasa gwreydhenn po hanow?

⁸⁹A Arloedh Ysrael, ty yw lel; rag ni yw gesys avel gwreydhenn dhe'n jydh hedhyw.

⁹⁰Mir, yth eson dheragos yn agan anewnderow, rag ny yllyn sevel na fella a-ragos drefenn an taklow ma.’

⁹¹Pan esa Ezra ow pysi hag ow konfessya, owth oela hag ev a'y wrowedh war an dor dherag an tempel, yth omguntellas a-dro dhodho routh vras a wer, benynes ha gwer yowynk a Yerusalem; rag yth esa oela meur yn mysk an routh.

⁹²Ena Shekania mab Yehiel, onan a wer Ysrael, a armas, hag a leveris dhe Ezra, ‘Ni re beghas erbynn an Arloedh, ha re dhemmedhis benynes estren a boblow an tir; mes lemmyn hogen yma govenek rag Ysrael.

⁹³Bedhes dhyn ti dhe'n Arloedh a-dro dhe hemma, may hworryn dhe-ves oll agan gwragedh estren gans aga fleghes,

⁹⁴dell hevel da dhis ha dhe oll hag a vydh gostydh dhe lagha an Arloedh.

⁹⁵Sav yn-bann ha gwra hemma, rag dha ober jy yth yw, hag yth eson genes dh'y wruthyl yn krev.’

⁹⁶Ena Ezra a sevis hag a wrug dhe ledyoryon an oferysi ha'n Levysi ti may hwrellens hemma. Hag i a dos ti dh'y wul.