Read Kernewek 1 Esdras 9 Bible Online

1 Esdras 9 - Kernewek bible

1 Esdras 9

¹Ena Ezra eth yn-mes hag yth eth dhiworth klos an tempel dhe jambour Yehohanan mab Elyashib,

²hag a spenas an nos ena; ha ny dhybris bara nag eva dowr, rag yth esa ev ow kyni war anewnderyow meur an routh.

³Ha gwarnyans a veu gwrys dre Yudi ha Yerusalem dhe oll re dhehwelsa a dhivroedh, dhe omguntell yn Yerusalem,

⁴ha seul na omguntellas ena a-ji dhe dhew dhydh potri, herwydh ervirans ledyoryon an henavogyon, y fia synsys aga chatel rag sakrifia ha'n wer aga honan a via tewlys yn-mes a routh an re re dhehwelsa a gethneth.

⁵Ena gwer loeth Yuda ha Benyamin a omguntellas yn Yerusalem a-ji dhe dri dydh, hemm o an nawves mis, yn ugensves dydh an mis.

⁶Oll an routh a esedhas y'n plen efan dherag an tempel, ow tegrena drefenn an hager-awel y'n eur na.

⁷Ena Ezra a sevis hag a leveris dhedha, ‘Hwi re dorras an lagha ha re dhemmedhis benynes estren, hag yndella hwi re voghhas pegh Ysrael.

⁸Ytho konfessiwgh lemmyn ha rewgh glori dhe'n Arloedh, Duw agan tasow,

⁹Ha gwrewgh herwydh y vodh; gwrewgh dibarth yntredhowgh hwi ha poblow an tir ha'gas gwragedh estren.’

¹⁰Ena oll an routh a armas hag a leveris gans lev ughel, ‘Ni a wra dell leversys.

¹¹Mes an routh yw bras ha gwav yw hi, ha ny yllyn ni sevel a-ves. Nyns yw hemma ober a yllyn y wul a-ji dhe unn jydh po dew, rag ni re beghas kemmys y'n taklow ma.

¹²Yndella trigens omma ledyoryon an routh; ha'n re usi yn agan trevow hag a's teves gwragedh estren, dens i y'n termyn apoyntys,

¹³gans an henavogyon ha breusysi a bub le, bys pan vyn ni rydhhes a gonnar an Arloedh y'n mater ma.’

¹⁴Yonathan mab Asahel ha Yahzia mab Tikva, a omgemmeras an dra herwydh an ambosow ma, ha Meshullam ha Levi ha Shabbethay a servyas gansa avel breusysi.

¹⁵Ha'n re dehwelys a dhivroedh a wre herwydh oll hemma.

¹⁶Ezra an oferyas a dhewisas ragdho y honan pennow chiow aga thasow, oll anedha orth aga hanow; hag yn loer nowydh an degves mis i a dhallathas hwithra an dra.

¹⁷Ha kenyow an wer a's tevo gwragedh estren a veu degys dhe dhiwedh yn loer nowydh an kynsa mis.

¹⁸A'n oferysi, an re a veu kuntellys war-barth hag a's tevo gwragedh estren, y feu:

¹⁹a mebyon Yeshua mab Yosedek ha'y vreder, Maaseya, Eliezar, ha Yodan.

²⁰I a ambosas may hworrens dhe-ves aga gwragedh estren, ha dhe offrynna hordhes avel prenedh a'ga hammwrians.

²¹A vebyon Immer: Hanani ha Zebadia ha Maaseya ha Shemaia ha Yehiel hag Azaria.

²²A vebyon Pashhur: Elyoenay, Maaseya, Yshmael, ha Nathanael, ha Gedalia, ha Salthas.

²³Hag a'n Levysi: Yozabad ha Shimei ha Kelita, ha Pethahia ha Yuda ha Yona.

²⁴A ganoryon an tempel: Elyashib ha Zakkur.

²⁵A'n borthoryon: Shallum ha Telem.

²⁶A Ysrael, a vebyon Parosh: Ramia, Yzzia, Malkia, Miyamin, hag Eleazar, hag Asibias, ha Benaya.

²⁷A vebyon Elam: Mattania ha Zekaria, Yezrielus hag Abdi, ha Yeremoth ha Elias.

²⁸A vebyon Zamoth: Elyadas Elyashib, Othonia, Yeremoth, ha Zabad ha Zerdaya.

²⁹A vebyon Bebay: Yehohanan ha Hanania ha Zabbay hag Emathis.

³⁰A vebyon Mani: Olamus, Mamuchus, Yedayos, Yashub, ha Sheal ha Yeremoth.

³¹A vebyon Addi: Naathus ha Moossias, Lakkunus ha Naydus, ha Beskaspasmys ha Sesthel, ha Balnuus ha Manasseas.

³²A vebyon Annan, Elionas hag Asayas ha Melkias ha Sabbayas ha Simon Kosameus.

³³A vebyon Hashum: Mattenay ha Mattatta ha Zabad hag Elifelet ha Manasse ha Shimei.

³⁴A vebyon Bani: Yeremias, Momdius, Maerus, Yoel, Mamday ha Pedias hag Anos, Karabasion hag Elyashib ha Mamnitanemus, Eliasis, Binnuy, Elialis, Shimei, Shelemia, Nethania. A vebyon Ezora: Shashay, Azarel, Azael, Samatus, Zambris, Yosep.

³⁵A vebyon Nooma: Mazitias, Zabad, Iddo, Yoel, Benaya,

³⁶Oll an re ma re dhemmedhsa gwragedh estren, hag i a's gorras dhe-ves war-barth ha'ga fleghes.

³⁷Yth esa an oferysi ha'n Levysi ha pobel Ysrael trigys yn Yerusalem hag y'n pow. Yn loer nowydh an seythves mis, pan esa pobel Ysrael yn aga threvesigethow,

³⁸ha'n routh oll o omguntellys gans unn akord y'n plen ledan dherag yet an howlsedhes a'n tempel,

³⁹i a leveris dhe Ezra an arghoferyas ha lenner may trolla lagha Moyses re beu res gans an Arloedh, Duw Ysrael.

⁴⁰Yndella an arghoferyas a dhros an lagha, rag oll an routh, gwer, benynes, hag oll an oferysi may klewens an lagha, yn loer nowydh an seythves mis.

⁴¹Ev a lennas y'n plen ledan dherag yet an tempel a-dhia'n bora bys hanter-dydh yn mysk keffrys gwer ha benynes; hag oll an routh a attendyas an lagha.

⁴²Ezra an oferyas ha lenner an lagha a sevis war an vynk a brenn re bia pareusys,

⁴³ha rybdho y sevis Mattathia, Shema, Anania, Azaria, Uria, Hezekia ha Baalsamus a-dhyghowbarth,

⁴⁴hag a-gledhbarth Pedaya, Mishael, Malkiya, Lothasubus, Nabaria, ha Zekaria.

⁴⁵Ena Ezra a gemmeras lyver an lagha yn golok an routh, rag ev a'n jevo an tyller a enor a-ragdha i oll.

⁴⁶Pan igoras an lagha i oll a sevis a'ga sav, hag Ezra a vennigas an Arloedh, ughella Duw, Duw an luyow, an Ollgalloesek,

⁴⁷ha'n routh oll a worthybis, ‘Amen.’ I a dhrehevis aga diwleuv, hag a goedhas dhe'n dor hag a wormolas an Arloedh.

⁴⁸Yeshua hag Anniuth ha Sherabia, Yadinus, Akkub, Shabbethay, Hodia, Mayannas ha Kelita, Azaria ha Yozabad, Hanan, Pelaya, an Levysi, a dhyskas lagha an Arloedh, yn kettermyn ow tisplegya an pyth a veu lennys.

⁴⁹Ena Attharates a leveris dhe Ezra an arghoferyas ha lenner, ha dhe'n Levysi esa ow tyski an routh, ha dhe oll,

⁵⁰‘An jydh ma yw sans dhe'n Arloedh’ — lemmyn yth esa oll owth oela dell glewens an lagha —

⁵¹‘ytho kewgh war agas fordh, dybrewgh an blonek hag evewgh an taklow hweg, ha dannvenewgh rannow dhe'n re na's teves travyth;

⁵²rag an jydh yw sans dhe'n Arloedh; ha na vedhewgh trist, rag an Arloedh a'gas ughelha.’

⁵³An Levysi a worhemmynnis dhe'n bobel, ow leverel, ‘An jydh ma yw sans, na vedhewgh trist.’

⁵⁴Ena oll eth war aga fordh, dhe dhybri hag eva ha lowenhe, ha dhe ri rannow dhe'n re na's tevo travyth, ha dhe wul lowender meur;

⁵⁵rag ynspirys vons gans an geryow re bia dyskys dhedha. Hag i a omguntellas war-barth.