Read Kernewek Tobit 1 Bible Online

Tobit 1 - Kernewek bible

Tobit 1

¹Lyver oberow Tobit, mab Tobiel, mab Ananiel, mab Aduel, mab Gabael, a has Asiel ha loeth Naftali,[1]

²neb a veu kemmerys yn kethneth yn dydhyow Shalmaneser myghtern Assyria, a-dhiworth Thisbe, usi a'n dhyghowbarth dhe Kedesh Naftali yn Galile a-ugh Asher.

³My, Tobit, a gerdhi yn fordhow gwirder hag ewnder dydhyow oll ow bewnans, ha my a wrug lies ober alusenek dhe'm breder ha'm kenedhel hag eth genev dhe bow Assyria, dhe Nineve.

⁴Lemmyn pan esen vy y'm pow ow honan, yn pow Ysrael, ha my hwath den yowynk, an loeth kowal a Naftali ow ragdas a gilfias a'n chi a Yerusalem. Hemm o an tyller re bia dewisys mes a oll loethow Ysrael, le may tela oll an loethow sakrifia ha le may feu sakrys ha fondys tempel trigva an Ughella rag pub henedh bys vykken.

⁵Oll an loethow hag a junyas an negedhses a wre sakrifia dhe'n leugh Baal, par dell wre ynwedh chi Naftali ow thas.

⁶Mes my e ow honan yn fenowgh dhe Yerusalem rag an goelyow, dell yw ordenys rag Ysrael oll der arghadow bys vykken, ow kemmeres kynsa froeth ha degedhow ow askorr ha'n kynsa knyvyansow; my a re an re ma dhe'n oferysi, mebyon Aron, orth an alter.

⁷A'm askorr oll my a re unn degves rann dhe vebyon Levi a venystra yn Yerusalem; an nessa degves my a werthi, ha my a wre mos ha spena an budh pub blydhen yn Yerusalem;

⁸an tressa degves my a re dhe'n re may koedha dhedha ow dever, dell worhemmynnis dhymm Debora, mamm ow thas, drefenn ow bos gesys omdhivas gans ow thas.

⁹Devedhys dhe wourses, ev a dhemmedhis Anna, esel agan teylu, ha dredhi my a dheuth ha bos tas Tobias.

¹⁰Lemmyn pan veuv degys dhe-ves yn kethneth dhe Nineve, ow breder oll ha'm neskerens a dhybris boes an Jentilys;

¹¹mes my ow honan a omwithas rag y dhybri,

¹²drefenn my dhe brederi a Dhuw gans leun golonn.

¹³Ena an Ughella a ros dhymm faverans ha fisment da a wel dhe Shalmaneser, ha my o y brener a broviansow.

¹⁴Yndella, my a wre mos bys yn Media, hag unnweyth dhe Rages yn Media my a asas deg talent a arghans yn trest gans Gabael, broder Gabrias.

¹⁵Mes pan verwis Shalmaneser, Sennagherib y vab a reynyas yn y le; yn-danno an fordhow o deantell, ma na yllyn mos na fella yn Media.

¹⁶Yn dydhyow Shalmaneser my a wrug lies ober alusenek dhe'm breder.

¹⁷My a re ow bara dhe'n re nownek ha'm dillas dhe'n re noeth; ha mar kwelyn nebonan a'm kenedhel marow ha tewlys a-ves a-dryv fosow Nineve, my a'n ynkleudhya.

¹⁸Ha Sennagherib an myghtern, mar korras dhe'n mernans neb a dheuth ow fia a-dhiworth Yudi, my a's ynkleudhyas yn-dann gel. Rag yn y sorr ev a worras lies huni dhe'n mernans. Pan veu hwilys an korfow gans an myghtern, ny vons diskudhys.

¹⁹Ena onan a dus Nineve eth ha meneges dhe'n myghtern a-dro dhymm, my dh'aga ynkleudhyas; ytho my a omgudhas. Pan dhyskis i dhe vos orth ow hwilas rag bos gorrys dhe'n mernans, my a fias yn own.

²⁰Ena pup-tra a veu dhymm a veu kemmerys a-dhiworthiv, ha nyns esa travyth gesys dhymm marnas ow gwreg Anna ha'm mab Tobias.

²¹Mes le es hanter-kans dydh a dremenas kyns dew a vebyon Sennagherib dh'y ladha, hag i a fias dhe venydhyow Ararat. Ena Esarhaddon, y vab, a reynyas yn y le; hag ev a settyas Ahikar, mab ow broder Anael, dres akontow oll y wlaskor ha dres y venystrans oll.

²²Ahikar a bysis a'm govis, ha my a dhehwelis dhe Nineve. Lemmyn, Ahikar o hanafor, gwithyas an bysow-sel, menystrer hag akontydh, neb a wrussa Esarhaddon y ordena nessa dhodho y honan. Ev o ow noy.