Read Kernewek Tobit 11 Bible Online

Tobit 11 - Kernewek bible

Tobit 11

¹Wosa hemma Tobias eth war y hyns, ow kormel Duw drefenn ev dhe wul siwen y vyaj. Hag ev a vennigas Raguel ha'y wreg Edna. Yndellma ev a besyas mos war y vyaj bys pan dheuthons nes dhe Nineve.

²Ena Rafael a leveris dhe Tobias, ‘A ny wodhes, broder, fatell essys dha das?

³Gwren poenya yn-rag a-dherag dha wreg ha pareusi an chi.

⁴Ha kemmer bystel an pysk y'th leuv.’ Ytho i a holyas aga hyns, ha'n ki eth war aga lergh.

⁵Lemmyn Anna o esedhys ow mires a-dro rag gweles hy mab war an fordh.

⁶Ha hi a'n aswonnis, hag ev ow tos, ha leverel dh'y das, ‘Ottomma dha vab ow tos, keffrys ha'n den neb eth ganso!’

⁷Rafael a leveris, ‘My a woer, Tobias, y hwra dha das igeri y dhewlagas.

⁸Res vydh dhis ytho elia y dhewlagas gans an vystel; ha pan loesons ev a's rut hag a wra dhe'n kennennow gwynn koedha a-ves, hag ev a wra dha weles.’

⁹Ena Anna a boenyas dhe vetya gansa, ha koedha war gonna hy mab, ha leverel dhodho, ‘My re'th welas, ow mab; alemma rag parys ov dhe verwel.’ Hag i a dhagrewis aga dew.

¹⁰Tobit a dhallathas mos war-tu ha'n daras, ha trebuchya. Mes y vab a boenyas dhodho

¹¹ha dalghenna y das, hag ev a skoellyas an vystel war dhewlagas y das, ow leverel, ‘Bydh kolonnek, tas.’

¹²Ha pan dhallathas y dhewlagas dhe loesa ev a's rutyas, ha'n gwynnennow a veu pilys a gornellow y dhewlagas.

¹³Ena ev a welas y vab ha koedha war y gonna hag ev a dhagrewis ha leverel,

¹⁴‘Bennigys osta a Dhuw, ha bennigys yw dha hanow bys vykken, ha bennigys yw oll dha eledh sans; Rag ty a'm skorjyas, mes ty a gemmeras truedh ahanav; otta, my a wel ow mab Tobias!’

¹⁵Ha'y vab eth a-ji yn unn lowenhe, hag ev a dherivas dh'y das an traow meur o hwarvedhys dhodho yn Media.

¹⁶Ena Tobit eth dhe vetya gans y wohydh dhe yet Nineve, ow lowenhe hag ow kormel Duw. An re a'n gwelas dell eth a's tevo marth drefenn bos golok dhodho. Ha Tobit a wodhva gras a-ragdha bos Duw truedhek dhodho.

¹⁷Pan nesas Tobit dhe Sara y wohydh, ev a's bennigas, ow leverel, ‘Wolkomm, myrgh! Bennigys yw Duw re'th tros dhyn, ha bennigys yw dha das ha'th vamm.’

¹⁸Yndellma yth esa heudhder yn mysk y vreder oll yn Nineve.

¹⁹Ahikar ha'y noy Nadab a dheuth, ha demmedhyans Tobias a veu solempnys seyth dydh gans lowender meur.