Read Kernewek Tobit 12 Bible Online

Tobit 12 - Kernewek bible

Tobit 12

¹Ena Tobit a elwis y vab Tobias ha leverel dhodho, ‘Ow mab, dyght gobrow an den neb eth genes; hag y tal bos res moy dhodho.’

²Ev a worthybis, ‘Tas, ny wrussa ow aperya mar rollen dhodho an hanter a'n pyth a dhres vy tre.

³Rag ev a'm dros dhis yn saw, ev a yaghhas ow gwreg, ev a gavas an arghans ragov vy, hag ev a'th yaghhas jy ynwedh.’

⁴An den koth a leveris, ‘Ev a'n dendilas.’

⁵Ytho ev a elwis an el ha leverel dhodho, ‘Kemmer an hanter a beub re dresowgh.’

⁶Ena ev a's gelwis aga dew yn privedh ha leverel dhedha: ‘Bennigewgh Duw ha ri grasyans dhodho; gwra y meurhe ha godhvos gras dhodho a-rag an re vew oll, drefenn an pyth a wrug ragowgh. Da yw benniga Duw hag ughelhe y hanow, yn enor ow tisplegya oberow Duw. Na vedhewgh lent dhe rassa dhodho.

⁷Da yw kudha kevrin myghtern, mes diskudha yn splann oberow Duw. Gwrewgh dader, ha ny wra drogedh agas kavoes.

⁸Pysadow yw da keveylys gans penys hag alusen hag ewnhynseth. Boghes gans ewnhynseth yw gwell ages meur gans drogober. Gwell yw ri alusenow ages kuntell owr.

⁹Rag alusen a lyver a vernans, hag y hwra kartha pub pegh dhe-ves. An re a wra gwryth cherita hag ewnhynseth a's tevydh leunder a vewnans;

¹⁰mes an re a begh hag a wra anlaghedh yw eskerens aga bewnans aga honan.

¹¹‘Ny vynnav keles travyth a-dhiworthowgh. My re leveris, “Da yw kudha kevrin myghtern, mes diskudha yn splann oberow Duw.”

¹²Ha lemmyn, ty ha'th wohydh Sara pan byssowgh, my a dhros kovheans a'gas pysadow a-rag an Sans; ha pan ynkleudhsowgh an re varow, keffrys yth esen genowgh.

¹³Pan na hoksys dhe sevel ha gasa dha ginyow rag mos ha maylya an den marow, ny veu kelys ahanav dha ober mas, mes yth esen genes.

¹⁴Lemmyn Duw a'm dannvonas dhe'th yaghhe, ty ha'th wohydh Sara.

¹⁵My yw Rafael, onan a'n seyth el sans a dhre pysadow an syns yn-bann ha mos a-dherag golewder an Sans.’

¹⁶Aga dew o fest troblys; hag i a goedhas war aga fas, rag own a's teva.

¹⁷Mes ev a leveris dhedha, ‘Na vydhowgh ownek; kres re'gas bo! Gormelewgh Duw bys vykken.

¹⁸Rag ny dheuth vy avel favour a'm parth vy, mes dre vodh agan Duw. Ytho gormelewgh ev bys vykken.

¹⁹Oll an dydhyow ma ny wren marnas omdhiskwedhes dhis, ha ny dhybris nag eva, mes hwi a welewgh gwelesigeth.

²⁰Ha lemmyn gwra godhvos gras dhe Dhuw, rag my a yskynn dhe neb a'm dannvonas. Skrif yn lyver pup-tra re hwarva.’

²¹Ena i a sevis; mes ny'n gwelsons namoy.

²²Ytho i a avowas oberow meur ha marthys Duw, ha fatell omdhiskwedhas dhedha el an Arloedh.