Read Kernewek Tobit 13 Bible Online

Tobit 13 - Kernewek bible

Tobit 13

¹Ena Tobit a skrifas pysadow a heudhder, ha leverel:

²‘Bennigys yw Duw a vew bys vykken, ha'y wlaskor, rag ev a skorj, hag ev a dhiskwedh tregeredh; ev a hembronk yn-nans dhe ifarn hag ev a dhre yn-bann, ha nyns eus denvyth a yll diank a'y leuv.

³Gwra y aswonn a-rag an kenedhlow, a vebyon Ysrael, rag ev re'gan skattras yntredha.

⁴Gwra dh'y veurder bos aswonnys ena, ha'y ughelhe yn golok pup-tra vew; drefenn y vos agan Arloedh ha Duw, ev yw agan Tas bys vykken.

⁵Ev a wra agan skorjya rag agan kammweythresow; hag arta ev a wra diskwedhes tregeredh, ha'gan kuntell a'n kenedhlow oll may fewgh skattrys.

⁶Mar treylyowgh dhodho a leun golonn hag a leun enev, ow kul an pyth yw gwir a-dheragdho, ena ev a wra treylya dhywgh ha ny wra ev kudha y fas ahanowgh.

⁷Mes mirewgh orth an pyth a wra ev gul genowgh; godhvydhewgh gras dhodho a leun lev. Gormelewgh an Arloedh a ewnder, hag ughelhe Myghtern an oesow.

⁸My a woer gras dhodho yn tir ow hethneth, ha my a dhiskwedh y nerth ha meuredh dhe genedhel a beghadoryon. Kildreylyewgh, hwi beghadoryon, ha gwrewgh ewnder a-dheragdho; piw a woer mara's degemmer ha kemmeres tregeredh warnowgh?

⁹My a ughelha ow Duw; ow enev a ughelha an Myghtern a nev, hag a lowenha yn y veuredh.

¹⁰Kewses tus oll, ha godhvos gras dhodho yn Yerusalem. A Yerusalem, an sita sans, ev a'th skorj rag oberow dha vebyon, mes arta ev a gemmer truedh a vebyon an re wiryon.

¹¹Godhvydh gras yn wordhi dhe'n Arloedh, ha gormel Myghtern an oesow may fo drehevys y dylda ragos arta gans lowena.

¹²Re lowenhaho ynnos an re yw kethyon, ha kara ynnos an re yw grevys, dhe oll an henedhow bys vykken.

¹³Lies kenedhel a dheu a bellder dhe hanow an Arloedh Duw, ow toen rohow yn agan dorn, rohow rag an Myghtern a nev. Henedhow a henedhow a re dhis gormel lowenek.

¹⁴Mollothek yw oll an re a'th kas; bennigys bys vykken vydh oll a'th kar.

¹⁵Lowenha ha bydh heudhik rag mebyon an re wiryon; rag i a vydh kuntellys war-barth, hag a wormel Arloedh an re wiryon. Gwynn aga bys an re a'th kar! I a lowenha y'th kres.

¹⁶Gwynn aga bys an re a dhuwenas drefenn dha alarow; rag i a lowenha warnas ow kweles dha wolewder oll, hag i a vydh heudhhes bys vykken. Re wormello ow enev Duw an Myghtern meur.

¹⁷Rag Yerusalem a vydh drehevys yn saffir ha gwyrven, dha fosow yn meyn drudh, ha'n touryow ha'n gorthfosow yn owr pur; Ha stretow Yerusalem a vydh gorhudhys gans meyn a veryl ha rubi, ha meyn a owr dhiworth Ofir.

¹⁸Hy bownderyow oll a lever Halleluya! ha kanmel, ow leverel, “Bennigys yw Duw, re'th ughelhas bys vykken.” ’