Read Kernewek Tobit 14 Bible Online

Tobit 14 - Kernewek bible

Tobit 14

¹Omma Tobit a worfennas y eryow a wormola.

²Ev a'n jeva eth bloedh ha dew-ugens pan gollas y wolok, ha wosa eth blydhen ev a's daskavas. Ev a ros alusenow, ha pesya kemmeres own a'n Arloedh Duw ha'y wormel.

³Pan veu tevys pur goth, ev a elwis y vab ha'y vebyon-wynn, ha leverel dhodho, ‘Ow mab, kemmer dha vebyon; mir, tevys koth ov vy ha parys ov dhe dhiberth a'n bewnans ma.

⁴Ke dhe Media, ow mab, rag my a leun grys an pyth a leveris Yona an profoes a-dro dhe Nineve, may fydh domhwelys. Mes yn Media y fydh kres rag termyn. Agan breder a vydh skattrys y'n norvys a-dhiworth an tir da, ha Yerusalem a vydh ynyal. Chi Duw ynni a vydh leskys ha magor rag termyn.

⁵Mes Duw a wra kemmeres truedh anedha arta, ha'ga hyrghes arta a-ji dhe'n tir; hag i a dhrehav an chi, kyn na vydh haval dhe'n kynsa bys pan vydh gorfennys termynyow an oes. Wosa hemma i a dhehwel a dylleryow aga hethneth, hag i a drehav Yerusalem yn splannder. Ha chi Duw a vydh drehevys ena gans drehevyans gloryus rag oll an henedhow bys vykken, poran par dell leveris an brofoesi.

⁶Ena oll an Jentilys a wra treylya dhe berthi own a'n Arloedh Duw yn gwiryonedh, hag ynkleudhyas aga idolyow.

⁷Oll an Jentilys a wra gormel an Arloedh ha'y bobel a wra godhvos gras dhe Dhuw, ha'n Arloedh a wra ughelhe y bobel. Ha peub a gar an Arloedh Duw yn gwirder hag ewnder a lowenha, ow tiskwedhes tregeredh dh'agan breder.

⁸‘Ytho lemmyn, ow mab, omdenn dhiworth Nineve, drefenn y hwyrvydh yn sur an pyth a leveris an profoes Yona.

⁹Mes gwith an lagha ha'n gorhemmynnow, ha bydh tregeredhus hag ewnhynsek, may fo da genes. Ynkleudh vy yn ta, ha'th vamm genev. Ha na drig unn nos na fella yn Nineve.

¹⁰Mir, ow mab, orth an pyth a wrug Nadab dhe Ahikar a'n magas, fatell y'n dros a wolow dhe dewlder, ha gans pyth yth attylis dhodho. Mes Ahikar a veu selwys ha Nadab a dhegemmeras attal, ow tiyskynna ev y honan y'n tewlder. Ahikar[4] a ros alusenow ha diank an vaglenn marwel re settyas Nadab ragdho; mes Nadab a goedhas y'n vaglenn ha merwel.

¹¹‘Ytho lemmyn, ow fleghes, prederewgh a'n pyth a wra alusen ha'n pyth yw delivrys gans ewnder.’ Dell leveris hemma ev a verwis yn y weli. Ev a'n jeva kans etek ha dew-ugens bloedh; ha Tobias a'n ynkleudhyas gans enor.

¹²Ha pan verwis Anna ev a's ynkleudhyas gans y das. Ena Tobias eth dhe-ves gans y wreg ha'y vebyon dhe Ekbatana, dhe Raguel y hwegron.

¹³Ev a gothhas gans enor, hag ev a ros dh'y hwegron ha'y hweger ynkleudhyansow marthys. Ev a heryas aga substans, ha henna a'y das Tobit.

¹⁴Ev a verwis yn Ekbatana yn Media dhe kans ha seyth bloedh warn ugens.

¹⁵Mes kyns es merwel ev a glewas a dhistruyans Nineve, re bia kemmerys gans Nebukadnessar hag Ahasuerus. Kyns y vernans ev a lowenhas a-dro dhe Nineve.