Read Kernewek Tobit 3 Bible Online

Tobit 3 - Kernewek bible

Tobit 3

¹Ena y'm anken my a oelas, ha pysi yn angoes, ow leverel,

²‘Gwiryon os ta, A Arloedh; oll dha wriansow yw ewn; oll dha fordhow yw tregeredh ha gwirder, ha ty a wra gwirvreus hag ewnder bys vykken.

³Porth kov ahanav ha mir warnav; na'm kessydh drefenn ow feghosow ha'm treuspassow anwodhvedhys, ha'n re a veu gwrys a-ragos gans ow thasow.

⁴Rag i a skonyas a woslowes orth dha worhemmynnow, ha ty a'gan ros dhe bylla, kethneth, ha mernans; ty a'gan gwrug avel ensampel a geredh yn mysk oll an kenedhlow may feun skattrys.

⁵Ha lemmyn dha lies barn yw gwir, orth ow dyghtya war-lergh ow feghosow vy ha re ow thasow, drefenn na withsyn dha worhemmynnow na kerdhes yn gwirder a-ragos.

⁶Ha lemmyn dyght vy herwydh dha blesour; gorhemmynn ow spyrys dhe vos kemmerys yn-bann, may fydhav livrys ha dos ha bos dor. Rag gwell yw dhymm merwel ages bewa, drefenn my dhe glewes fals keredhyow, ha meur yw an duwon ynnov. Gorhemmynn may fiv livrys a'm galar dhe vos dhe'n drigva heb diwedh; na dreyl dha fas ahanav.’

⁷Y'n keth jydh na, y hwarva ynwedh, Sara myrgh Raguel, a Ekbatana yn Media, dhe vos keredhys gans maghtethyon hy thas,

⁸drefenn hi dhe vos res dhe seyth gour, ha'n tebel jevan Asmodeus dhe ladha peub anedha kyns i dhe vos gensi avel gwreg. Yndella an maghtethyon a leveris dhedhi, ‘A ny gonvedhydh ty dhe daga dha wer? Ty a' feu seyth anedha seulabrys ha ny' feu prow a nagonan anedha.

⁹Prag y'gan skorjydh? Marow mars yns, ke gansa! Gwaytyn na wellyn bythkweth mab na myrgh ahanas!’

¹⁰Wosa klewes an traow ma, hi o grevys meur, bys yn preder a omgregi. Mes hi a leveris, ‘Unn vyrgh ow thas ov vy; mar kwrav hemma, y fydh meth dhodho, ha my a dhre y gothni yn ahwer dhe'n bedh.’

¹¹Ytho hi a bysis troha'n fenester ha leverel, ‘Bennigys os ta, A Arloedh ow Duw, ha bennigys yw dha hanow sans hag enorys bys vykken. Re'th wormello oll dha oberow bys vykken.

¹²Ha lemmyn, A Arloedh, my re dreylyas ow dewlagas ha'm fas war-tu ha ty.

¹³Gorhemmynn may fiv livrys a'n bys, ha ma na glewiv keredh namoy.

¹⁴Ty a woer, A Arloedh, ow bos glan a oll peghes gans gour,

¹⁵ha ny vostis ow hanow na hanow ow thas yn tir ow hethneth. Unn vyrgh ow thas ov vy, ha ny'n jeves flogh dhe vos y her, na neskar, na mab neskar may tal dhymm omwitha ragdho avel gwreg. Seulabrys seyth gour ahanav yw marow. Prag y res dhymm bewa? Mes mar nyns yw plegadow dhis kemmeres ow bewnans, gorhemmynn may fo revrons diskwedhys dhymm ha may fo truedh kemmerys ahanav, ha ma na glewiv keredh namoy.’

¹⁶Pysadow aga dew a veu klewys a-rag golewder Duw.

¹⁷Ha Rafael a veu dannvenys dh'aga yaghhe aga dew: dhe bilya an gwynnennow a-dhiworth dewlagas Tobit; dhe ri Sara myrgh Raguel yn demmedhyans gans Tobias mab Tobit, ha dhe gelmi Asmodeus an tebel jevan, rag y koedhas dhe Tobias an gwir dh'y havoes dre eretons. Dhe'n keth pols na Tobit a dhehwelis hag entra a-berth yn y ji, ha Sara myrgh Raguel a dhiyskynnas a'y stevell y'n soler.