Read Kernewek Tobit 4 Bible Online

Tobit 4 - Kernewek bible

Tobit 4

¹Y'n jydh na Tobit a borthas kov a'n arghans re assa yn trest gans Gabael yn Rages a Media;

²hag y leveris dh'y honan, ‘My re wovynnas mernans. Prag na alwav ow mab Tobias may hylliv styrya dhodho a-dro dhe'n arghans kyns my dhe verwel?’

³Ytho ev a'n gelwis ha leverel, ‘Ow mab, pan varwav, ynkleudh vy, ha na wra fyllel gwitha dha vamm. Gwra hy enora oll dydhyow dha vewnans; gwra an pyth yw plegadow dhedhi; ha na wra hy duwena.

⁴Porth kov, ow mab, hi dhe weles lies peryll a'th wovis ha ty hwath yn hy thorr. Pan verow, ynkleudh hi rybov y'n keth bedh.

⁵‘Porth kov a'n Arloedh Duw oll dha dhydhyow, ow mab, ha nagh pegha ha gul treuspass erbynn y worhemmynnow. Byw yn ewnhynsek oll dydhyow dha vewnans, ha na gerdh yn fordhow kammweythres.

⁶Rag mar kwredh an pyth yw gwir, dha fordhow a wra siweni dre dha oberow.

⁷Ro alusenow a'th pythow dhe'n re a vew yn ewnhynsek, ha na vo dha lagas avius orth an ro pan y'n gwredh. Na dreyl dha fas a-dhiworth den boghosek pynag, ha ny vydh fas Duw treylys a-dhiworthis.

⁸Mara'th eus meur a bythow, ro dha alusenow yn kemusur; mars yns boghes, na gemmer own a ri alusenow herwydh an myns a'th eus.

⁹Yndella ty a guntell tresor da dhis dha honan erbynn dydh anken.

¹⁰Rag alusen a liver a-dhiworth mernans hag a'th with rag entra y'n tewlder;

¹¹ha rag peub a re alusen, offrynn da yw yn golok an Ughella.

¹²‘Bydh war, ow mab, a bub anvaseth. Kyns oll kemmer gwreg a-dhiworth diyskynnysi dha dasow; na gemmer benyn estren, nag usi a loeth dha das. Rag mebyon an brofoesi on ni, Noy, Abraham, Ysak, ha Yakob, agan tasow a-henys. Porth kov, ow mab, i oll dhe gemmeres gwragedh mes a'ga neshevin ha bennigys vons yn aga fleghes; ha'ga has a wra herya an tir.

¹³Ytho lemmyn, ow mab, kar dha vreder, hag y'th kolonn na wra dibrisya dha vreder ha mebyon ha myrghes dha bobel dre nagha kemmeres gwreg dhis anedha. Rag yn goeth yma distruyans ha deray meur; hag yn sygerneth yma koll ha boghosogneth veur, drefenn bos sygerneth mamm divoetter.

¹⁴‘Na with dres nos arveth den pynag a oberro ragos, mes pe dhodho distowgh; ha mar servydh Duw ty a dhegemmer pygans. Omwith, ow mab, yn pup-tra a wredh, ha bydh dyskyblys y'th fara oll.

¹⁵Ha'n pyth a gesydh, na'n gwra dhe dhenvyth. Na wra eva gwin bys yn medhwenep, na gasa medhwenep dhe vones genes war dha fordh.

¹⁶Ro rann a'th vara dhe'n den nownek, hag a'th tillas dhe'n re noeth. Ro dha worlanwes oll yn alusen ha na as dha lagas dhe vos avius a'n ro pan y'n gwredh.

¹⁷Gorr dha vara war vedh an re ewnhynsek mes na ro travyth dhe beghadoryon.

¹⁸Hwila kusul a bub den fur mes na dhispres kusul dalvosek vytholl.

¹⁹Bennik an Arloedh Duw pub treveth; govynn orto may fo ewn dha fordhow, ha may siwenno dha hynsyow ha'th towlow oll. Rag ny's teves nagonan a'n kenedhlow konvedhes; mes an Arloedh y honan a re pub tra dha, ha herwydh y vodh ev a uvelha piwpynag a vynno. Ytho lemmyn, ow mab, porth kov a'm gorhemmynnow ha na as i dhe vos gorrys mes a'th vrys.

²⁰‘Ha lemmyn, ow mab, my a dhiskwedh dhis a-dro dhe'n deg talent a arghans hag a esis gans Gabael mab Gabrias yn Rages a Media.

²¹Na borth own, ow mab, drefenn agan bos devedhys boghosek. Ty a'th eus golusogneth veur mar berthydh own a Dhuw hag omwitha rag pub pegh ha gul an pyth yw plegadow yn y wolok.’