Read Kernewek Tobit 7 Bible Online

Tobit 7 - Kernewek bible

Tobit 7

¹Pan dhrehedhsons Ekbatana ha dos dhe ji Raguel, Sara a vetyas gansa ha'ga salusi. I a dhaskorras hy salusyans, ha hi a's dros a-berth y'n chi.

²Ena Raguel a leveris dh'y wreg Edna, ‘Ass yw haval an den yowynk dhe'm kenderow Tobit!’

³Ha Raguel a wovynnas orta, ‘A by le owgh, breder?’ I a worthybis dhodho, ‘A vebyon Naftali, an re yw kethyon yn Nineve.’

⁴Ena ev a leveris dhedha, ‘A aswonnowgh agan broder Tobit?’ Hag i a leveris, ‘Aswonnyn.’

⁵Ev a wovynnas, ‘Usi ev yn yeghes da?’ I a worthybis, ‘Yma ev yn few hag yn yeghes da.’ Ha Tobias a leveris, ‘Ow thas yw ev.’

⁶Ena Raguel a lemmis yn-bann hag amma dhodho hag oela. Hag ev a'n bennigas ha leverel, ‘Mab an den nobyl ha mas na!’ Pan glewas Tobit dhe gelli y wolok, trist veu, hag ev a oelas.

⁷Y wreg Edna ha'y vyrgh Sara a oelas ynwedh. I a's degemmeras fest yn kolonnek;

⁸hag i a ladhas hordh a'n flokk ha settya platasow meur a voes a-dheragdha.

⁹Ena Tobias a leveris dhe Rafael, ‘Broder Azarias, kows a'n traow na may kewssys anedha war an vyaj, ha gas an mater dhe vos ervirys.’

¹⁰Ytho ev a geskomunyas an kynnik dhe Raguel. Ha Raguel a leveris dhe Tobias, ‘Deber hag yv, ha bydh lowenek; rag yth yw dha wir dhe gemmeres ow flogh. Mes my a styr dhis an gwirder.

¹¹My re ros ow myrgh dhe seyth gour, mes pan dheuth peub anedha dhedhi ev a verwis y'n nos. Mes rag lemmyn bydh lowenek.’

¹²Ha Tobias a leveris, ‘Ny dhebrav travyth bys pan wredh kevambos fyrv genev.’ Ytho Raguel a leveris, ‘Kemmer hi distowgh, herwydh an lagha. Ty yw hy neskar ha dhiso ji yw hi. An Duw tregeredhus a re dhywgh agas dew siwena rag an gwella.’

¹³Ena ev a elwis y vyrgh Sara, hag orth hy hemmeres er an dhorn ev a's ros dhe Tobias dhe vos y wreg, ow leverel, ‘Awotta, kemmer hi herwydh lagha Moyses, ha kemmer hi genes dhe'th tas.’ Hag ev a's bennigas.

¹⁴Ena ev a elwis y wreg Edna, ha kemmeres rol-skrifa ha skrifa an ambos; hag i a settyas aga sel dhodho.

¹⁵Ena i a dhallathas dybri.

¹⁶Ena Raguel a elwis y wreg Edna ha leverel dhedhi, ‘Hwoer, gwra pareusi an stevell arall ha kemmer hi a-berth ynno.’

¹⁷Hi eth ha pareusi an gweli y'n chambour, dell lavarsa dhedhi, ha'y ledya ena, ha oela ragdha. Ena hi a syghas hy dagrow ha leverel dhedhi,

¹⁸‘Bydh kolonnek, ow myrgh; an Arloedh a nev ha nor re wrontyo lowena dhis yn le dha dhuwon ma. Bydh kolonnek ow myrgh.’