Read Kernewek Tobit 8 Bible Online

Tobit 8 - Kernewek bible

Tobit 8

¹Wosa i dhe worfenna dybri, i a ledyas Tobias a-ji dhedhi.

²Ha dell esa ow mos, ev a borthas kov a eryow Rafael, hag ev a gemmeras an regydh a ynkys ha gorra warnedha rann kolonn hag avi an pysk ha gul mog.

³Ha pan vlasas an jevan an ethenn, ev a fias dhe'n pella rann a Ejyp, ha'n el a'n kolmas.

⁴Pan veu aga dew degeys a-ji war-barth, Tobias a sevis a'n gweli ha leverel, ‘Hwoer, sav, ha pysyn may kemmerro an Arloedh tregeredh warnan.’

⁵Ha Tobias a dhallathas leverel, ‘Bennigys osta, a Dhuw agan tasow, ha bennigys yw dha hanow sans ha gloryus bys vykken. Re'th vennikko an nevow ha'th kreaturs oll.

⁶Ty a wrug Adam ha ri dhodho Eva y wreg avel gweres ha skoedhyans. Anedha re dheuth an agh a dhenses. Ty a leveris, “Nyns yw da bos den y honan; gwren gul gweres ragdho avello ev.”

⁷Ha lemmyn, A Arloedh, nyns yw rag lust y kemmerav ow hwoer ma, mes gans lenduri. Gront may kyffiv tregeredh ha kothhe war-barth gensi.’

⁸Ha hi a leveris ganso, ‘Amen.’

⁹Ena i a goedhas yn kosk aga dew rag an nos.

¹⁰Mes Raguel a sevis ha mos dhe balas bedh, gans an preder, ‘Martesen ev ynwedh a wra merwel.’

¹¹Ena Raguel eth a-berth yn y ji

¹²ha leverel dh'y wreg Edna, ‘Dannvon onan a'n maghtethyon dhe weles mars yw bew; ha mar nyns yw, gwren y ynkleudhyas heb denvyth dhe wodhvos yn y gever.’

¹³Ytho an vaghteth a igoras an daras ha mos a-ji, ha'ga havoes agas dew yn kosk.

¹⁴Hag hi a dheuth yn-mes ha leverel dhedha y vos yn few.

¹⁵Ena Raguel a vennigas Duw ha leverel, ‘Bennigys os ta, a Dhuw, gans pub bennath pur ha sans. Re'th vennikko dha syns ha dha greaturs oll; re'th vennikko oll dha eledh ha dha bobel dhewisys bys vykken.

¹⁶Bennigys os ta, drefenn ty dhe wul dhymm bos heudhik. Ny hwarva dhymm par dell ownen vy; mes ty re'gan dyghtyas herwydh dha dregeredh meur.

¹⁷Bennigys os ta, drefenn ty dhe dhiskwedhes truedh war dhew flogh unn-dhineythys. Diskwa tregeredh dhedha, a Vester; ha doro aga bewnans dhe geweras yn sawder gans lowender ha tregeredh.’

¹⁸Ena ev a worhemmynnis orth y servysi dhe lenwel an bedh.

¹⁹Ena ev a ros goel demmedhyans ragdha hag a dhuryas peswardhek dydh.

²⁰Ha kyns bos deu dydhyow an goel, Raguel a leveris dhe Tobias gans ti na goedha dhodho diberth kyns bos gorfennys peswardhek dydh an goel demmedhyans,

²¹hag ena y koedha dhodho kemmeres hanter pythow Raguel ha dehweles yn sawder dh'y das, hag y fedha an remenant dhodho ‘Pan varwo ow gwreg ha my.’