Read Kernewek Yudith 1 Bible Online

Yudith 1 - Kernewek bible

Yudith 1

¹Y'n dewdhegves blydhen a reyn Nebukadnessar, esa ow rewlya an Assyrianys y'n sita veur Nineve, yth esa Arfaksad ow rewlya an Medys yn Ekbatana.

²Arfaksad a dhrehevis fosow yn kyrghynn Ekbatana gans meyn treghys, tri hevelin yn les ha hwegh kevelin yn hys. Ev a wrug an fosow deg kevelin ha tri-ugens yn ughelder ha hanter-kans kevelin yn les,

³hag orth hy yetow ev a dhrehevis touryow, kans kevelin yn ughelder, ha'n selyow tri-ugens kevelin yn les;

⁴hag ev a dhrehevis hy yetow, deg kevelin ha tri-ugens yn ughelder ha dew-ugens kevelin yn les, may halla y luyow keskerdhes yn-mes gans nerth ha'y droeslu gwitha aga aray.

⁵Yth o y'n dydhyow na myghtern Nebukadnessar a werryas erbynn myghtern Arfaksad y'n plen meur usi war an oryon a Ragaw.

⁶Yth omguntellas ganso oll an dus trigys y'n vro venydhyek hag oll an dus trigys ryb an Ewfrates, an Tigris ha'n Hydaspes, ha war an plen Ariogh myghtern an Elamysi; ha lies kenedhel a junyas gans an Kaldeanys.

⁷Nebukadnessar, myghtern an Assyrianys, a dhannvonas galow dhe oll an drigoryon yn Persia ha dhe oll an drigoryon y'n howlsedhes: trigoryon Silisia, Damaskus, Lebanon hag Antilebanon, hag oll an re trigys ryb an arvor;

⁸dhe'n kenedhlow yn Karmel, Gilead, Galile Gwartha ha plen meur Esdraelon;

⁹dhe oll yn Samaria ha'y threvow, hag a'n west dhe'n Yordan bys Yerusalem, Bethani, Kelous, Kadesh hag avon Ejyp, Tafnas,[1] Rameses ha tir kowal Goshen,

¹⁰bys y'n tu arall dhe Tanis ha Memfis; hag oll trigoryon Ejyp bys oryon Ethiopia.

¹¹Byttegyns, oll an trigoryon yn oll an tiryow ma a skonyas gorhemmynn Nebukadnessar, myghtern a'n Assyrianys, ha nagha junya ganso rag gwerrya; rag ny's teva own anodho drefenn nag o ev namoy es unn gour yn aga golok; ytho i a dannvonas tre y gannasow gwag aga diwla, ha methek.

¹²Ena Nebukadnessar a veu serrys yn fras gans an rannvro kowal ma, hag ev a dos ren y dron ha'y wlaskor may tallfa dial war diredh kowal Silisia, Damaskus ha Syria, ha ladha gans an kledha oll trigoryon pow Moab, ha mebyon Ammon ha Yudi kowal, ha pubonan yn Ejyp, oll an tiredh ynter an dhew vor.

¹³Y'n seytegves blydhen, ev a hembronkas y lu erbynn myghtern Arfaksad; ev a'n fethas yn kas ha domhwel oll lu Arfaksad gans oll y varghoglu hag oll y jarettow.

¹⁴Yndella ev a gemmeras y sitys ha dos bys yn Ekbatana, sesya hy thouryow, pylla hy marghasow ha treylya hy thekter yn meth.

¹⁵Ev a gemmeras Arfaksad yn menydhyow Ragaw ha'y verya gans y wuwow, ha'y gisya oll yn tien bys vykken.

¹⁶Ena ev a dhehwelis dhe Nineve, ev hag oll y lu kemmyskys, routh vras a gasoryon. I a omdhiskwithas ena, ev ha'y lu, ha kevewya hwegh-ugens dydh.