Read Kernewek Yudith 10 Bible Online

Yudith 10 - Kernewek bible

Yudith 10

¹Pan hedhsa Yudith garma dhe Dhuw Ysrael, ha gorfenna oll an geryow ma,

²hi a sevis a'y sav a'n tyller mayth o hi a'y growedh. Hi a elwis hy maghteth ha diyskynna y'n chi may spena pub sabot ha'y dydhyow goel.

³Hi a omdhiwiskas a'n saghwisk re wisksa, hag omdhiwiska a'y dillas gwedhwes, badhya hy horf gans dowr, hag ura hy honan gans uras drudh. Hi a gribas hy gols, gwiska tulyfant, hag omwiska yn gwisk hy lowender a wiska pan esa yn few hy gour Manasse.

⁴Hi a wiskas sandalyow war hy dewdroes, ha gwiska hy ufernelligow, breghelligow, bysowyer, skinennow, ha'y gemmweyth arall oll. Yndella yth omwrug hi pur deg, rag dynya lagasow pub gour oll a's gwella.

⁵Hi a ros dh'y maghteth kroghen a win ha kostrel a oyl, ha lenwel sagh a reun rostys, tesennow fygys syghys, ha bara fin; ena hi a vaylyas hy lestri oll ha'ga ri dhedhi dh'aga degi.

⁶Ena i eth yn-mes bys yet an sita Bethulia ha kavoes Uzzia a'y sav ena gans henavogyon an dre, Kabris ha Karmis.

⁷Pan y's gwelas treusfurvys yn hy semlans ha gwiskys yn maner dhihaval, marth bras a's teva a'y thekter hag yn-medhons dhedhi,

⁸‘Duw agan tasow re wrontyo dhis faverans ha kollenwel dha dowlow, rag glori pobel Ysrael hag ughelheans Yerusalem.’ Hi a omblegyas dhe Duw.

⁹Ena yn-medh hi dhedha, ‘Erghewgh may fo igerys ragov yet an dre may hylliv mos yn-mes ha kowlwul an traow re leversowgh dhymm nammnygen.’ Ytho i a erghis an wer yowynk dhe igeri an yet, dell wovynnas hi.

¹⁰Wosa i dhe wul henna, Yudith eth yn-mes, ha'y maghteth gensi. Gwer an dre a viras orti bys pan diyskynnsa an menydh ha tremena der an nans, hag ena ny allsons hy gweles na fella.

¹¹Yth ethons ow mos yn ewn hyns der an nans, ha bagas goelyadoryon Assyriek a vetyas orti

¹²ha'y dalghenna. I a wovynnas orti, ‘A by pobel osta, hag a by le osta devedhys, ha ple'th esosta ow mos?’ Hi a worthybis ‘Myrgh an Ebrowyon ov vy, mes yth esov ow fia dhiworta, rag aga bos parys dhe vos hepkorrys dhis yn preydh.

¹³Yth esov vy war ow fordh dhe weles Holofernes, pennhembrenkyas a'gas lu, rag ri dhodho derivas gwir; my a vynn diskwedhes dhodho hyns ragdho may hallo mos ha kachya an vro venydhyek oll heb kelli denvyth a'y lu, synsys po ledhys.’

¹⁴Pan glewis an wer hy geryow, ha merkya hy fas — hi o marthys teg yn aga dewlagas — yn-medhons dhedhi,

¹⁵‘Ty re selwis dha vewnans dre fistena war-nans rag gweles agan arloedh. Ke distowgh dh'y dylda; nebes ahanan a wra mos genes ha dha dhaskorr dhodho.

¹⁶Pan sevydh a-dheragdho, na borth own y'th kolonn, mes lavar dhodho an pyth re leversys nammnygen, hag ev a wra dha dhyghtya yn ta.’

¹⁷I a dhewisis kans gour dhiworth a'ga mysk dhe vos gensi hi ha'y maghteth, ha'ga dri dhe dylda Holofernes.

¹⁸Yth esa tervans meur y'n kamp dien, rag bos kyhwedhlys a dylda dhe dylda hy devedhyans. Tus a dheuth ha kuntell a-dro dhedhi, ha hi a'y sav yn-mes a dylda Holofernes, ow kortos bys pan dherivsons dhodho a-dro dhedhi.

¹⁹Marth a's teva i a'y thekter ha marth a's teva a'n Ysraelysi a'y govis hi. Yn-medhons an eyl dh'y gila, ‘Piw a yll dispresya an bobel ma, a's teves benynes avel homma yn aga mysk? Nyns yw fur gasa yn few nagonan a'ga gwer, rag mara's gesyn mos yn-kerdh i a allsa toella an bys oll.’

²⁰Ena gwithysi Holofernes hag oll y servysi a dheuth yn-mes ha'y ledya hi y'n tylda.

²¹Yth esa Holofernes a'y wrowedh war y weli yn-dann roes-wibes o gwiys gans purpur hag owr, gwyrveyn ha meyn drudh.

²²Pan dherivsons dhodho anedhi, ev a dheuth dhe dal an tylda, gans lugern arghans degys a-dheragdho.

²³Pan dheuth Yudith yn golok Holofernes ha'y servysi, marth a's teva i oll a dekter hy fas. Hi a goedhas war hy fas hag omblegya dhodho, mes y gethyon a's gorras a'y sav arta.