Read Kernewek Yudith 11 Bible Online

Yudith 11 - Kernewek bible

Yudith 11

¹Ena, yn-medh dhedhi Holofernes, ‘Bydh kolonnek, A venyn, ha na borth own y'th kolonn, rag ny shyndis vy nagonan a dhewisas servya Nebukadnessar, myghtern a'n norvys oll.

²Mar ny wrussa dha bobel usi trigys y'n vro venydhyek ow dispresya, ny wrussen vy lemmyn sevel ow guw er aga fynn. I re dhros hemma war aga honan.

³Mes lemmyn, lavar dhymm an praga ty dhe fia dhe'n fo a-dhiworta ha dos omma dhyn ni. Yn neb kas, ty re dheuth dhe sawder. Bydh kolonnek! Ty a wra bewa haneth hag alemma rag.

⁴Denvyth ny wra dha debeldhyghtya, mes peub a wra dha dhyghtya yn ta, kepar dell wrer dhe servysi ow arloedh myghtern Nebukadnessar.’

⁵Yudith a worthybis dhodho, ‘Degemmer geryow dha gethes, ha gas dha servyades dhe gewsel a-dheragos. Haneth ny lavarav travyth fals dhe'm arloedh.

⁶Mar siwydh geryow dha servyades, Duw a gowlwra neppyth dredhos, ha ny wra ow arloedh fyllel kollenwel y borposys.

⁷My a'n te re vewnans Nebukadnessar, myghtern a'n bys oll, ha re'n galloes a neb a'th tannvon dhe lewya pub den bew. A'th wovis, nyns yw saw tus a'n serv mes keffrys enyvales an pras ha'n gwarthek hag ydhyn an ayr a wra bewa, drefenn dha alloes, yn-dann Nebukadnessar hag oll y ji.

⁸Rag ni re glewas a'th furneth ha sleyghneth dha spyrys, ha derivys yw dres oll an bys dha vos an gwella oll y'n ruvaneth kowal, an moyha dyskys ha'n moyha marthys yn towlow breselek.

⁹‘Lemmyn, ow tochya areth Aghior y'th konsel, ni re glewis y eryow, rag tus Bethulia a'n sparyas hag ev a leveris dhedha pub tra re lavarsa ev dhis.

¹⁰Rakhenna, A arloedh ha mester, na skon an pyth a leveris ev, mes gwith henna y'th vrys, rag y vos gwir. Yn tevri, ny yll agan kenedhel bos kessydhys, na ny yll an kledha gwarthevya er aga fynn, marnas i a begh erbynn aga Duw.

¹¹‘Mes lemmyn, rag ma na vo fethys ow arloedh ha lettys y borpos, ankow a wra aga domhwel, rag peghes re's tremenas, peghes dredho may mons i war an prykk a brovokya aga Duw dhe sorr pan wrons i an pyth yw kamm.

¹²A-ban yw spenys aga boes ha nammna gorfennys aga dowr, i re dewlis towl dhe ladha aga gwarthek hag ervira dhe usya pub tra Duw re dhifennas orta, der y laghys, a'y dhybri.

¹³I re erviras dhe gonsumya an kynsa frutys a'n greun ha'n degedhow a'n gwin ha'n oyl, re sakersons ha gorra a-denewen rag an oferysi neb a venyster a-wel dhe Dhuw yn Yerusalem — taklow nag yw laghel rag denvyth a'n bobel dh'aga thava gans y dhiwleuv hogen.

¹⁴A-ban re beu an bobel yn Yerusalem ow kul hemma hogen, i re dhannvonas di kannasow rag dri kummyas a'n konsel a henavogyon.

¹⁵An gorthyp pan y's drehettho hag i a wra yndella, y fydhons i delivrys dhis an jydh na rag bos distruys.

¹⁶‘Ytho hemma pan dhyskis vy, dha gethes, my a fias a-dhiworta. Duw re'm dannvonas rag kowlwul genes traow hag a vydh marth an bys oll, plepynag a glewvo tus anedha.

¹⁷Dha servyades a's teves yn tevri own a Dhuw ha servya Duw a nev nosweyth ha dydhweyth. Ytho, ow arloedh, my a worta genes lemmyn; mes pub nos dha servyades a wra mos yn-mes bys y'n nans ha pysi war Dhuw. Ev a wra derivas dhymm pan wrussons aga feghosow.

¹⁸Ena my a dheu ha derivas dhis, rag may hylli ehwias gans dha lu kowal, ha ny yll nagonan anedha sevel er dha bynn.

¹⁹Ena my a wra dha hembronk dre Yudi, bys may trehetthi Yerusalem; ena my a wra desedha dha se y'n kres anedhi. Ty a wra aga hembronk kepar ha deves na's teves bugel, ha ny wra ki vyth kemmys ha grommya orthis. Rag hemma re beu derivys dhymm rag ma'm bo ragwodhvos; derivys veu dhymm, ha my a veu dannvenys rag y leverel dhis.’

²⁰Hy geryow a blegyas dhe Holofernes ha dhe oll y servysi. Marth a's teves a'y furneth hag yn-medhons,

²¹‘Benyn vyth dhiworth unn penn a'n bys dh'y gila ny omdhiskwedh mar deg na kewsel mar fur!’

²²Ena yn-medh dhedhi Holofernes, ‘Duw re wrug yn ta, orth dha dhannvon dherag an bobel, rag krevhe agan diwla ha dri terroes war an re a dhispresyas ow arloedh.

²³Ny'th eus saw tekter y'th semlans hepken, mes ynwedh furneth y'th kows. Mar kwredh an pyth re leversys, dha Dhuw a vydh ow Duw, ha ty a drig yn lys myghtern Nebukadnessar ha bos meur dha vri dres an bys oll.’