Read Kernewek Yudith 12 Bible Online

Yudith 12 - Kernewek bible

Yudith 12

¹Ena, ev a erghis dhedha hy dri bys y'n tyller mayth o settys y lestri a arghans, hag y's erghis dhe restra prys-boes rygdhi gans nebes a'y voes y honan, keffrys ha nebes a'y win y honan dh'y eva.

²Mes yn-medh Yudith, ‘Ny allav vy kemmeres rann anedha, rag y fydh peghes; mes an pyth hag a dhres vy genev a vydh lowr ragov.’

³Yn-medh Holofernes dhedhi, ‘Mar fyll an sosten usi genes, ple hyllyn kavoes moy haval dhodho? Rag nyns eus denvyth a'th pobel omma genen ni.’

⁴Yudith a worthybis, ‘Dell vew dha enev, ow arloedh, ny wra dha servyades usya oll an sosten re dhres vy genev kyns an Arloedh dhe gowlwul y vodh der ow leuv.’

⁵Ena servysi Holofernes a's ledyas hi y'n tylda, hag ena hi a goskas bys hanter-nos. Pan dheuth ogas goelyas an bora, hi a sevis

⁶ha dannvon an messaj ma dhe Holofernes: ‘Erghes ow arloedh lemmyn gasa dha servyades dhe vos yn-mes ha pysi.’

⁷Ytho Holofernes a erghis dh'y withysi na's lettyens. Hi a wodrigas y'n kamp dres tri dydh.

⁸Wosa omvadhya, hi a bysis an Arloedh, Duw Ysrael, a ri siwenyans dh'y fordh rag drehevyans mebyon y bobel.

⁹Ena hi a dhehwelis purhes ha gortos y'n tylda bys pan dhybris hy boes y'n gorthugher.

¹⁰An peswora dydh, Holofernes a wrug gwledh rag y gethyon bersonel, mes ny elwis ev nagonan a'y soedhogyon vytholl.

¹¹Yn-medh ev dhe Bagoas, an spadhesik neb a'n jevo charj a'y vaterow personel, ‘Ke ha perswadya an venyn Ebrow usi yn-dann dha with dhe junya genen ha dhe dhybri hag eva genen.

¹²Rag y fydh meth mar kesyn benyn a'n par na dhe omdenna heb hy ardhynya. Mar ny wren ni hy ardhynya, hi a hwerth orthyn.’

¹³Ytho, Bagoas a omdennas dhiworth Holofernes, ha dos dhedhi hag yn-medh, ‘Na hokyes an vowes teg ma dhe dhos dhe'm arloedh rag bos enorys a‑dheragdho, ha dhe lowenhe owth eva gwin genen, ha dhe dhos ha bos hedhyw kehaval dhe onan a'n myrghes Assyriek neb a serv yn chi Nebukadnessar.’

¹⁴Yudith a worthybis, ‘Piw ov vy dhe skonya ow arloedh? Pypynag a blekkyo dhodho, a vynnav y wul distowgh, hag y fydh lowena dhymm bys yn jydh ow ankow.’

¹⁵Ytho, hi a sevis hag omwiska yn oll hy dillas benynek teg. Hy maghteth eth yn-rag ha lesa rygdhi war an leur a-dherag Holofernes an oengennow re dhegemmeras hi dhiworth Bagoas rag hy devnydh pub-dydhyek ha hi ow krowedha warnedha rag dybri.

¹⁶Ena Yudith a entras ha growedha rag dybri. Kolonn Holofernes a's teves marth anedhi hag ev a grenas gans ewl grev, ha pur hwansek veu dhe wrowedha gensi, rag re wortsa chons dh'y ardhynya dhiworth an kynsa dydh a's gwelas.

¹⁷Ytho, yn-medh Holofernes dhedhi, ‘Kemmer diwes ha bydh lowen genen ni!’

¹⁸Yn-medh Yudith, ‘Yndella my a wra yn heudh, ow arloedh, rag bos hedhyw an brassa dydh a'm bewnans kowal.’

¹⁹Ena hi a gemmeras an pyth a veu pareusys gans hy maghteth, ha dybri hag eva a-dheragdho.

²⁰Holofernes o pur lowen a'y govis, hag ev a evas myns bras a win, lower moy es dell evsa bythkweth yn unn jydh a-ban veu genys.