Read Kernewek Yudith 13 Bible Online

Yudith 13 - Kernewek bible

Yudith 13

¹Pan dheuth nosweyth, y gethyon a omdennas yn skon. Bagoas a dhegeas an tylda a'n tu a-ves hag eskeas an servysi a-dhiworth y vester. I eth dhe'n gweli, rag pubonan o skwith drefenn an wledh dhe besya mar hir.

²Mes Yudith a veu gesys yn tylda hy honan oll, gans Holofernes a'y wrowedh war y weli, rag medhow fest o ev.

³Ytho, Yudith re lavarsa dh'y maghteth sevel a'y sav yn-mes a'n chambour ha gortos hi dhe avodya, par dell wra hi dydhyow erell; rag hi re lavarsa hi dhe vos yn-mes rag hy fysadow. Re lavarsa hi an keth tra dhe Bagoas.

⁴Pubonan eth yn-mes, ytho, ha ny veu gesys y'n chambour denvyth, na bras na byghan. Ena Yudith, ow sevel a'y sav ryb y weli, yn-medh yn hy holonn, ‘A Arloedh Duw a bub galloes, mir y'n eur ma orth ober ow diwleuv rag gormola Yerusalem.

⁵Yth yw lemmyn an prys dhe weres dha ertach ha kompoesa ow thowl dhe dhistrui an eskerens, re omsevis er agan pynn.’

⁶Hi eth bys peul an gweli ogas dhe benn Holofernes, ha kemmeres y gledha esa ow kregi ena.

⁷Hi a dheuth ogas dh'y weli, ha dalghenna blew y benn, hag yn‑medh hi, ‘Ro dhymm hedhyw nerth, A Arloedh, Duw Ysrael!’

⁸Ena hi a weskis y gonna diwweyth gans oll hy nerth, ha treghi y benn dhiworto.

⁹Wosa henna, hi a rolyas y gorf a'n gweli ha tenna dhe'n leur an roes-wibes dhiworth an peulyow. Hi eth skon yn-mes ha ri penn Holofernes dh'y maghteth,

¹⁰neb a'n gorras yn hy sagh-boes. Ena an dhiw anedha a avodyas war‑barth, dell o aga us rag pysi. I a dremenas der an kamp, mos a-dro dhe'n nans, hag yskynna an menydh dhe Bethulia, ha dos dh'y yetow.

¹¹Yudith a armas a bellder dhe'n woelyadoryon orth an yetow, ‘Igerewgh, igerewgh an yet! Yma Duw, agan Duw, genen ni, ow tiskwedhes hwath y nerth yn Ysrael ha'y nerth erbynn agan eskerens, dell wrug ev hedhyw!’

¹²Gwer hy sita, pan glewsons hy lev, a fistenas bys yet an dre ha gelwel war-barth henavogyon an sita.

¹³I a boenyas war-barth, bras ha byghan, rag skant ny allsons krysi hi dhe dhehweles. I a igoras an yet ha'ga degemmeres. Ena i a enowis tan rag ri golow, hag omguntell yn aga hyrghynn.

¹⁴Yn-medh hi dhedha yn lev ughel, ‘Gormelewgh Duw, gormelewgh e! Gormelewgh Duw, na gildennas y versi dhiworth chi Ysrael, mes distrui agan eskerens der ow leuv an nos ma!’

¹⁵Ena hi a gemmeras an penn yn-mes a'n sagh ha'y dhiskwedhes, hag yn‑medh hi dhedha, ‘Ottomma, penn Holofernes, pennhembrenkyas an lu Assyriek, hag ottomma an roes-wibes yn-danni mayth esa ev a'y wrowedh yn y vedhwenep. An Arloedh re'n gweskis dhe'n leur dre leuv benyn.

¹⁶Dell vew an Arloedh, neb re'm difresas yn fordh mayth yth, ow fas vy yth o a'n ardhynyas dh'y dhistruyans, ha na gommyttyas ev pegh vyth genev, dhe'm defola ha shamya.’

¹⁷Oll an bobel a veu sowdhenys yn feur. I a omblegyas dhe'n leur ha gormel Duw, hag yn-medhons war-barth, ‘Bennigys osta agan Duw, neb re uvelhas eskerens dha bobel.’

¹⁸Ena yn-medh Uzzia dhedhi, ‘A vyrgh, bennigys os gans an Ughella Duw a-ugh pub benyn oll y'n norvys; ha bennigys re bo an Arloedh Duw, neb a wrug an nevow ha'n nor, neb re'th kevarwoedhas dhe weskel an penn dhiworth hembrenkyas agan eskerens.

¹⁹Nevra ny dhiberth dha wormola bys vykken dhiworth kolonnow a'n re a govha nerth Duw.

²⁰Duw re wrontyo hemma dhe vos enor heb hedhi dhis, ha re woppro ev dhis gans bennathow, drefenn ty dhe argelli dha vewnans dha honan prys mayth o uvelhes agan kenedhel, ha ty a dhiallas agan argoll, ow kerdhes y'n hyns ewn a-rag agan Duw.’ Hag yn-medh oll an bobel, ‘Amen, Amen.’