Read Kernewek Yudith 14 Bible Online

Yudith 14 - Kernewek bible

Yudith 14

¹Ena yn-medh Yudith dhedha, ‘Goslowewgh orthiv, ow breder. Kemmerewgh an penn ma ha'y gregi war pynakyl agas fos.

²Kettell dardh an jydh ha'n howl a sev a-ugh an tir, dalghennes kettep onan ahanowgh agas arvow, hag es yn-mes a'n sita pub gour krev y gorf; desedhewgh hembrenkyas dhedha, kepar dell ellewgh war-nans dhe'n plen erbynn savla an woelyadoryon Assyriek; mes na wrewgh hwi mos war-nans.

³Ena an woelyadoryon a dalghenn aga arvow ha mos y'n kamp ha gul dhe soedhogyon an lu Assyriek difuna. I a fisten yn tylda Holofernes mes ny wrons i y gavoes. Ena skruth a goedh warnedha hag i a fi dhe'n fo a-dheragowgh.

⁴Ena hwi ha peub eus trigys a-berth yn oryon Ysrael a wra aga chasya ha'ga hakkya dhe'n dor yn aga olyow.

⁵Mes kyns gul oll hemma, drewgh dheragov Aghior an Ammonyas may hallo gweles hag aswonn an den neb a dhispresyas chi Ysrael, neb a'n dannvonas dhyn kepar dell ve dhe'n vernans.’

⁶I a elwis Aghior, ytho, dhiworth chi Uzzia. Pan dheuth ha gweles penn Holofernes yn leuv onan a'n wer yn kuntellyans an bobel, ev a goedhas war y fas yn klamder.

⁷Pan y'n drehavsons dh'y sav, ev a goedhas a-rag dewdroes Yudith, hag omblegya dhedhi, hag yn-medh ev, ‘Bennigys os yn pub tylda Yuda! Yn pub kenedhel, seul a glewo dha hanow a gren.

⁸Lemmyn, lavar dhymm pandr'a wrussys dres an dydhyow ma.’ Ena Yudith a dherivas dhodho yn kres an bobel pup-tra re wrussa hi, a-dhia'n jydh mayth avodyas bys y'n prysweyth mayth esa hi ow kewsel orta.

⁹Wosa hi dhe worfenna, an bobel a armas yn ughel ha gul tros lowenek yn aga sita.

¹⁰Pan welas Aghior pup-tra re wrussa Duw Ysrael, ev a grysis yn fyrv yn Duw. Ytho, trodreghys veu, ha junya chi Ysrael, bys y'n jydh hedhyw.

¹¹Kettell dardhas an jydh, i a grogas penn Holofernes war an fos. Ena pub gour anedha a gemmeras y arvow, hag i eth yn-mes yn bagasow bys y'n bolghow y'n menydhyow.

¹²Pan y's gwelas an Assyrianys, i a dhannvonas ger dh'aga hembrenkysi, hag i eth dhe'n bennhembrynkysi an kaptenyon ha dh'aga soedhogyon erell oll.

¹³I a dheuth dhe dylda Holofernes hag yn-medhons dhe'n rennyas charjys gans y negys personel oll, ‘Difun agan arloedh, rag an gethyon re dheuth ha bos mar hardh dell dhons i war-nans er agan pynn rag omsettyans, dh'aga hollva dhien.’

¹⁴Bagoas a entras ytho. Ev a gnoukyas orth porth an tylda, ow tybi ev dhe goska gans Yudith.

¹⁵Byttegyns, pan na worthybis denvyth, ev a'n igoras hag entra an chambour, hag ev a'n kavas gorlesys marow war an leur, ha'y benn gyllys dhiworto.

¹⁶Ev a grias yn lev ughel hag oela, kyni ha garma, ha skwardya y dhillas.

¹⁷Ena ev eth dhe'n tylda may hwodrigsa Yudith, ha pan na's kavas, ev a fyskas yn-mes dhe'n bobel ha garma,

¹⁸‘An kethyon re'gan kastyas! Unn venyn Ebrow re dhros bismer war ji myghtern Nebukadnessar. Otta, yma Holofernes a'y wrowedh war an leur, ha gyllys y benn!’

¹⁹Hembrenkysi an lu Assyriek pan glewsons hemma, a skwardyas aga dhillas ha fest troblys ens. Aga kriow ha garmow a veu pur vras dres oll an kamp.