Read Kernewek Yudith 15 Bible Online

Yudith 15 - Kernewek bible

Yudith 15

¹Pan y'n klewis an wer y'n tyldow, skruthys vons orth an pyth re hwarvia.

²Fethys der own ha kren, ny wortsons i an eyl y gila, mes ow stevya yn-mes i a fias gans unn akord ow hwilas skapya dre bub hyns a-dreus an plen ha der an vro venydhyek.

³An re a gampsa y'n menydhyow a-dro dhe Bethulia a fias dhe'n fo ynwedh. Ena an Ysraelysi, pubonan hag o souder, a stevyas yn-mes warnedha.

⁴Uzzia a dhannvonas gwer dhe Betomesthaym, Koba ha Kola, ha dhe bub or a Ysrael, rag derivas pandr'a hwarvia hag ynnia war bubonan stevya yn-mes war an eskerens ha'ga distrui.

⁵Pan y'n klewis an Ysraelysi, i a goedhas gans unn akord war an eskerens, ha'ga threghi dhe'n dor bys yn Koba. An re yn Yerusalem hag yn oll an vro venydhyek a dheuth ynwedh, rag leverys via dhedha pandra re hwarvia yn kamp an eskerens. An re yn Gilead hag yn Galile a omsettyas erbynn aga thenwennow gans ladhva veur, bys pan dremensons dres Damaskus ha'y oryon.

⁶Remenant an dus trigys yn Bethulia a goedhas war an kamp Assyriek ha'y bylla, hag i a dheuth ha bos pur rych gans an preydh.

⁷Ha'n Ysraelysi, pan dhehwelsons a'n ladhva, a gemmeras an pyth a veu gesys; ha'n gwigow ha'n trevow y'n vro venydhyek ha war an plen a gavas myns bras a'n preydh, drefenn bos myns bras dres eghenn anodho.

⁸Ena an arghoferyas Yoakim ha henavogyon an Ysraelysi esa trigys yn Yerusalem a dheuth dhe vires orth an traow da re wrussa an Arloedh a-barth Ysrael, ha dhe weles Yudith ha'y salusi.

⁹Pan vetsons gensi, i oll a's bennigas gans unn akord hag yn-medhons dhedhi, ‘Ty yw glori Yerusalem, ty yw an goeth bras a Ysrael, ty yw goeth meur agan kenedhel!

¹⁰Ty re gowlwrug oll hemma dre dha leuv dha honan; ty re wrug les meur dhe Ysrael, ha pes da yw Duw gans an taklow ma. Re'th vennikko an Arloedh Ollgalloesek bys vykken!’ Hag oll an bobel a leveris, ‘Amen.’

¹¹Oll an bobel a byllas an kamp dres deg dydh warn ugens. I a ros dhe Yudith tylda Holofernes hag oll y dhaffar-moes a arghans, y weliow, y vollow hag oll y vebel. Hi a's kemmeras ha karga hy mul, hernessa hy hertow ha bernya an taklow warnedha.

¹²Oll benynes Ysrael a omguntellas dh'y gweles, ha dh'y benniga, ha re anedha a ordenas dons rag hy enora. Hi a gemmeras yn hy diwla gwelynni terghys gans idhyow ha'ga lesranna dhe'n benynes esa gensi;

¹³hi ha'n re esa gensi hi a omgurunas gans tergh oliv. Hi eth a-rag oll an bobel yn dons, owth hembronk oll an benynes, hag oll an wer a Ysrael orth aga siwya, ow tegi arvow ha gans tergh war aga fennow ha gans hymnys war aga diwweus.