Read Kernewek Yudith 16 Bible Online

Yudith 16 - Kernewek bible

Yudith 16

¹Yudith a dhallathas an grasyans ma a-rag Ysrael oll, ha'n bobel oll a ganas an gormola ma, ughel aga levow.[7]

²Hag yn-medh Yudith, Dallethewgh kan dhe'm Duw gans tabourigow, kenewgh dhe'm Arloedh gans symbalys. Kessenewgh dhodho salm a wormola; ughelhewgh ev, ha gelwewgh war y hanow.

³Rag an Arloedh yw Duw neb a skwatt breselyow; ev re settyas y gamp yn mysk y bobel; ev re'm delivras a dhiwla an re a'm chasyas.

⁴Asshur a dheuth yn-nans a venydhyow an gledhbarth; ev a dheuth gans lu diniver a'y vreselyoryon; aga myns a stoppyas an keynresyow, ha'ga marghoglu a gudhas an menydhyow.

⁵Ev a vostyas y hwrussa gorleski ow thir, ha ladha ow gwer yowynk gans an kledha, ha skwattya ow fleghigow dhe'n leur, ha dalghenna ow fleghes avel da pyllys, ha kemmeres ow gwyrghesow avel preydh.

⁶Mes an Arloedh Ollgalloesek re's lestas dre leuv benyn.

⁷Rag ny goedhas aga hampyer dre leuv gwer yowynk, na'n gweskis dhe'n leur mebyon an Titanes, na ny wrug kewri hir y weskel; mes Yudith myrgh Merari dre dekter hy fas a'n diswrug.

⁸Rag hi a dhiwiskas hy dillas gwedhwes rag eksaltya an re gompressys yn Ysrael. Hi a uryas hy fas gans melyseth; 8 hi a golmas hy gols gans snod, hag omwiska pows a lin rag y doella.

⁹Hy sandal a ravshyas y dhewlagas, hy thekter a husas y vrys, ha'n kledha a dhistagas y gonna!

¹⁰An Persianys a grenas a'y hardhder, an Medys a's teva own a'y bedhekter.

¹¹Ena ow fobel gompressys a armas gans joy; ow fobel wann a armas, ha'n eskar a grenas; i a dhrehevis aga levow, ha gul dhe'n eskar kildenna.

¹²Mebyon kethesow a's gwanas ha'ga golia avel fleghes fowesigyon; i a verwis a-rag lu ow Arloedh.

¹³My a gan hymna nowydh dhe'm Duw: A Arloedh, meur ha gloryus os, marthys yn nerth, antryghadow.

¹⁴Servyens tejy, oll dha groaduryon, rag ty re gewsis, hag i a veu gwrys. Ty a dhannvonas yn-mes dha Spyrys, hag ev a's formyas; rag ny yll nagonan settya orth dha lev.

¹⁵Rag an menydhyow a gren bys yn aga selyow gans an dowrow; a-rag dha wolok an karregi a deudh avel koer. Mes dhe'n re a berth own ahanas ty a dhiskwedh mersi.

¹⁶Rag pub sakrifis avel sawer plegadow yw tra vyghan, ha'n blonek oll a offrynn leskys yw tra vyghan fest dhiso jy; mes seul a'n jeves own a'n Arloedh yw meur bys vykken.

¹⁷Go-i, an kenedhlow a omsev erbynn ow fobel! An Arloedh Ollgalloesek a wra aga diella dydh breus; ev a dhannvon tan ha pryves yn aga hig; i a oel yn payn bys vykken.

¹⁸Pan dheuthons dhe Yerusalem, i a wordhyas Duw. Kettell veu purhes an bobel, i a offrynnas aga offrynnow leskys, aga offrynnow bodhek, ha'ga rohow.

¹⁹Yudith a sakras dhe Dhuw oll daffar Holofernes, a wrussa an bobel y ri dhedhi; ha'n roes-wibes re gemmersa a'y jambour rygdhi hy honan, a ros hi avel ro sakrys.

²⁰Dres tri mis an bobel a besyas goelya yn Yerusalem a-rag an sentri, ha Yudith a wortas gansa.

²¹Wosa hemma, pubonan a dhehwelis tre dh'y eretons y honan. Yudith eth dhe Bethulia, ha triga yn hy thiredh hy. Dres remenant hy bewnans, enorys o hi der oll an pow.

²²Lies a'n jeves hwans a'y demmedhi, mes ny omros hi dhe wour vyth, oll dydhyow hy bewnans, wosa hy gour Manasse dhe verwel ha bos ynkleudhys gans y bobel.

²³Hi a dheuth ha bos gerys-da moy ha moy, hag a gothhas yn chi hy gour, bys pan veu kans bloedh ha pymp. Hi a livras hy maghteth. Hi a verwis yn Bethulia hag ynkleudhys veu yn mogow hy gour Manasse;

²⁴ha chi Ysrael a gynis rygdhi seyth dydh. Kyns hi dhe verwel, hi a rannas oll hy pythow dhe oll an re o neshevin dh'y gour Manasse, ha dh'y neshevin hy honan.

²⁵Bythkweth namoy ny lesas denvyth browagh yn mysk an Ysraelysi dres bewnans Yudith, po termyn hir wosa hy mernans.