Read Kernewek Yudith 2 Bible Online

Yudith 2 - Kernewek bible

Yudith 2

¹Y'n etegves blydhen, y'n nessa dydh warn ugens a'n kynsa mis, y feu kows yn palys Nebukadnessar myghtern an Assyrianys, a-dro dhe dhial war oll an rannvro, par dell lavarsa ev.

²Ev a elwis war-barth oll y soedhogyon ha'y ugheloryon ha displetya orta y dowl kevrinek, ha derivas yn leun, yn-mes a'y anow y honan, oll sherewynsi an rannvro.

³Ena i a erviras dhe dhistrui kemmys na obaysa geryow y anow.

⁴Wosa ev dhe worfenna displetya y dowl, Nebukadnessar myghtern an Assyrianys a elwis Holofernes, pennhembrenkyas y lu, ha'n nessa war y lergh, hag yn-medh dhodho,

⁵‘Yndellma y lever an myghtern meur, arloedh an norvys oll: Pan avodydh a'm golok, kemmer genes gwer a's teves omfydhyans yn aga krevder, hwegh ugens mil a droesogyon ha dewdhek mil a varghogyon.

⁶Ke yn-mes erbynn oll tir an howlsedhes, rag i a dhisobayas geryow ow ganow.

⁷Ergh dhedha pareusi pri ha dowr,[2] rag yth esov ow tos y'm sorr er aga fynn. Kudha a wrav enep kowal an bys gans treys ow luyow, ha'ga delivra dhedha dhe vos pyllys.

⁸Aga re ledhys a lenow aga hownansow, ha pub gover hag avon a vydh lenwys a'ga re varow bys may fennons;

⁹ha my a's hembronk dhe-ves avel kethyon bys yn pennow an bys.

¹⁰Mes ty, ke a-dheragov ha kemmeres oll aga thir a-barth dhymm. I a omre dhis, ha ty a's syns ragov erbynn dydh aga hessydhyans.

¹¹Byttegyns, an re a dhisobay, na wres dha lagas aga sparya, mes ty a's delirv dhe ladhva ha ravnans dre dha rannvro gowal.

¹²Rag dell vewav, ha re alloes ow ruvaneth, an pyth re leveris a vydh kowlwrys dre'm leuv.

¹³Ha ty — kemmer with na dreuspassydh gorhemmynn vyth a'th arloedh, mes gwayt aga howlwul poran dell erghis dhis; ha na wra treynya aga gul.’

¹⁴Ytho, Holofernes a omdennas a bresens y vester ha gelwel war-barth oll an gaslewydhyon, an bennhembrynkysi ha soedhogyon an lu Assyriek,

¹⁵ha kuntell gwer dhewisys rag aray an vatel par dell y'n arghsa y arloedh: hwegh ugens mil anedha, war-barth gans dewdhek mil wareger,

¹⁶hag ev a's arayas par dell yw lu meur arayys rag kas.

¹⁷Ev a gemmeras niver bras dres eghenn a gowrvergh, asenes ha mulyon rag karyans, ha myns diniver a dheves, oghen ha gever rag sosten;

¹⁸Kekeffrys boes lowr rag pub gour, ha myns kowrek a owr hag arghans dhiworth an palys ryel.

¹⁹Ena yth ehwias gans y lu kowal rag mos kyns myghtern Nebukadnessar ha rag kudha enep kowal an norvys bys an howlsedhes gans aga charettow ha marghogyon ha soudoryon dhewisys an troeslu.

²⁰Gansa yth eth routh kemmyskys, avel hes a lokustes, ha doust an dor, routh na yllys hy rekna.

²¹I a geskerdhas tri dydh dhiworth Nineve bys yn plen Bektileth, ha kampya a-dal Bektileth ogas dhe'n menydh usi a-gledh dhe Silisia Wartha.

²²Alena Holofernes a gemmeras an lu kowal, an troeslu, an marghoglu ha'n charettow, hag yskynna y'n vro venydhyek.

²³Ev a ravnas Put ha Lud, ha pylla oll an Rassisysi ha'n Yshmaelysi trigys ryb an difeythtir, a-dhyghow dhe bow an Keleysi

²⁴Ena ev a siwyas an Ewfrates ha passya dre Mesopotamia ha distrui oll an sitys war bennow an menydhyow ryb an avon Abron,[3] bys y'n mor.

²⁵Ev a dhalghennas keffrys tiredh Silisia, ha ladha pubonan a settyas er y bynn, ha dos bys yn oryon Yafeth, dhe'n dyghow a-dal Arabia.

²⁶Ev a gyrghynnas oll an Midyanysi, ha leski aga thyldow ha pylla aga horlannow deves.

²⁷Ena ev eth war-nans bys yn plen Damaskus yn termyn trevas waneth, ha leski oll aga farkow ha distrui aga flokkys ha'ga greow ha pylla aga sitys ha ravna aga thiryow ha ladha oll aga gwer yowynk dre vin an kledha.

²⁸Ytho own ha browagh anodho a goedhas war oll an dus trigys y'n arvor, yn Sidon ha Tyr, ha war drigoryon Sur hag Okina, ha war drigoryon Yamnia. An dus trigys yn Azotus hag Askalon a's teva euth bras anodho.