Read Kernewek Yudith 5 Bible Online

Yudith 5 - Kernewek bible

Yudith 5

¹Y feu derivys dhe Holofernes, pennhembrenkyas an lu Assyriek, yth omdharbarsa an Ysraelysi dhe vresel ha degea an bolghow y'n vro venydhyek, kera gwarthav pub bre ughel ha gorra maglennow y'n plenys.

²Serrys fest o ev. Ev a elwis war-barth oll pennternedh Moab, oll pennhembrynkysi Ammon hag oll gwahalyethow an morrep,

³hag yn-medh ev dhedha: ‘Leverewgh dhymm, hwi vebyon Kanan, py eghenn a bobel yw homma eus trigys y'n vro venydhyek? Py trevow a annedhons? Pana vyns yw aga lu hag yn pyth usi aga galloes ha'ga nerth? Piw yw an myghtern settys warnedha owth hembronk aga lu?

⁴Prag y hwrussons ynsi, yn mysk oll eus trigys y'n howldrevel, skonya a dhos dhe vetya genev?’

⁵Yn-medh dhodho Aghior, hembrenkyas oll an Ammonysi, ‘Goslowes ow arloedh lemmyn ger dhiworth ganow dha was, ha my a vynn leverel dhis an gwir a-dro dhe'n bobel ma usi trigys y'n vro venydhyek y'th ogas. Ny dheu gow vyth dhiworth ganow dha was.

⁶An bobel ma yw sevys a'n Kaldeanys.

⁷Unnweyth trigys ens yn Mesopotamia, drefenn na vynnens siwya duwow aga thasow esa yn Kaldea.

⁸I re assa fordh aga herens ha gordhya Duw nev, an Duw re dhothyens i dh'y aswonn; rakhenna, herdhys vons dhiworth lok aga duwow. I a fias dhe Mesopotamia, le mayth esens trigys dres hirneth.

⁹Ena aga Duw a's erghis a omdenna a'n tyller mayth esens trigys ha mos dhe bow Kanan. I a drevesigas ynno ha siweni, gans owr hag arghans pals ha meur a warthek.

¹⁰Pan dheuth divoetter yn Kanan, i a omdhivroas dhe Ejyp ha triga ena hedre ve boes dhedha. I a dheuth ha bos ena routh veur, mar veur na yllys aga nivera.

¹¹Rakhenna myghtern Ejyp a dreylyas er aga fynn, ha'ga dyghtya yn fel, ha'ga uvelhe gans lavur yn brykkys, ha'ga gul yn kethwesyon.

¹²I a armas dh'aga Duw hag ev a weskis oll pow Ejyp gans plagys na yllys aga yaghhe. An Ejyptianys a's herdhyas yn-mes a'ga golok.

¹³A-dheragdha Duw a syghhas an Mor Rudh,

¹⁴ha'ga hembronk war an fordh dhe Sinay ha Kadesh-barnea. I a estewlis oll annedhysi an gwylvos.

¹⁵Ytho i a drigas yn pow an Amorysi ha distrui der aga nerth oll trigoryon Heshbon; ha wosa tremena an Yordan, i a gemmeras oll an vro venydhyek.

¹⁶I a estewlis a-ragdha an Kananysi ha'n Perizzysi, an Yebusysi ha'n Shekemysi, hag oll an Gergesysi, ha triga ena dres hirneth.

¹⁷‘Hedre vens i heb peghadow erbynn aga Duw i a siwenis, rag yma gansa an Duw neb a gas kammhynseth.

¹⁸Byttegyns, pan omdennsons dhiworth an hyns re settsa ragdha, fethys glan vons yn lies kas ha hembrenkys dhe-ves avel kethyon bys yn pow estren; tempel aga Duw a veu distruys bys y'n leur, ha'ga sitys kemmerys gans aga eskerens.

¹⁹Mes lemmyn i re dreylyas arta dh'aga Duw ha dehweles a-dhiworth an tylleryow mayth ens i skattrys dhedha, ha perghennegi Yerusalem, may ma aga sentri, ha trevesiga y'n vro venydhyek, rag y vos anannedhys.

²⁰‘Ytho lemmyn, a vester hag arloedh, mara's teves an keth pobel ma neb kammweyth gwrys heb y wodhvos hag i a begh erbynn aga Duw, ha ni a dhiskudh aga offens, ena ni a yskynn ha'ga fetha.

²¹Byttegyns, mar nyns eus anlaghedh yn aga henedhel, gwres ow arloedh tremena dresta, rag aga Arloedh a wra aga gwitha, ha'ga Duw a wra aga difres, ha ni a vydh gorrys dhe veth a-rag an bys oll.’

²²Pan worfennas Aghior y areth, oll an bobel esa ow sevel a-dro dhe'n tylda a dhallathas krodhvolas; soedhogyon Holofernes hag oll an dus trigys ryb an morrep ha Moab a leveris y koedh dhodho bos ledhys.

²³‘Ny berthyn own a vebyon Ysrael’, yn-medhons i; ‘Pobel heb nerth na galloes yns i dhe vreseli.

²⁴Rakhenna yskynnyn, A arloedh Holofernes, ha devorys vydhons gans oll dha lu.’