Read Kernewek Yudith 6 Bible Online

Yudith 6 - Kernewek bible

Yudith 6

¹Pan dhifygyas an habadoellya gwrys gans an wer yn kyrghynn an konsel, Holofernes, pennhembrenkyas an lu Assyriek, a leveris dhe Aghior a-rag an bagasow estren oll:[5]

²‘Piw os ta, Aghior, ha hwi, soudoryon arvethys Efraym, dhe dhargana yn agan mysk par dell wrussys hedhyw ha leverel dhyn na dal dhyn gwerrya erbynn pobel Ysrael drefenn aga Duw dh'aga sawya? Piw yw duw saw Nebukadnessar?

³Ev a dhannvon y nerth ha'ga distrui yn tien a enep an norvys, ha ny wra aga Duw aga sawya; ni wesyon an myghtern a's distru avel unn den. Ny yllons omsettya erbynn nerth agan marghoglu.

⁴Ni a wra aga howlleski. Aga menydhyow a vydh medhow a'ga goes, ha'ga gwelyow a vydh leun a'ga horfow marow. Ny yll olow aga threys bos gesys a-ragon ni, mes y fydhons leun dhistruys. Yndellma y lever myghtern Nebukadnessar, arloedh a'n bys dien. Rag ev re gewsis: ny vydh euver ger vyth anodho.

⁵‘Mes ty, Aghior, ty woberwas a Ammon, neb re leveris an geryow ma war dhydh dha gammhynseth, ny wredh nevra gweles ow fas a'n jydh ma erna dylliv dial war an hil ma a dheuth yn-mes a Ejyp.

⁶Pan dhehwelav, kledhedhyow ow lu ha guwow[6] ow servysi a wan dha denwennow, ha ty a goedh yn mysk aga re woliys.

⁷Ha lemmyn, ow hethyon a'th taskorr y'n vro venydhyek ha'th ri yn onan a'n dinasow ryb an bolghow;

⁸ny verwydh, bys pan vydhydh distruys gansa.

⁹Mars os fydhyansek y'th kolonn na vons an tylleryow ma kemmerys, nyns eus edhomm ty dhe vos digolonnek. My re gewsis ha travyth ny fyll a'm geryow.’

¹⁰Ena Holofernes a erghis dh'y gethyon, esa ow sevel rybdho yn y dylda, dalghenna Aghior ha'y gemmeres dhe Bethulia ha'y ri yn diwla vebyon Ysrael.

¹¹Ena y gethyon a'n dalghennas ha'y hembronk yn-mes a'n gaslys dhe'n plen, hag i a yskynnas a'n plen dhe'n vro venydhyek hag a dheuth bys y'n fentynyow usi yn-dann Bethulia.

¹²Kettell y's gwelas gwer an sita, i a synsis aga arvow ha poenya yn-mes a'n sita bys yn penn an menydh, hag oll an dowlbrennoryon a's pyltyas gans meyn, orth aga lettya rag yskynna.

¹³Ytho i a gavas kudhans yn-dann an menydh, hag i a golmas Aghior ha'y asa a'y wrowedh orth troes an menydh, ha dehweles dh'aga arloedh.

¹⁴Ena an Ysraelysi a dhiyskynnas dhiworth aga sita ha'y gavoes. I a'n digolmas ha'y hembronk yn Bethulia, ha'y dhesedha a-rag justisyow aga sita

¹⁵neb o y'n dydhyow na Uzzia mab Mika, a loeth Simeon, ha Kabris mab Gothoniel, ha Karmis mab Melkiel.

¹⁶I a elwis war-barth oll henavogyon an sita; hag ynwedh oll aga gwer yowynk ha'ga benynes a boenyas dhe'n kuntelles. I a worras Aghior yn kres oll aga fobel, hag Uzzia a wovynnas orto pandr'a hwarvia.

¹⁷Ev a worthybis ha derivas dhedha pandr'a hwarvia yn konsel Holofernes, hag oll a'n pyth a leveris a-rag an ledyoryon Assyriek, ha pup-tra a vostyas Holofernes ev dhe wul erbynn chi Ysrael.

¹⁸Ena an bobel a goedhas dhe'n leur ha gordhya Duw, ha garma warnodho, ow leverel:

¹⁹‘A Arloedh, Duw nev, mir orth aga balghder, kemmer truedh orth uvelheans agan kenedhel, ha mir an jydh ma orth fas a'n re yw sakrys dhis.’

²⁰Ena i a gonfortyas Aghior ha'y wormel yn feur.

²¹Uzzia a'n hembronkas a'n kuntelles dh'y ji y honan hag ordena gwledh rag an henavogyon. Dres oll an nos na i a elwis war Dhuw Ysrael rag gweres.