Read Kernewek Yudith 7 Bible Online

Yudith 7 - Kernewek bible

Yudith 7

¹Ternos Holofernes a erghis dh'y lu kowal keffrys hag oll an bobel re dheuth ha junya ganso avel keffrysysi, disevel aga hamp ha mos erbynn Bethulia, ha kemmeres an bolghow y'n vro venydhyek ha goestla bel erbynn an Ysraelysi.

²Oll aga gwer grev eth yn-kerdh an jydh na. Niver aga lu o deg mil droesek hag eth ugens, ha dewdhek mil varghek, war-barth ha'n tren-fardellow ha'n droesogyon esa orth aga dyghtya: routh veur dres eghenn.

³I a gampyas y'n nans ogas dhe Bethulia, ryb an fenten, hag omystynna yn les troha Dothan bys yn Belbaym, hag yn hys a Bethulia bys Kyamon, usi a-dal Esdraelon.

⁴Pan welas an Ysraelysi aga lu mar vras, fest troblys vons, hag yn-medhons an eyl dh'y gila, ‘Lemmyn i a wra lapya glan enep an dor kowal; ny wra an menydhyow ughel, na'n kownansow na'n breow doen an begh anedha.’

⁵Wosa kemmeres pub den y arvow hag enowi faglennow war aga thouryow, i a wortas avel gwithysi dres oll an nos na.

⁶Ternos Holofernes a ledyas oll y varghoglu yn-mes yn golok an Ysraelysi esa yn Bethulia.

⁷Ev a hwithras an fordhow dhe'n sita ha vysytya an fentynyow a brovias aga dowr. Ev a's kemmeras ha wosa settya ena parsellow a soudoryon, ev a dhehwelis dh'y lu.

⁸Ena y teuth dhodho oll pennternedh an Edomysi, hembrenkysi an Moabysi ha kaptenyon an arvor, hag yn-medhons,

⁹‘Goslowes agan arloedh agan geryow, ma na vo terroes y'th lu.

¹⁰Ny fydh an bobel ma, an Ysraelysi, yn aga guwow mes yn ughelder aga menydhyow mayth esons trigys, rag nyns yw es yskynna bys yn gwarthevyow aga menydhyow.

¹¹Rakhenna, A arloedh, na omladh er aga fynn kepar dell omledhir yn aray batel, ha ny wra koedha unn gour a'th lu.

¹²Remayn y'th kamp ha gwitha genes pub gour a'th soudoryon; mes gas dha wesyon dhe gavoes maystri war an fenten a dhowr a fros yn-mes a droes an menydh,

¹³rag yth yw dhiworth homma may tenn tus Bethulia aga dowr. Ytho, syghes a wra aga distrui hag i a wra daskorr aga sita. Ni ha'gan bobel a vynn yskynna bys yn gwarthevyow an menydhyow a-ogas ha kampya ena ha goelyas ma na dhianko gour vytholl a'n sita.

¹⁴I ha'ga gwragedh ha'ga fleghes, a wra difygya dre dhivoetter, hag y fydhons skoellys y'n stretow mayth annedhons kyns kledha vyth dhe dhos er aga fynn.

¹⁵Yndella ty a attal dhedha drogwober, drefenn i dhe rebellya ha na'th tegemmersons gans kres.’

¹⁶Pes da o Holofernes hag oll y servysi a'n geryow ma, hag ev a dhellos arghadow dhe wul dell lavarsens.

¹⁷Ytho an Ammonysi a avonsyas, hag yndella pymp mil mab Asshur, hag i a gampyas y'n nans, ha sesya an dowrow, ha fentynyow dowr an Ysraelysi.

¹⁸An Edomysi ha'n Ammonysi a yskynnas, ha kampya y'n vro venydhyek a-dal Dothan, ha dannvon re anedha dhe'n dyghow-est, war-tu hag Egrebel, usi ogas dhe Kusi ryb an keynres Moghmur. Remenant an lu assyriek a gampyas y'n plen, ha kudha enep an tir; ha'ga thyldow ha'ga threnow-provia a omlesas yn myns bras; hag yth ens i routh vras dres eghenn.

¹⁹An Ysraelysi a grias orth an Arloedh aga Duw, rag aga spyrys a fyllis, drefenn oll aga eskerens re's kyrghynnsa, ha nyns esa fordh-dhiank a-dhiworta.

²⁰An lu assyriek kowal, aga throeslu, charettow ha marghoglu, a's kyrghynnas peswardhek dydh warn ugens. Oll trigoryon Bethulia a dheuth dhe dhiwedh an lestri dowr;

²¹yth esa aga dowrarghow ow tesygha ha ny's teva dowr lowr rag unn jydh dhe derri syghes, rag y vos ewnrynnys.

²²Aga fleghes eth ha bos difreth, ha'n benynes ha'n wer yowynk a glamderas a syghes, ha koedha yn stretow an sita hag yn hynsyow der an yetow; ny's tevo namoy krevder vyth.

²³Ena oll an bobel, an wer yowynk, an benynes ha'n fleghes, a omguntellas a-dro dhe Uzzia ha rewloryon an sita ha kria gans lev ughel, ha leverel a-rag oll an henavogyon

²⁴‘Duw re bo breusydh yntra hwi ha ni; rag hwi re'gan shyndyas yn feur drefenn na wrussowgh kres gans an Assyrianys.

²⁵Rag lemmyn ny'gan beus denvyth dh'agan gweres; Duw re'gan gwerthas yn aga diwla, dh'agan skoellya dhe'n dor a-ragdha dre syghes ha terroes kowal.

²⁶Rakhenna, galw i lemmyn ha daskorr an sita gowal avel preydh dhe bobel Holofernes ha dh'y ost dien.

²⁷Y fia gwell agan bos pyllys gansa, rag y fydhyn ni kethyon, mes agan bewnans a vydh sparys ha ny wren ni gweles mernans agan fleghesigow a-rag agan dewlagas, na'gan gwragedh ha'gan fleghes yn eneworres.

²⁸Ni a elow nev ha nor ha'gan Duw, Arloedh agan tasow, yn test er dha bynn, usi orth agan kessydhya herwydh agan peghosow ha peghosow agan tasow. Na wres e hedhyw an traow ma!’

²⁹Ena y feu kynvann meur yn kres an kuntelles oll, ha garma a wrussons yn lev ughel orth an Arloedh Duw.

³⁰Mes yn-medh Uzzia dhedha, ‘Bedhewgh kolonnek, ow breder! Gwren ni paragh pymp dydh moy; erbynn henna an Arloedh agan Duw a asver dhyn y versi, rag na'gan eskas glan.

³¹Byttegyns, mar tremen an dydhyow ma ha ny dhegemmeryn gweres vyth, my a wra an pyth a leverowgh.’

³²Ev a dhannvonas an bobel yn-kerdh, peub dh'y savla, hag i a yskynnas war fosow ha touryow aga sita. An benynes ha'n fleghes ev a dhannvonas tre: hag yth ens yn studh pur isel y'n sita.