Read Kernewek Yudith 8 Bible Online

Yudith 8 - Kernewek bible

Yudith 8

¹Y'n dydhyow na, Yudith a glewas a'n maters ma. Hi o myrgh Merari mab Oks mab Yosep mab Oziel mab Elkia mab Ananias, mab Gideon mab Rafain mab Ahitub mab Elias mab Hilkia mab Eliab mab Nathanael mab Salamiel mab Sarasade mab Ysrael.

²Hy gour, Manasse, neb o esel a'y loeth ha'y theylu, re vawrsa yn prys an drevas heydh.

³Pan esa ev ow sevel, ow korweles an wesyon esa ow kelmi tyskennow y'n park, gweskys veu gans trethes an howl ha growedha war y weli, may ferwis yn Bethulia y sita ev. I a'n ynkleudhyas ytho gans y dasow y'n park yntra Dothan ha Balamon.

⁴Yth esa Yudith trigys yn hy chi hy honan avel gwedhwes teyr blydhen ha peswar mis.

⁵Hi a dhrehevis tylda rygdhi hy honan war do hy chi, grogysa hy diwglun gans yskar ha gwiska dillas hy gwedhowses.

⁶Hi a wrug penys oll dydhyow hy gwedhowses, a-der nos an sabot ha'n sabot y honan, an jydh kyns an loer nowydh ha dydh an loer nowydh, ha goelyow ha dydhyow lowender chi Ysrael

⁷Benyn deg o Yudith, ha dhedhi fas pur deg. Hi gour Manasse a gemmynnsa dhedhi owr hag arghans, kethyon ha kethesow, bughes ha parkow, ha hi a dhyghtya an pythow ma hy honan.

⁸Denvyth ny leveri ger drog er hy fynn, rag hi a's tevo own bras a Dhuw.

⁹Pan glewas Yudith an tebeleryow kewsys gans an bobel erbynn aga rewler, drefenn aga bos ow klamdera dre fowt dowr, ha pan glewas hi pub ger a leveris Uzzia dhedha, ha fatell ambosas ev dhedha yn-dann do daskorr an sita dhe'n Assyrianys wosa pymp dydh,

¹⁰hi a dhannvonas hy maghteth, neb a's tevo charj a'y fythow oll, dhe elwel dhedhi Kabris ha Karmis, henavogyon hy sita.

¹¹I a dheuth dhedhi, hag yn-medh hi dhedha, ‘Goslowewgh orthiv, rewloryon an dus trigys yn Bethulia! An pyth re leversowgh hedhyw dhe'n bobel nyns yw ewn; hwi re dos ha disklerya an to ma yntra Duw ha hwi hogen, owth ambosa dhe dhaskorr an sita dh'agan eskerens marnas an Arloedh a dreyl ha gweres dhyn a-ji dhe nebes dydhyow.

¹²Piw owgh hwi, neb re brovas Duw an jydh ma, ha settya agas honan yn le Duw yn mysk mebyon tus?

¹³Yth esowgh hwi ow previ an Arloedh Ollgalloesek. A ny gonvedhowgh nevra ?

¹⁴Ny yllowgh hwithra downderyow kolonn den, na konvedhes an pyth a breder ev; ytho fatell waytyowgh hwilas Duw, neb a wrug oll an taklow ma, ha dismygi y brys ev po konvedhes y brederow? Na, ow breder, na serrewgh an Arloedh agan Duw.

¹⁵Rag mar ny vynn ev agan gweres a-ji dhe'n pymp dydh ma, yma dhodho an galloes dh'agan skoedhya py termyn pynag a vynno, po dh'agan distrui yn lok agan eskerens.

¹⁶Na hwilewgh kemmeres porposys an Arloedh agan Duw yn gaja; rag nyns yw Duw haval dhe vab-den, dhe vos gwaynys dre vargenya.

¹⁷Rakhenna, ha ni ow kortos y dhelivrans, gwren ni gelwel warnodho dh'agan gweres. Mar pydh da ganso, ev a glew agan lev.

¹⁸‘Rag bythkweth yn agan henedh, nag y'n dydhyow ma, re beu loeth po teylu po pobel po sita ahanan a wormel duwow gwrys gans leuv, dell wres y'n dydhyow yw passys —

¹⁹ha henn o an praga bos agan tasow delivrys dhe'n kledha ha dhe byllans, ha rakhenna i a berthis anfeusi meur a-dherag agan eskerens.

²⁰Mes ny aswonnyn ni duw arall saw ev, ha rakhenna ni a wayt na'gan skornyo ni nag esel vyth a'gan kenedhel.

²¹Rag mars on ni kemmerys, oll Yudi a vydh kemmerys, ha'gan sentri a vydh pyllys; hag ev a rekwir attal rag y dhefolans gans agan goes.

²²Ladhva agan breder, kethneth agan tir ha treylyans agan ertach yn ynyalder — oll hemma ev a dhre war agan penn yn mysk an Jentilys, plepynag y fydhyn ni avel kethyon; ha ni a vydh sklander ha skorn yn golok agan perghennogyon.

²³Rag ny wra agan kethneth ledya dhe favour, mes an Arloedh Duw a's treyl dhe disenor.

²⁴‘Ha lemmyn, a vreder, bedhen ni ensampel dh'agan breder, rag aga bewnans a greg warnan, ha'n sentri, an tempel ha'n alter a bowes warnan ni.

²⁵Yn despit dhe bup-tra, grassyn dhe'n Arloedh agan Duw, neb usi orth agan previ dell wrug ev previ agan tasow.

²⁶Perthewgh kov a'n pyth a wrug ev gans Abraham, ha fatell brovas ev Ysak, ha pandr'a hwarva dhe Yakob yn Mesopotamia syriek, hag ev ow pugelya deves Laban, broder y vamm.

²⁷Rag ny wrug ev agan previ dre dan, dell y's provas ynsi, rag hwithra aga holonnow, na tyli dial warnan; mes an Arloedh a skorj an re a dheu nes dhodho, rag aga heski.’

²⁸Ena yn-medh Uzzia dhedhi, ‘Oll an pyth re leversys a dheu a golonn wiryon, ha nyns eus denvyth a allsa sevel erbynn dha eryow.

²⁹Rag nyns yw hedhyw an kynsa prys may feu dha furneth diskwedhys, mes a-dhia dhalleth dha dhydhyow oll an dus re aswonnis dha gonvedhes, rag bos ewn gnas dha golonn.

³⁰Mes an bobel a's teves syghes bras, hag i a'gan konstrynas dhe wul an pyth re ambossyn dhedha, ha'gan ynnia dhe wul ti ma na yllyn y derri.

³¹Ytho gwra pysi ragon lemmyn, rag benyn gryjyk os, ha'n Arloedh a dhannvon dhyn glaw a lenow agan puthow, ha ny vydhyn klamderek namoy.’

³²Yn-medh Yudith dhedha, ‘Goslowewgh orthiv. Yth esov vy ow tewlel towl dhe wul neppyth a govhir a henedh dhe henedh a'gan kenedhel.

³³Sevewgh orth yet an sita haneth, hag yth av vy yn-mes gans ow maghteth; hag a-ji dhe'n dydhyow a ambossiwgh ri an sita dh'aga eskerens, an Arloedh a dheliver Ysrael der ow leuv vy.

³⁴Byttegyns, na hwilewgh dismygi ow thowl, rag ny vynnav y dherivas dhywgh bys pan gowlwrav an pyth a vynnav y wul.’

³⁵Uzzia ha'n rewloryon a leveris dhedhi, ‘Ke yn kres, ha re ello an Arloedh Duw dheragos rag tyli dial war agan eskerens.’

³⁶I a dhehwelis ytho a'n tylda ha mos dh'aga savleow.