Read Kernewek Yudith 9 Bible Online

Yudith 9 - Kernewek bible

Yudith 9

¹Ena Yudith a goedhas war hy fas ha gorra lusu war hy fenn, ha diskudha an saghwisk ynni mayth o hy gwiskys. Hag y'n pols may feu ynkys an gorthugher offrynnys yn chi Duw yn Yerusalem, Yudith a armas dhe'n Arloedh gans lev krev hag yn-medh hi,

²‘A Arloedh Duw ow thas Simeon, ty a ros kledha yn y leuv rag tyli dial war an estrenyon re dhigolmas grogys gwyrghes rag hy defola, ha diskudha mordhos rag hy shamya, ha defola hy brys rag hy disenora; rag ty re leveris, “Ny vydh yndella” — byttegyns i a'n gwrug.

³Rakhenna ty a dhelivras aga rewloryon dhe ladhva, ha'n lienyow gweli, disenorys gans an toell re wrussens, dhe vos mostys gans goes; ha ty a weskis dhe'n dor kethyon keffrys ha pennsevigyon, ha pennsevigyon war aga thron hogen.

⁴Ty a ros aga gwragedh yn preydh ha'ga myrghes yn kethneth, hag oll aga gwara pyllys dhe vos rynnys yntra dha vebyon veurgerys, neb o diwysyk a-barth dhis ha dyegrys orth defolans aga goes, hag i a elwis warnas rag gweres. A Dhuw, ow Duw, goslow orthiv ynwedh, gwedhwes dell ov.

⁵‘Rag re wrussys an traow ma ha'n traow a hwarva kyns ha'n traow a siwyas. Ty a dhevisyas an traow a-lemmyn, ha'n re usi ow tos. An pyth a dhevissys re hwarva.

⁶An traow a ervirsys re omdhiskwedhas, hag yn-medhons, “Otta ni!” Rag yth yw oll dha fordhow pareusys kyns, hag yth yw dha vreus gans ragwodhvos.

⁷‘Otta lemmyn an Assyrianys, moghhes fest yn aga nerth; ughlhes yns i gans aga mergh ha marghogyon, ow postya a grevder aga throeslu, ow trestya yn skoes ha guw, yn gwarak ha towlbrenn. Ny wodhons ty dhe vos an Arloedh neb a skwatt breselyow; an Arloedh yw dha hanow.

⁸Towl aga krevder dhe'n dor dre dha alloes, ha torr aga nerth y'th sorr; rag i a vynn defola dha sentri, ha mostya dha dabernakel le may powes dha hanow gloryus, ha gweskel kern dha alter dhe'n dor gans an kledha.

⁹Mir orth aga goeth, ha dannvon dha sorr war aga fenn. Ro y'm leuv, gwedhwes dell ov, an nerth dhe wul an pyth a dhevisyav.

¹⁰Dre doell ow diwweus, gwask dhe'n dor an keth gans an pennsevik ha'n pennsevik gans y was; brew aga balghder dre leuv benyn.

¹¹‘Rag ny greg dha nerth war niverow, na dha alloes war an re alloesek. Mes ty yw Duw a'n re isel, gwereser an re arweskys, skoedhyer an re wann, gwithyas a'n re eskesys, selwyas a'n re heb govenek.

¹²Goslow, goslow orthiv, A Dhuw a'm tas, Duw a ertach Ysrael, Arloedh nev ha nor, Gwrier an dowrow, Myghtern a'th wrians oll, klew ow fysadow!

¹³Gwra dhe'm geryow fekyl dri goli ha brew war an re a dewlis taklow fell erbynn dha gevambos, hag erbynn dha ji sakrys, hag erbynn menydh Sion, hag erbynn chi perghennogeth dha fleghes.

¹⁴Ha gas dha genedhel gowal ha pub loeth dhe wodhvos ha konvedhes dha vos Duw, an Duw a nerth ha galloes oll, ha nag eus nahen neb a with pobel Ysrael saw ty yn unnsel!’