Read Kernewek Esther 2 Bible Online

Esther 2 - Kernewek bible

Esther 2

¹Wosa an taklow ma, pan o koselhes konnar myghtern Ahasuerus, ev a borthas kov a Vashti ha'n pyth re wrussa hi, ha'n pyth a veu ervirys er hy fynn.

²Ena yn-medh gwesyon an myghtern esa orth y servya, ‘Re bo gwyrghesow yowynk ha teg hwilys rag an myghtern;

³ha settys an myghtern soedhogyon yn oll ranndiryow y wlaskor, may kuntellons war-barth oll an gwyrghesow yowynk ha teg bys yn Shushan an bennsita, dhe ji an benynes, yn gwith Hegay, spadhesik an myghtern, gwithyas an benynes; ha'ga oynmentys bedhens res dhedha;

⁴ha'n voren a blessyo dhe'n myghtern bedhes hi myghternes yn le Vashti.’ Hemma a blesyas an myghtern; hag yndella y hwrug ev.

⁵Yth esa unn Yedhow yn Shushan an bennsita, Mordekay y hanow, mab Yair, mab Shimei, mab Kish, Benyaminyas,

⁶neb re bia kemmerys yn kethneth dhiworth Yerusalem war-barth gans Yekonia myghtern Yuda, a wrug Nebukadnessar myghtern Babylon aga hemmeres yn kethneth.

⁷Ev re vagsa Hadassa, honn yw Ester, myrgh y ewnter, rag nyns esa dhedhi na tas na mamm, hag yth o an voren teg hy furv ha'y semlans; ha pan o hy thas ha'y mamm marow, Mordekay a's kemmeras avel y vyrgh y honan.

⁸Ytho pan veu gorhemmynn an myghtern ha'y arghadow klewys, ha meur a vorenyon kuntellys war-barth dhe Shushan an bennsita yn gwith Hegay, Ester ynwedh a veu kemmerys yn chi an myghtern yn gwith Hegay, gwithyas an benynes.

⁹An voren a'n plesyas, ha hi a gavas favour anodho; hag ev a ros dhedhi a verr spas hy oynmentys, gans hy rannow a voes, ha seyth maghteth dhewisys, dhe vos res dhedhi dhiworth chi an myghtern; hag ev a's gorras hi ha'y maghtethyon y'n gwella tyller yn chi an benynes.

¹⁰Ny wrussa Ester meneges naneyl hy fobel na'y herens: rag Mordekay re arghsa ma na's menekka hi.

¹¹Ha Mordekay a gerdhi pub dydh a-rag klos chi an benynes, rag godhvos fatell o gans Ester, ha'n pyth a hwarva dhedhi.

¹²Lemmyn pan veu devedhys torn pub moren mayth ella bys y'n myghtern Ahasuerus, y feu res dhedhi bos dyghtys herwydh an lagha rag an benynes dewdhek mis, rag yndella yth esa kollenwys dydhyow aga thekheans, hwegh mis gans oyl myrr, ha hwegh mis gans ethennow hweg ha gans oynmentys an benynes.

¹³Yndella pub moren a dho dhe'n myghtern: pynagoll a vynna y feu res dhedhi rag mos gensi yn-mes a ji an benynes bys yn chi an myghtern.

¹⁴Y'n gorthugher yth e hi, ha ternos vyttin dehweles a wre dhe nessa chi an benynes, yn gwith Shaashgaz,[4] spadhesik an myghtern, gwithyas an iswragedh. Ny dho hi arta bys y'n myghtern marnas an myghtern a ve hwansek dhedhi ha hi dhe vos gelwys dre hanow.

¹⁵Pan dheuth torn Ester, myrgh Abihayl ewnter Mordekay neb a's kemmersa avel y vyrgh ev, mayth ella bys y'n myghtern, ny wovynnas hi travyth orth Hegay spadhesik an myghtern ha gwithyas an benynes, saw an pyth a brofyas ev. Hag Ester a gavas gras yn golok oll an re a viri warnedhi.

¹⁶Ytho Ester a veu hembrenkys bys y'n myghtern Ahasuerus yn y ji ryel y'n degves mis, yw an mis Tebeth, yn seythves blydhen y reyn.

¹⁷Ha'n myghtern a garas Ester dres oll an benynes, ha hi a gavas gras ha favour a-ragdho moy ages oll an gwyrghesow; ytho ev a settyas an tulyfant ryel war hy fenn, ha'y gul myghternes yn le Vashti.

¹⁸Ena an myghtern a wrug kevewi meur rag oll y bennsevigyon ha'y wesyon, an kevewi a Ester; hag ev a wrontyas powes dhiworth tollow dhe'n rannvroyow, hag a brovias rohow gans helder ryel.

¹⁹Ha pan veu kuntellys an gwyrghesow an nessa prys, yth esa Mordekay esedhys yn yet an myghtern.[5]

²⁰Na hwath ny venegsa Ester naneyl hy herens na'y fobel dell arghsa Mordekay dhedhi: rag Ester a wre war-lergh gorhemmynn Mordekay par dell wre hi pan o megys ganso.

²¹Y'n dydhyow na, ha Mordekay esedhys yn yet an myghtern, yth o serrys dew spadhesik an myghtern, Bigthan ha Teresh, gwithysi an treudhow, ha hwilsons settya dalghenn y'n myghtern Ahasuerus.

²²Ha godhvedhys o an dra gans Mordekay, hag ev a'n derivas orth Ester an vyghternes; hag Ester a'n derivas dhe'n myghtern yn hanow Mordekay.

²³Pan veu gwrys hwithrans a-dro dhe'n mater, ha kevys veu bos yndella, kregys vons i aga dew war wydhenn: ha skrifys veu yn lyver an kovadhow a-dherag an myghtern.