Read Kernewek Esther 3 Bible Online

Esther 3 - Kernewek bible

Esther 3

¹Wosa an taklow ma, myghtern Ahasuerus a ughelhas Haman mab Hammedatha an Agagyas, ha'y avonsya, ha settya y se dres an bennsevigyon oll esa ganso.

²Hag oll gwesyon an myghtern esa yn yet an myghtern, e war benn-glin hag omblegya dhe Haman: rag yndella yth arghsa an myghtern a-dro dhodho. Mes ny wrug Mordekay mos war benn-glin nag omblegya dhodho.

³Ena gwesyon an myghtern, esa yn yet an myghtern, a leveris dhe Mordekay, ‘Prag y kammdremenydh erbynn gorhemmynn an myghtern?’

⁴Lemmyn pub dydh pan gewsens dhodho, ha ny woslowi ev orta, i a'n derivas dhe Haman, rag gweles mar pe geryow Mordekay godhevys, rag ev a lavarsa dhedha y vos Yedhow.

⁵Ha pan welas Haman nag e Mordekay war benn-glin nag omblegya dhodho, Haman a veu lenwys a sorr.

⁶Mes ev a skornyas settya dalghenn yn Mordekay y honan heb denvyth arall; rag i a dherivsa dhodho piw o pobel Mordekay. Ytho Haman a hwilas distrui oll an Yedhewon esa yn oll gwlaskor Ahasuerus, pobel Mordekay.

⁷Y'n kynsa mis, yw an mis Nisan, y'n dewdhegves blydhen a vyghtern Ahasuerus, tewlel Pur a wrussons, henn yw an prenn, a-dherag Haman dhe dhewis an jydh ha'n mis, ha'n prenn a goedhas war an trydhegves dydh[6] a'n dewdhegves mis, yw an mis Adar.

⁸Ena yn-medh Haman dhe'n myghtern Ahasuerus, ‘Yma unn bobel skattrys a-les ha diberthys yn mysk an poblow yn oll rannvroyow dha wlaskor; ha'ga laghys yw dihaval dhe laghys pub pobel arall, ha ny withons laghys an myghtern. Ytho nyns yw ewn an myghtern dh'aga godhav.

⁹Mara pleg dhe'n myghtern, bedhes skrifys y fydhons distruys: ha my a wra poesa deg mil dalent a arghans yn diwla an re charjys gans an ober, rag y dhri a-berth yn tresorvaow an myghtern.’

¹⁰Ytho an myghtern a gemmeras y vysow-sel dhiworth y leuv, ha'y ri dhe Haman mab Hammedatha an Agagyas, eskar an Yedhewon.

¹¹Yn-medh an myghtern dhe Haman, ‘An arghans yw res dhis, ha'n bobel ynwedh, rag gul gensi an pyth a vo da y'th wolok.’

¹²Ena skrifwesyon an myghtern a veu gelwys y'n kynsa mis, y'n trydhegves dydh, ha skrifys veu poran dell arghsa Haman, dhe wahalyethow an myghtern ha dhe wovernours pub rannvro, ha dhe bennsevigyon pub pobel; dhe bub rannvro herwydh y skrif, ha dhe bub pobel herwydh hy thaves; y feu skrifys yn hanow an myghtern Ahasuerus, ha selys veu gans bysow an myghtern.

¹³Lytherow a veu dannvenys dre leuv poenyoryon bys yn oll rannvroyow an myghtern, dhe dhistrui, ladha ha diswul oll an Yedhewon, ha yowynk ha hen, fleghes ha benynes, yn unn jydh, y'n trydhegves dydh a'n dewdhegves mis, yw an mis Adar, ha may fe aga fythow pyllys.

¹⁴Y feu dasskrif a dekst an arghadow dhe vos dyllys yn pub rannvro dhe'n poblow oll, may fens i parys erbynn an jydh na.

¹⁵An boenyoryon eth dhe-ves toeth men herwydh gorhemmynn an myghtern, ha dyllys veu an arghadow yn Shushan an bennsita. An myghtern ha Haman a esedhas rag eva; mes penndegys o an sita Shushan.