Read Kernewek Esther 5 Bible Online

Esther 5 - Kernewek bible

Esther 5

¹[7]Lemmyn y'n tressa dydh, Ester a wiskas hy dillas ryel; ha sevel a wrug y'n klos pervedhel a balys an myghtern a-dal hel an myghtern. Yth esa an myghtern esedhys war y se ryel y'n hel ryel a-dal porth an palys.

²Pan welas an myghtern Ester an vyghternes ow sevel y'n klos, hi a gavas gras yn y wolok; hag ev a ystynnas dhe Ester an dernwelenn owrek esa yn y dhorn. Ena Ester a dheuth nes ha tochya penn an dernwelenn.

³Yn-medh an myghtern dhedhi, ‘Pyth eus dhis, a vyghternes Ester? Pyth yw dha vynnas? Kyn fo hanter an wlaskor y fydh res dhis.’

⁴Yn-medh Ester, ‘Mar pydh plegadow dhe'n myghtern, gwres an myghtern ha Haman dos an jydh ma dhe gevewi re bareusis vy ragdho.’

⁵Ena yn-medh an myghtern, ‘Gwrewgh dhe Haman fistena rag gul war-lergh ger Ester.’ Ytho y teuth an myghtern ha Haman dhe'n gevewi re bareussa Ester.

⁶Hag yn-medh an myghtern dhe Ester pan esens owth eva gwin, ‘Pyth yw dha bysadow? Grontys vydh dhis. Ha pyth yw dha worholedh? Kyn fo hanter an wlaskor kollenwys vydh.’

⁷Ytho Ester a worthybis, hag yn-medh hi, ‘Ow fysadow ha'm gorholedh yw:

⁸Mar kevis vy gras yn golok an myghtern, ha mar pydh plegadow dhe'n myghtern grontya ow fysadow, ha kollenwel ow gorholedh, gwres an myghtern ha Haman dos dhe'n kevewi a wrav vy y bareusi ragdha, hag a-vorow my a wra herwydh ger an myghtern.’

⁹Haman eth yn-mes an jydh na, lowen ha heudhik y golonn. Mes Haman pan welas Mordekay yn yet an myghtern ha na sevis ev na krena a-ragdho, ev a veu leun a gonnar erbynn Mordekay.

¹⁰Byttegyns, omfronna a wrug Haman, ha dos tre; hag ev a dhannvonas ha kyrghes y gowetha ha'y wreg Zeresh.

¹¹Ha Haman a dherivas orta glori y rychys, ha palster y vebyon, ha'n taklow oll may hwrussa an myghtern dh'y voghhe ha'y avonsya a-ugh an bennsevigyon ha gwesyon an myghtern.

¹²Hag yn-medh Haman, ‘Hwath pella, ny dhros Ester an vyghternes denvyth a-ji gans an myghtern dhe'n kevewi a bareusis hi marnas my; hag a-vorow ynwedh my yw gelwys dhedhi gans an myghtern.

¹³Mes oll hemma ny dal travyth dhymm, peskweyth may hwelav Mordekay an Yedhow owth esedha yn yet an myghtern.’

¹⁴Ena yn-medh Zeresh y wreg hag oll y gowetha dhodho, ‘Pareusens gwydhenn hanter-kans kevelin hy ughelder, ha ternos vyttin kows orth an myghtern may fo Mordekay kregys warnedhi: ena ke a-ji yn heudh gans an myghtern dhe'n kevewi.’ An gusul ma a blesyas Haman, ha pareusi an wydhenn a wrug.