Read Kernewek Esther 6 Bible Online

Esther 6 - Kernewek bible

Esther 6

¹Y'n nos na, ny allas an myghtern koska, hag ev a erghis kyrghes lyver an kovadhow, skrifow an dydhyow, ha lennys vons a-dherag an myghtern.

²Kevys veu skrifys ena y terivsa Mordekay a-dro dhe Bigthana ha Teresh, dew spadhesik an myghtern, a'n re a witha an treudhow, i dhe vrasa moldra myghtern Ahasuerus.

³Yn-medh an myghtern, ‘Py enor ha reowta re beu gwrys dhe Mordekay rakhemma?’ Ena yn-medh gwesyon an myghtern a venystra dhodho, ‘Ny veu travyth gwrys ragdho.’

⁴Yn-medh an myghtern, ‘Piw usi y'n klos?’ Lemmyn y feu Haman devedhys y'n garth a-ves a ji an myghtern, rag kewsel dhe'n myghtern a-dro dhe gregi Mordekay war an wydhenn a bareussa ragdho.

⁵Hag yn-medh dhodho gwesyon an myghtern, ‘Awotta, yma Haman ow sevel y'n klos.’ Hag yn-medh an myghtern, ‘Des ev a-ji.’

⁶Ytho Haman a dheuth a-ji, hag yn-medh an myghtern dhodho, ‘Pyth dhe wul gans an gour a vynn an myghtern y enora?’ Hag yn-medh Haman yn y golonn, ‘Piw a vynn an myghtern y enora moy avelov vy?’

⁷Yn-medh Haman dhe'n myghtern, ‘Rag an gour a vynn an myghtern y enora,

⁸bedhes kyrghys dillas ryel re wiskas an myghtern, ha'n margh may farghogas an myghtern, mayth eus kurun ryel settys war y benn:

⁹ha bedhes gorrys an dillas ha'n margh yn leuv onan a'n bennsevigyon an moyha nobyl a'n myghtern, ha re dhillassons an gour a vynn an myghtern y enora, ha'y hembronk war geyn margh dre blen an sita, ha kria a-ragdho, “Yndella y fydh gwrys dhe'n gour a vynn an myghtern y enora.” ’

¹⁰Ena yn-medh an myghtern dhe Haman, ‘Gwra fistena, ha kemmeres an dillas ha'n margh, dell leversysta, ha gul yndella dhe Mordekay an Yedhow, usi owth esedha yn yet an myghtern. Na vedhes fowt mann a oll may kewssysta.’

¹¹Ytho Haman a gemmeras an dillas ha'n margh, ha dillasa Mordekay, ha'y hembronk war geyn margh dre blen an sita, hag a grias a-ragdho, ‘Yndella y fydh gwrys dhe'n gour a vynn an myghtern y enora!’

¹²Ena dehweles a wrug Mordekay dhe yet an myghtern, ha Haman a fistenas tre yn unn gyni, ha kudhys y benn.

¹³Ha Haman a dherivas orth Zeresh y wreg hag oll y gowetha pup-tra re hwarvia dhodho. Yn-medh y dus skentel ha Zeresh y wreg dhodho, ‘Mordekay, may tallathas dha derroes a-ragdho, yw a has an Yedhewon; ny wre'ta prevaylya er y bynn, mes koedha a wredh a-ragdho yn surredi.’

¹⁴Pan esens i hwath ow kewsel ganso, spadhesigyon an myghtern a dheuth yn unn fyski, dhe dhri Haman bys y'n kevewi a bareusis Ester.