Read Kernewek Esther 7 Bible Online

Esther 7 - Kernewek bible

Esther 7

¹Ytho, an myghtern ha Haman a dheuth dhe eva gans Ester an vyghternes.

²Hag yn-medh an myghtern arta dhe Ester, yn nessa dydh an kevewi a win, ‘Pyth yw dha bysadow, a vyghternes Ester? ha grontys vydh dhis. Ha pyth yw dha worholedh? Kyn fo hanter an wlaskor kollenwys vydh.’

³Ena Ester an vyghternes a worthybis ow leverel, ‘Mar kevis vy gras y'th wolok, a vyghtern, ha mar pleg dhe'n myghtern, re bo res dhymm ow bewnans orth ow fysadow, ha'm pobel orth ow gorholedh.

⁴Rag gwerthys on ni, my ha'm pobel, dhe vos distruys ha ledhys ha dhe verwel. Mes a pen ni gwerthys avel kethyon ha maghtethyon my a wrussa dhe'm taves tewel, a-ban nag yw agan ahwer kehaval dhe'n koll dhe'n myghtern.’

⁵Ena myghtern Ahasuerus a gewsis ha leverel dhe Ester an vyghternes, ‘Piw yw ev, ha ple'ma ev neb a vynnsa lavasos yn y golonn gul yndella?’

⁶Yn-medh Ester, ‘Envi hag eskar! An tebel Haman ma!’ Ytho, yth esa euth dhe Haman a-dherag an myghtern ha'n vyghternes.

⁷Ena sevel a wrug an myghtern yn y gonnar dhiworth eva an gwin ha mos bys yn lowarth an palys, ha Haman a wortas rag hwilas y vewnans orth Ester an vyghternes; rag ev a weli bos drog ervirys er y bynn gans an myghtern.

⁸Hware an myghtern a dhehwelis dhiworth lowarth an palys bys yn hel an kevewi; hag yth esa Haman ow koedha war an gweli-dydh le mayth esa Ester. Ytho yn-medh an myghtern, ‘A vynn ev hwath defola an vyghternes, ha hi genev y'm chi ow honan?’ Kettell asas an ger ganow an myghtern, i a gudhas fas Haman.

⁹Ena yn-medh Harbona, onan a'n spadhesigyon esa a-dherag an myghtern, ‘Otta ynwedh, yma an wydhenn, hanter-kans kevelin hy ughelder, a wrug Haman hy fareusi rag Mordekay, neb a gewsis rag les an myghtern, ow sevel yn chi Haman.’ Ha'n myghtern a leveris, ‘Krog ev warnedhi.’

¹⁰Ytho, i a grogas Haman war an wydhenn a bareussa ev rag Mordekay, hag yndella koselhes veu konnar an myghtern.