Read Kernewek Esther 9 Bible Online

Esther 9 - Kernewek bible

Esther 9

¹Lemmyn y'n dewdhegves mis, yw an mis Adar, y'n trydhegves dydh anodho, pan veu gorhemmynn an myghtern ha'y arghadow dhe vos kollenwys, y'n jydh may hwaytya eskerens an Yedhewon aga gorra yn-dann rewl, y hwarva an konter, may hwrug an Yedhewon gorra yn-dann rewl an re a's kasa i;

²an Yedhewon a omguntellas war-barth yn aga sitys der oll rannvroyow myghtern Ahasuerus, rag settya dalghenn y'n re a hwilsa aga fystiga: ha ny ylli denvyth sevel orta; rag koedhys veu own anedha war oll an poblow.

³Hag oll pennsevigyon an rannvroyow, ha'n wahalyethow, ha'n wovernours, ha menystoryon an myghtern, a weresas an Yedhewon; rag bos koedhys warnedha own a Mordekay.

⁴Rag bras yn chi an myghtern o Mordekay, hag yth esa y er-da ow mos der oll an rannvroyow: ha meuredh an gour Mordekay a devi moy ha moy.

⁵Ha gweskel oll aga eskerens a wrug an Yedhewon dre strokosow an kledha, ow ladha hag ow tistrui, hag i a wrug pynag ve da gansa orth an re a's kasa.

⁶Hag yn Shushan an bennsita an Yedhewon a ladhas hag a dhistruis pymp kans den.

⁷Ynwedh i a ladhas Parshandatha, ha Dalfon, hag Aspatha,

⁸ha Poratha, hag Adalia, hag Aridatha,

⁹ha Parmashta, hag Arisay, hag Ariday, ha Vayzatha,

¹⁰an deg mab a Haman mab Hammedatha, eskar an Yedhewon. Mes war an preydh ny settsons aga leuv.

¹¹Y'n jydh na, niver an re ledhys yn Shushan an palys a veu derivys dhe'n myghtern.

¹²Hag yn-medh an myghtern dhe Ester an vyghternes, ‘An Yedhewon re ladhas ha distrui pymp kans gour yn Shushan an bennsita, ha'n deg mab a Haman; pandr'a wrussons i ytho yn ken rannvroyow an myghtern! Pyth ytho yw dha bysadow? Grontys vydh dhis. Pyth yw dha worholedh pella? Kollenwys vydh.’

¹³Ena yn-medh Ester, ‘Mar pleg dhe'n myghtern, bedhes grontys dhe'n Yedhewon usi yn Shushan may hwrellons a-vorow keffrys herwydh arghadow an jydh ma, ha bedhes deg mab a Haman kregys war an wydhenn.’

¹⁴Ytho an myghtern a erghis gul yndella; arghadow a veu res yn Shushan, hag i a grogas deg mab Haman.

¹⁵An Yedhewon esa yn Shushan a omguntellas war-barth yn peswardhegves dydh an mis Adar, ha ladha tri hans gour yn Shushan; mes war an preydh ny settsons aga leuv.

¹⁶Ha'n Yedhewon erell esa yn rannvroyow an myghtern a omguntellas war-barth rag omdhefendya, ha powes i a's teva dhiworth aga eskerens, ha ladha an re a's kasa, pymthek ha tri-ugens mil; mes war an preydh ny settsons aga leuv.

¹⁷Yn trydhegves dydh an mis Adar veu hemma; hag yn y beswardhegves dydh i a bowesas ha gul anodho dydh a gevewya hag a heudhder.

¹⁸Mes an Yedhewon esa yn Shushan a omguntellas war-barth yn y drydhegves dydh, hag yn y beswardhegves; hag ena y'n pymthegves dydh anodho i a bowesas, ha gul anodho dydh a gevewya hag a heudhder.

¹⁹Rakhenna, Yedhewon an godrevi usi trigys y'n trevow heb fosow, a syns an peswardhegves dydh a'n mis Adar avel dydh a heudhder hag a gevewya, ha dydh da, hag a dhannvon rohow a voes an eyl dh'y gila.

²⁰Mordekay a skrifas an taklow ma, ha dannvon lytherow dhe oll an Yedhewon esa yn oll rannvroyow myghtern Ahasuerus, ogas ha pell,

²¹rag charjya dhedha may synsens an peswardhegves dydh a'n mis Adar, ha'n pymthegves dydh anodho pub blydhen,

²²avel an dydhyow may feu dhe'n Yedhewon powes dhiworth aga eskerens, ha'n mis hag a veu treylys ragdha dhiworth ahwer dhe heudhder, ha dhiworth kynvann dhe dhydh da: ma's gwrellens dydhyow a gevewya hag a heudhder, hag a dhannvon rohow a voes an eyl dh'y gila, hag a dhannvon rohow dhe'n voghosogyon.

²³Ytho an Yedhewon a omgemmeras gul par dell dhallathsens, ha par dell skrifsa Mordekay dhedha.

²⁴Re wrussa Haman mab Hammedatha an Agagyas, eskar an Yedhewon oll, brasa erbynn an Yedhewon rag aga distrui, ha dhe dewlel Pur, henn yw an prenn, rag aga hisya, ha'ga distrui;

²⁵mes pan veu hi devedhys a-rag an myghtern, ev a erghis dre lytherow may tehwella y dhroktowl, a dowlsa erbynn an Yedhewon, war y benn y honan; ha bos ev ha'y vebyon kregys war an wydhenn.

²⁶Hemm yw prag yth yw gelwys an dydhyow ma Purim dhiworth an hanow Pur. Yndella, drefenn oll geryow an lyther ma ha drefenn oll a welsens a-dro dhe'n mater ma, ha'n pyth a dhothya bys dhedha,

²⁷an Yedhewon a jarjyas hag omgemmeres a-barth dhedha i aga honan, hag a-barth aga has, hag oll an re a ve junys orta, i dhe woelya heb fyllel an dhew dhydh ma herwydh an skrif anedha, ha herwydh an eur ordenys ragdha, pub blydhen,

²⁸ha'n dydhyow ma dhe vos goelys dre bub henedh, pub teylu, pub rannvro, ha pub sita; ha na goettho an dydhyow ma a Purim yn mysk an Yedhewon, ha na ve kellys aga hov yn mysk aga has.

²⁹Ena Ester an vyghternes, myrgh Abihayl, ha Mordekay an Yedhow, a skrifas gans awtorita leun owth afydhya an nessa lyther ma a-dro dhe Purim.

³⁰Ev a dhannvonas lytherow dhe oll an Yedhewon, dhe'n seyth rannvro ha hwegh ugens a wlaskor Ahasuerus, gans geryow a gres hag a wiryonedh

³¹rag fastya an dydhyow ma a Purim yn aga thermynyow ordenys, dell y's afydhsa Mordekay an Yedhow, hag Ester an vyghternes, ha dell y's afydhsens ragdha i aga honan ha rag aga has, materow ow tochya aga frysyow penys ha'ga hynvann.

³²Ha gorhemmynn Ester a fastyas an materow ma a Purim; ha skrifys veu y'n lyver.