Read Kernewek Eksodus 10 Bible Online

Eksodus 10 - Kernewek bible

Eksodus 10

¹Ena an ARLOEDH a leveris dhe Moyses, ‘Ke bys yn Faro; rag my re galeshas y golonn ha kolonn y servysi may tiskwetthiv ow arwoedhyow ma yntredha,

²ha may leverri yn klewans dha vab ha mab dha vab fatell wrug vy kammdhyghtya an Ejyptianys ha pana arwoedhyow a wrug vy yntredha; may hwodhvi my dhe vos an ARLOEDH.’

³Ytho Moyses hag Aron eth a-ji dhe Faro, ha leverel dhodho, ‘Yndellma y lever an ARLOEDH, Duw an Ebrowyon, “Pygemmys prys y neghydh omuvelhe a-ragov? Gas ow fobel dhe vones ma'm serfyons.

⁴Rag mar neghydh gasa ow fobel dhe vones, otta, a-vorow y kyrghav lokustes a-berth y'th pow,

⁵hag i a wra kudha enep an tir, ma na wello denvyth an tir; hag i a wra dybri an pyth eus gesys dhis wosa an keser, hag i a wra dybri oll agas gwydh a dyv y'n gwel.

⁶Hag i a wra lenwel dha jiow ha chiow oll dha servysi hag Ejyp oll; dell na welas na dha dasow na dha dasow-wynn, a'n jydh may teudhons war an nor bys y'n jydh hedhyw.” ’ Ena ev a dreylyas ha mos a-dhiworth Faro.

⁷Ha servysi Faro a leveris dhodho, ‘Pygemmys prys y fydh an den ma antell dhyn? Gas an dus dhe vones may serfyons an ARLOEDH aga Duw; a ny gonvedhydh na hwath bos Ejyp distruys?’

⁸Ytho Moyses hag Aron a veu kyrghys dhe Faro arta; hag ev a leveris dhedha, ‘Kewgh, servyewgh an ARLOEDH agas Duw; mes piw a wra mos?’

⁹Ha Moyses a leveris, ‘Ni a wra mos gans agan re yowynk ha'gan re goth; ni a wra mos gans agan mebyon ha'gan myrghes ha gans agan flokkys ha'gan oghen, rag y koedh dhyn synsi goel an ARLOEDH.’

¹⁰Hag ev a leveris dhedha, ‘Re bo an ARLOEDH genowgh, mar kwrav agas gasa hwi ha'gas re vyghan dhe vones. Mirewgh, hwi a'gas beus neb tebel dowl yn agas brys.

¹¹Na! Kewgh, an wer yntredhowgh, ha servya an ARLOEDH, rag bos henna agas hwans.’ Hag i a veu gorrys a-ves a wolok Faro.

¹²Ena an ARLOEDH a leveris dhe Moyses, ‘Ystynn dha dhorn dres pow Ejyp rag an lokustes, may teffons war vro Ejyp, ha dybri pub plans y'n tir, peub a veu gesys gans an keser.’

¹³Ytho Moyses a ystynnas y welenn dres pow Ejyp, ha'n ARLOEDH a dhros gwyns a'n howldrevel war an tir oll an jydh na hag oll an nos na; ha pan o myttin, gwyns an howldrevel a dhros an lokustes.

¹⁴Ha'n lokustes a dheuth dres oll pow Ejyp, ha powes war vro Ejyp oll; hes mar dew, bythkweth kyns ny veu gwelys lokustes a'n par ma, na ny vydh yndellma a-wosa.

¹⁵Rag i a gudhas enep an tir oll, may feu tewlhes an tir, hag i a dhybris oll an plansow y'n tir, hag oll frut an gwydh a veu gesys gans an keser; ha nyns esa glasneth vyth, na gwydhenn na plansow an gwel, dre bow Ejyp oll.

¹⁶Ena Faro a elwis Moyses hag Aron yn fysk, ha leverel, ‘My re beghas erbynn an ARLOEDH agas Duw, hag er agas pynn.

¹⁷Lemmyn ytho, gevewgh dhymm ow fegh, my a'gas pys, an unn prys ma, ha pysi an ARLOEDH agas Duw dhe gemmeres unnweyth an ankow ma ahanav.’

¹⁸Ytho ev eth a-ves a Faro, ha pysi an ARLOEDH.

¹⁹Ha'n ARLOEDH a dreylyas gwyns pur grev a'n howlsedhes, a dhrehevis an lokustes ha'ga herdhya y'n Mor Rudh; ny veu gesys lokust vyth yn pow Ejyp oll.

²⁰Mes an ARLOEDH a galeshas kolonn Faro, ha ny asas fleghes Ysrael dhe vones.

²¹Ena an ARLOEDH a leveris dhe Moyses, ‘Ystynn dha dhorn war-tu ha nev may fo tewlder dres pow Ejyp, tewlder a vo tavadow.’

²²Ytho Moyses a ystynnas y dhorn war-tu ha nev, hag yth esa tewlder tew yn pow Ejyp oll dre dri dydh;

²³ny welsons an eyl y gila, na ny sevis nagonan a'y le dre dri dydh; mes mebyon Ysrael oll a's teva golow y'n tyller mayth esens trigys.

²⁴Ena Faro a elwis Moyses, ha leverel, ‘Kewgh dhe servya an ARLOEDH; marnas gesiwgh agas flokkys ha'gas oghen dhe wortos. Agas fleghes ynwedh a yll mos genowgh.’

²⁵Mes Moyses a leveris, ‘Res yw dhis gorra yn agan diwleuv sakrifisow hag offrynnow leskys may hyllyn offrynna dhe'n ARLOEDH agan Duw.

²⁶Agan gwarthek ynwedh a dal mos genen; ny vydh gesys karn pynag, rag y koedh dhyn aga hemmeres dhe servya an ARLOEDH agan Duw, ha ny wodhon gans pyth y koedh dhyn servya an ARLOEDH erna dhyffyn di.’

²⁷Mes an ARLOEDH a galeshas kolonn Faro, ha ny vynna aga gasa dhe vones.

²⁸Ena Faro a leveris dhodho, ‘Ke ahanav; ha bydh war na welli nevra arta ow fas; rag y'n jydh may hwelli ow fas ty a verow.’

²⁹Moyses a leveris, ‘Dell leverydh! Ny wrav gweles dha fas arta.’