Read Kernewek Eksodus 14 Bible Online

Eksodus 14 - Kernewek bible

Eksodus 14

¹Ena an ARLOEDH a leveris dhe Moyses,

²‘Lavar dhe vebyon Ysrael may treyllyons ha kampya a-rag Pihahiroth, yntra Migdol ha'n mor, a-rag Baal-sefon; hwi a wra kampya a-dal dhodho, ryb an mor.

³Rag Faro a lever a-dro dhe vebyon Ysrael, “Maglennys yns y'n tir; an gwylvos re's degeas.”

⁴Ha my a wra kaleshe kolonn Faro, hag ev a wra aga siwya ha my a gyv glori drefenn Faro ha'y lu oll; ha'n Ejyptianys a woer my dhe vos an ARLOEDH.’ Hag yndella i a wrug.

⁵Pan veu derivys dhe vyghtern Ejyp bos fiys an bobel, brys Faro ha'y servysi a veu treylys a-dro dhe'n bobel, hag yn-medhons, ‘Pyth yw hemma a wrussyn, ow livra mebyon Ysrael a'gan servya?’

⁶Ytho ev a hernessyas y jarett ha kemmeres y lu ganso,

⁷ha kemmeres hwegh kans charett a'n gwella hag oll an charettow erell yn Ejyp, gans penngasor yn pubonan anedha.

⁸Ha'n ARLOEDH a galeshas kolonn Faro myghtern Ejyp hag ev a siwyas mebyon Ysrael dell ethons yn-rag gans leuv ughel.

⁹An Ejyptianys a's siwyas, oll mergh Faro ha'y jarettow ha'y varghogyon ha'y lu, ha tremena dresta ow kampya orth an mor, ryb Pihahiroth a-rag Baal-sefon.

¹⁰Pan nesas Faro, mebyon Ysrael a dhrehevis aga dewlagas, hag otta, yth esa an Ejyptianys ow tos war aga lergh; hag own bras a's teva. Mebyon Ysrael a grias war an ARLOEDH;

¹¹hag i a leveris dhe Moyses, ‘Drefenn nag eus bedhow yn Ejyp yth yw, ty dh'agan gorra dhe verwel y'n gwylvos? Pandr'a wrussys dhyn, orth agan dri yn-mes a Ejyp?

¹²A nyns yw hemma an dra a leversyn dhis yn Ejyp, ow leverel, “Gas ni agan honan, may serfyons an Ejyptianys?” Rag gwell via ragon servya an Ejyptianys es merwel y'n gwylvos.’

¹³Ha Moyses a leveris dhe'n bobel, ‘Na berthewgh own, sevewgh fyrv ha gweles selwyans an ARLOEDH a wra oberi ragowgh hedhyw; rag an Ejyptianys a welowgh hedhyw, ny wrewgh aga gweles nevra arta.

¹⁴An ARLOEDH a wra omladh ragowgh, ha hwi yn tawesek.’

¹⁵An ARLOEDH a leveris dhe Moyses, ‘Prag y kriydh dhymm? Lavar dhe vebyon Ysrael mones yn-rag.

¹⁶Drehav dha welenn, hag ystynn dha dhorn dres an mor ha'y ranna, may hallo mebyon Ysrael mos war dhor sygh yn mysk an mor.

¹⁷Ha my a galesha kolonn an Ejyptianys mayth ellons war aga lergh, ha my a gyv glori drefenn Faro hag oll y lu, y jarettow, ha'y varghogyon.

¹⁸Ha'n Ejyptianys a woer my dhe vos an ARLOEDH, pan gavav gordhyans drefenn Faro, y jarettow, ha'y varghogyon.’

¹⁹Ena el Duw, neb eth a-rag kamp Ysrael, a removas ha mos war aga lergh; an goloven a gommol a veu removyes a-dheragdha ha sevel a-dryv dhedha,

²⁰ow tos yntra kamp Ejyp ha kamp Ysrael. Hag yth esa an gommolenn ena gans an tewlder; ha'n nos a dremenas heb an eyl ow tos nes dh'y gila der oll an nos.

²¹Ena Moyses a ystynnas y dhorn dres an mor; ha'n ARLOEDH a herdhyas an mor war-dhelergh dre wyns krev a'n howldrevel oll an nos, ha gul dhe'n mor bos dor sygh, ha'n dowrow a veu rynnys.

²²Ha mebyon Ysrael eth yn mysk an mor war dhor sygh, an dowrow ow pos fos dhedha a'ga dyghow hag a'ga kledh.

²³An Ejyptianys a siwyas, ha mos war aga lergh yn mysk an mor, mergh Faro oll, y jarettow ha'y varghogyon.

²⁴Hag yn goel an myttin an ARLOEDH y'n goloven a dan ha kommol a viras war-woeles war lu an Ejyptianys, ha gorra lu an Ejyptianys yn deray,

²⁵ow taga rosow aga charettow, may fons poes dhe lewya. Ytho an Ejyptianys a leveris, ‘Fiyn a-dhiworth Ysrael; rag an ARLOEDH a omladh ragdha erbynn an Ejyptianys.’

²⁶Ena an ARLOEDH a leveris dhe Moyses, ‘Ystynn dha dhorn dres an mor may teffo an dowr arta war an Ejyptianys, war aga charettow, ha war aga marghogyon.’

²⁷Ytho Moyses a ystynnas y dhorn dres an mor, ha'n mor a dhehwelis dh'y worlanow usadow pan dheuth myttin. An Ejyptianys a fias dhiworto, ha'n ARLOEDH a dhomhwelas an Ejyptianys yn kres an mor.

²⁸An dowrow a dhehwelis ha kudha an charettow ha'n varghogyon hag oll lu Faro re's siwsa y'n mor; ny veu gesys nagonan anedha.

²⁹Mes mebyon Ysrael a gerdhas war dhor sygh yn mysk an mor, an dowrow ow pos fos dhedha a'ga dyghow hag a'ga kledh.

³⁰Yndella an ARLOEDH a dhelivras Ysrael an jydh na a dhorn an Ejyptianys; hag Ysrael a welas an Ejyptianys marow war lann an mor.

³¹Hag Ysrael a welas an ober meur a wrug an ARLOEDH erbynn an Ejyptianys, ha'n bobel a borthas own a'n ARLOEDH; hag i a grysis y'n ARLOEDH hag yn y was Moyses.