Read Kernewek Eksodus 16 Bible Online

Eksodus 16 - Kernewek bible

Eksodus 16

¹Ena i eth yn-rag a Elim ha'n kuntelles oll a vebyon Ysrael a dheuth dhe wylvos Sin usi ynter Elim ha Sinay, an pymthegves dydh a'n nessa mis wosa i dhe dhiberth a bow Ejyp.

²Ha'n kuntelles oll a vebyon Ysrael a grodhvolas war Moyses hag Aron y'n gwylvos,

³ow leverel dhedha, ‘Unnweyth a marwen orth leuv an ARLOEDH yn pow Ejyp, pan en esedhys ryb an sethow-kig ha pan dhybryn bara dhe walgh! rag hwi re'gas dros yn-mes dhe'n gwylvos ma dhe ladha an gemmynieth oll dre nown.’

⁴Ena an ARLOEDH a leveris dhe Moyses, ‘Otta, my a wra dhe vara koedha a nev ragowgh avel glaw; ha'n bobel a wra mos yn-mes ha kuntell pub dydh an rann rag unn jydh, ma's preffiv mar kerdhons yn ow lagha po na.

⁵Y'n hweghves dydh, pan bareusons an pyth a guntellons, y fydh diwweyth an myns a guntellons pub dydh.’

⁶Ytho Moyses hag Aron a leveris dhe vebyon Ysrael oll, ‘Dhe'n gorthugher hwi a wodhvydh y feu an ARLOEDH neb a'gas dros yn-mes a bow Ejyp,

⁷hag y'n myttin hwi a welvydh golewder an ARLOEDH, rag ev dhe glewes agas krodhvolyow war an ARLOEDH. Rag pyth on ni may krodhvolowgh warnan?’

⁸Ha Moyses a leveris, ‘Pan re an ARLOEDH dhywgh gorthugherweyth kig dhe dhybri ha myttinweyth bara dhe walgh, rag an ARLOEDH dhe glewes an krodhvolyow a grodhvolowgh warnodho — pyth on ni? Nyns yw agas krodhvolyow warnan ni mes war an ARLOEDH.’

⁹Ha Moyses a leveris dhe Aron, ‘Lavar dhe'n kuntelles oll a vebyon Ysrael, “Nesiwgh a-rag an ARLOEDH, rag ev re glewas agas krodhvolyow.” ’

¹⁰Ha dell gewsi Aron dhe'n kuntelles oll a vebyon Ysrael, i a viras war-tu ha'n gwylvos, hag otta, golewder an ARLOEDH a omdhiskwedhas y'n gommolenn.

¹¹Ha'n ARLOEDH a leveris dhe Moyses,

¹²‘My re glewas krodhvolyow mebyon Ysrael; lavar dhedha, “Dhe dewlwolow hwi a wra dybri kig, hag y'n myttin hwi a vydh lenwys gans bara; ena hwi a wodhvydh my dhe vos an ARLOEDH agas Duw.” ’

¹³Gorthugherweyth rynki a dheuth ha kudha an kamp; ha myttinweyth gwiskas gluth a wrowedha a-dro dhe'n kamp.

¹⁴Ha pan veu gyllys gwiskas an gluth yth esa war enep an gwylvos tra danow lownek, mar danow avel loesrew war an dor.

¹⁵Pan y'n gwelas mebyon Ysrael, i a leveris an eyl dh'y gila, ‘Pyth yw?’ rag ny wodhyens an pyth o. Ha Moyses a leveris dhedha, ‘Yth yw an bara re ros an ARLOEDH dhywgh dh'y dhybri.

¹⁶Hemm yw an pyth re worhemmynnis an ARLOEDH: “Kuntellewgh anodho, pub gour ahanowgh, kemmys hag a allo dybri; hwi a gemmer unn omer pub huni, herwydh an niver a dus a'gas beus pub huni yn y dylda.” ’

¹⁷Ha mebyon Ysrael a wrug yndella; i a'n kuntellas, re anedha moy, re anedha le.

¹⁸Mes pan y'n musursons gans omer, ev neb re guntellsa meur ny'n jevo travyth gesys, hag ev neb re guntellsa boghes ny fyllis dhodho; peub a guntellas herwydh an pyth a allas dybri.

¹⁹Ha Moyses a leveris dhedha, ‘Na wres denvyth gasa travyth anodho bys y'n myttin.’

²⁰Mes ny goelsons orth Moyses; re a asas rann anodho bys y'n myttin hag y fagas kontron, ha flerya; ha Moyses o serrys orta.

²¹Pub myttin i a'n kuntella, kemmys hag a ylli dybri; mes pan dho an howl ha bos toemm, y teudhi.

²²Y'n hweghves dydh i a guntellas diwweyth myns an bara, dew omer pub huni; ha pan dheuth hembrenkysi oll an kuntelles ha leverel dhe Moyses,

²³ev a leveris dhedha, ‘Hemm yw an pyth a worhemmynnis an ARLOEDH: “An vorow a vydh dydh a bowes, sabot sans dhe'n ARLOEDH; pebewgh an pyth a bebowgh ha bryjyewgh an pyth a vryjowgh, ha pup-tra yw gesys gorrewgh a-denewen dhe vos gwithys bys y'n myttin.” ’

²⁴Ytho i a'n gorras a-denewen bys vyttin, dell worhemmynnis Moyses; ha ny fleryas ha nyns esa kontron ynno.

²⁵Moyses a leveris, ‘Dybrewgh ev hedhyw, rag hedhyw yw sabot dhe'n ARLOEDH; hedhyw ny'n kevowgh y'n gwel.

²⁶Hwegh dydh hwi a'n kuntell; mes y'n seythves dydh, hag yw sabot, ny vydh travyth.’

²⁷Y'n seythves dydh nebes a'n dus eth dhe guntell ha ny gavsons travyth.

²⁸Ha'n ARLOEDH a leveris dhe Moyses, ‘Pygemmys prys y neghowgh gwitha ow gorhemmynnow hag ow laghys?

²⁹Mirewgh, an ARLOEDH re ros dhywgh sabot, ytho y'n hweghves dydh ev a re dhywgh bara rag dew dhydh; gortes pubonan ahanowgh yn y le, na as denvyth dhe vones yn-mes a'n tyller y'n seythves dydh.’

³⁰Ytho an bobel a bowesas y'n seythves dydh.

³¹Ha chi Ysrael a elwis hanow an dra ma manna; haval o dhe has koriander, gwynn, ha'n sawer anodho avel tesennow gwrys gans mel.

³²Ha Moyses a leveris, ‘Hemm yw an pyth re worhemmynnis an ARLOEDH: “Bedhes gwithys omer anodho der agas henedhow, may hwellens an bara ganso may hwrug vy agas maga y'n gwylvos, pan y's dres yn-mes a bow Ejyp.” ’

³³Ha Moyses a leveris dhe Aron, ‘Kemmer seth ha gorra unn omer a'n manna ynno ha'y settya a-rag an ARLOEDH, dhe vos gwithys der agas henedhow.’

³⁴Par dell worhemmynnis an ARLOEDH dhe Moyses, yndellma Aron a'n settyas a-rag an dustuni, dhe vos gwithys.

³⁵Ha mebyon Ysrael a dhybris an manna dew-ugens blydhen, bys pan dheuthons dhe dir annedhys; i a dhybris an manna bys pan dheuthons dhe or pow Kanan.

³⁶(Unn omer yw an degves rann a efa.)