Read Kernewek Eksodus 17 Bible Online

Eksodus 17 - Kernewek bible

Eksodus 17

¹An kuntelles oll a vebyon Ysrael eth yn-rag a wylvos Sin yn kerdhow berr, herwydh gorhemmynn an ARLOEDH, ha kampya yn Refidim; mes nyns esa dowr dhe'n bobel dh'y eva.

²Ytho an bobel a gablas Moyses, ha leverel, ‘Ro dhyn ni dowr dh'y eva!’ Ha Moyses a leveris dhedha, ‘Prag y hwrewgh strivya genev? Prag y hwrewgh previ an ARLOEDH?’

³Mes an bobel a's tevo syghes ena rag dowr, ha'n bobel a grodhvolas war Moyses, ow leverel, ‘Prag y'gan hembrenksys yn-mes a Ejyp, dh'agan ladha ha'gan fleghes ha'gan gwarthek dre syghes?’

⁴Ytho Moyses a grias war an ARLOEDH, ‘Pandr'a wrav gans an bobel ma? Ogas parys yns dhe'm labydha.’

⁵Ha'n ARLOEDH a leveris dhe Moyses, ‘Tremen a-rag an bobel, ow kemmeres genes nebes a henavogyon Ysrael; ha kemmer y'th dorn an welenn a wesksys an Nil gensi, ha ke.

⁶Otta, my a sev a-ragos ena war an garrek yn Horeb, ha ty a wra gweskel an garrek, ha dowr a wra dos anedhi mayth effo an bobel.’ Ha Moyses a wrug yndella a-wel henavogyon Ysrael.

⁷Hag ev a elwis hanow an tyller Massa ha Meriba, drefenn strif mebyon Ysrael, ha drefenn i dhe brevi an ARLOEDH, ow leverel, ‘Usi an ARLOEDH yn agan mysk po na?’

⁸Ena y teuth Amalek hag omladh erbynn Ysrael yn Refidim.

⁹Ha Moyses a leveris dhe Yoshua, ‘Dewis gwer ragon ha mos yn-mes, omladh erbynn Amalek; a-vorow my a wra sevel war benn an vre gans gwelenn Duw y'm dorn.’

¹⁰Ytho Yoshua a wrug dell leveris Moyses dhodho, hag omladh erbynn Amalek; ha Moyses, Aron ha Hur eth dhe benn an vre.

¹¹Pan dhrehevis Moyses y leuv, Ysrael o kreffa; ha pan iselhas y leuv, Amalek o kreffa.

¹²Mes diwla Moyses eth ha bos skwith; ytho i a gemmeras men ha'y worra yn-danno, hag ev a esedhas warnodho, hag Aron ha Hur a synsis y dhiwdhorn yn-bann, an eyl a'n unn tu ha'y gila dhe'n tu arall, mayth o fyrv y dhiwdhorn bys yn howlsedhes.

¹³Ha Yoshua a fethas Amalek ha'y dus dre vin an kledha.

¹⁴Ha'n ARLOEDH a leveris dhe Moyses, ‘Skrif hemma yn lyver avel kovadh, ha'y dhasleverel yn diwskovarn Yoshua may tileav yn tien kov Amalek a-dhann nev.’

¹⁵Ha Moyses a dhrehevis alter ha'y henwel ‘An ARLOEDH yw ow baner’,

¹⁶ow leverel, ‘Dorn war vaner an ARLOEDH! An ARLOEDH a'n jevydh bresel erbynn Amalek a henedh dhe henedh.’