Read Kernewek Eksodus 19 Bible Online

Eksodus 19 - Kernewek bible

Eksodus 19

¹Dhe'n tressa loer nowydh wosa mebyon Ysrael dhe vones yn-rag a bow Ejyp, y'n jydh na y teuthons yn gwylvos Sinay.

²Ha pan ethons yn-kerdh a Refidim ha dos yn gwylvos Sinay, i a gampyas ena y'n gwylvos; hag Ysrael a gampyas a-rag an menydh.

³Ha Moyses a yskynnas dhe Dhuw, ha'n ARLOEDH a elwis dhodho yn-mes a'n menydh ow leverel, ‘Yndellma ty a lever dhe ji Yakob, ha derivas dhe vebyon Ysrael:

⁴Hwi re welas an pyth a wrug vy dhe'n Ejyptianys, ha fatell y's dug war eskelli eryon ha'gas dri dhymm ow honan.

⁵Lemmyn ytho, mars owgh gostydh dhe'm lev ha gwitha ow hevambos, hwi a vydh ow ferghennogeth arbennik ow honan yn mysk poblow oll; rag oll an nor yw dhymm,

⁶ha hwi a vydh dhymm gwlaskor a oferysi ha kenedhel sans. An re ma yw an geryow hag a wredh kewsel dhe vebyon Ysrael.’

⁷Ytho Moyses a dheuth ha gelwel henavogyon an bobel, ha gorra a-ragdha oll an geryow ma a worhemmynnis an ARLOEDH dhodho.

⁸Hag oll an bobel a worthybis war-barth ow leverel, ‘Oll re gewsis an ARLOEDH ni a'n gwra.’ Ha Moyses a dherivas geryow an bobel dhe'n ARLOEDH.

⁹Ha'n ARLOEDH a leveris dhe Moyses, ‘Otta, y tov dhis yn kommolenn dew may klewvo an bobel pan gowsav genes ha may kryssons dhis bys vykken.’ Ena Moyses a leveris geryow an bobel dhe'n ARLOEDH.

¹⁰Ha'n ARLOEDH a leveris dhe Moyses, ‘Ke dhe'n bobel ha'ga sakra hedhyw hag a-vorow, ha gas dhedha golghi aga dillas,

¹¹ha bydh parys erbynn an tressa dydh; rag y'n tressa dydh an ARLOEDH a wra diyskynna war venydh Sinay a-wel an bobel oll.

¹²Ha ty a wra oryon dhe'n bobel oll a-dro, ow leverel, “Gwaytyewgh na yskynnowgh bys y'n menydh na tochya an or anodho; piwpynag a doch an menydh a vydh gorrys dhe'n mernans;

¹³ny wra dorn vyth y dochya, mes y fydh labydhys po tennys gans sethow; best po den kyn fo, ny wra bewa.” Pan sen an hirgorn hwyth hir, i a wra dos bys y'n menydh.’

¹⁴Ytho Moyses a dhiyskynnas a'n menydh dhe'n bobel ha sakra an bobel; hag i a wolghas aga dillas.

¹⁵Hag ev a leveris dhe'n bobel, ‘Bedhewgh parys erbynn an tressa dydh; na nesiwgh dhe venyn.’

¹⁶Dhe vyttin an tressa dydh yth esa taran ha lughes, ha kommolenn dew war an menydh, ha son pur ughel an hirgorn may krenas oll an bobel esa y'n kamp.

¹⁷Ena Moyses a dhros an bobel yn-mes a'n kamp dhe dhyerbynna Duw; hag i a sevis orth troes an menydh.

¹⁸Ha menydh Sinay a veu maylys yn mog, drefenn an ARLOEDH dhe dhiyskynna warnodho yn tan; ha'n mog anodho a yskynnas avel mog an fornes, ha'n menydh oll a grenas yn feur.

¹⁹Ha dell besya son an hirgorn ughella hag ughella, Moyses a gewsis, ha Duw a worthybis dhodho yn lev.

²⁰Ha'n ARLOEDH a dhiyskynnas war venydh Sinay, dhe benn an menydh; ha'n ARLOEDH a elwis Moyses dhe benn an menydh ha Moyses a yskynnas.

²¹Ha'n ARLOEDH a leveris dhe Moyses, ‘Diyskynn ha gwarnya an bobel ma na steffyons yn-bann dhe'n ARLOEDH dhe vires, ha lies anedha merwel.

²²Hag ynwedh gas dhe'n oferysi a dheu nes dhe'n ARLOEDH omsakra ma na dartho an ARLOEDH warnedha.’

²³Ha Moyses a leveris dhe'n ARLOEDH, ‘Ny yll an bobel yskynna menydh Sinay drefenn ty dha honan dh'agan difenn, ow leverel, “Gorr oryon a-dro dhe'n menydh ha'y sakra.” ’

²⁴Ha'n ARLOEDH a leveris dhodho, ‘Diyskynn, hag yskynn ow tri genes Aron; mes na as an oferysi ha'n bobel dhe stevya yn-bann dhe'n ARLOEDH ma na dartho er aga fynn.’

²⁵Ytho Moyses a dhiyskynnas dhe'n bobel, ha kewsel dhedha.