Read Kernewek Eksodus 2 Bible Online

Eksodus 2 - Kernewek bible

Eksodus 2

¹Hag yth eth gour a'n chi a Levi ha kemmeres myrgh a Levi,

²ha'n venyn a omdhuk ha dineythi mab ha hi a welas y vos teg, ha'y gudha tri mis;

³mes pan na ylli hi y gudha na fella, hi a gemmeras kanstell gwrys a bapyrus, orth hy gogudha gans bitumen ha pyg, ha'y gorra y'n geunegenn war lann an Nil;

⁴ha'y hwoer a wortas a neb pellder dhe wodhvos pandr'a hwarvedha dhodho.

⁵Ha myrgh Faro a dheuth dhe omwolghi y'n Nil, ha'y maghtethyon ow kerdhes war lann an Nil, ha hi a welas an ganstell yn mysk an geunegenn ha dannvon hy maghteth, neb a's kemmeras.

⁶Hi a's igoras ha gweles an flogh, hag otta, maw owth oela! Ha hi a gemmeras truedh anodho ha leverel, ‘Ottomma onan a'n fleghes ebrow.’

⁷Ha'y hwoer a leveris dhe vyrgh Faro, ‘A wrav vy mos dhe gyrghes mammeth a'n Ebrowyon a wra maga an meppik ragos?’

⁸Ha myrgh Faro a leveris dhedhi, ‘Ke.’ Ytho an vowes eth dhe gelwel mamm an maw,

⁹ha myrgh Faro a leveris dhedhi, ‘Kemmer an maw ha'y vronna ragov, ha my a re dhis dha arveth’, ha'n venyn a gemmeras an maw ha ri bronn dhodho.

¹⁰Ha'n maw a devis, ha hi a'n dros dhe vyrgh Faro, hag ev o avel mab dhedhi ha hi a'n henwis Moyses, ow leverel, ‘Drefenn my dh'y denna mes a'n dowr.’

¹¹Ha dell hwarva, y'n dydhyow na, Moyses o tevys hag yth eth dh'y vreder ha mires war aga beghyow, ha gweles gour ejyptek ow kweskel gour ebrow, onan a'y vreder.

¹²Ev a dreylyas omma hag ena ha gweles nag esa denvyth, ha ladha an Ejyptyan ha'y gudha y'n tewes.

¹³Hag yth eth ternos, hag otta, dew Ebrow owth omladh. Hag y leveris dhe'n drogoberer, ‘Prag y hweskydh dha gentrevek?’

¹⁴Hag yn-medh ev, ‘Piw a'th wrug penntern ha breusyas warnan? A wredh ow ladha par dell ledhsys an Ejyptyan?’ Hag own a'n jevo Moyses ow leverel, ‘Yn sur, an dra yw aswonnys.’

¹⁵Ha Faro a glewas a'n dra, ha hwilas ladha Moyses. Mes Moyses a fias dhe'n fo a-dhiworth Faro, hag a drigas yn pow Midyan; hag ev a esedhas ryb puth.

¹⁶Lemmyn oferyas Midyan a'n jevo seyth myrgh a dheuth ha tenna, ha lenwel an newyow, dhe dhowrhe flokk aga thas.

¹⁷Mes bugeledh a dheuth ha'ga fesya; ytho Moyses a sevis dh'aga sawya, ha dowrhe aga flokk.

¹⁸Hag y teuthons dhe Reuel aga thas, hag yn-medh ev, ‘Prag y fistensowgh dehweles hedhyw?’

¹⁹Yn-medhons, ‘Gour ejyptek re'gan livras a dhorn an vugeledh, hag ynwedh tenna dowr a'n puth ragon ha dowrhe an deves.’

²⁰Yn-medh ev dh'y vyrghes, ‘Ha ple'ma ev? Prag y hessowgh an gour? Gwrewgh y elwel may teppro bara.’

²¹Ha Moyses a assentyas triga gans an gour, neb a ros Sippora y vyrgh dhe Moyses,

²²ha hi a dhineythis mab ha gelwel y hanow Gershom, rag y leveris, ‘Alyon re beuv yn bro estren.’

²³Ha dell hwarva y'n termyn hir na, myghtern Ejyp a verwis, ha mebyon Ysrael a gynis drefenn an gethneth ha kria, ha'ga kri a yskynnas dhe Dhuw, drefenn aga hethneth;

²⁴ha Duw a glewas aga hynvann ha Duw a borthas kov a'y gevambos gans Abraham, gans Ysak, ha gans Yakob.

²⁵Ha Duw a welas mebyon Ysrael, ha Duw a's aswonnis.