Read Kernewek Eksodus 23 Bible Online

Eksodus 23 - Kernewek bible

Eksodus 23

¹Ny wredh leverel fals dherivas. Na worr dha leuv gans tebelwas, dhe vos kammdhustunier.

²Ny wredh holya lu dhe wul drokoleth; na ny wredh dustuni yn ken, ow treylya a-denewen war-lergh lu, rag kammdreylya gwirvreus;

³na ny faverydh den boghosek yn y gen.

⁴Mar teudh erbynn ojyon dha eskar po y asen ow mos yn stray, ty a wra y dhaskorr dhodho.

⁵Mar kwelydh asen nebonan a'th kas ow krowedha yn-dann y vegh, na wredh y asa ganso; ty a wra y weres dh'y dhrehevel.

⁶Ny wredh kammdreylya gwirvreus rag dha dhen boghosek yn y gen.

⁷Omwith pell a fals jarj, ha na wra ladha an ewnhynsek na'n gwiryon; rag ny akwityav den kablus.

⁸Ha ny wredh kemmeres falswober, rag falswober a dhall an re a wel, hag a gammdreyl geryow an re wiryon.

⁹Ynwedh, ny wredh arwaska alyon; hwi a aswonn kolonn alyon, rag hwi o alyons yn pow Ejyp.

¹⁰Hwegh blydhen ty a wra hasa y'th tir ha kuntell y askorr;

¹¹mes y'n seythves blydhen ty a as dhodho powes ha bos anerys, may teppro boghosogyon dha bobel; ha'n pyth a asons, an bestes gwyls a yll dybri. Ty a wra yndellma ynwedh gans dha winlann ha gans dha olivennek.

¹²Hwegh dydh ty a wra dha ober, mes y'n seythves dydh ty a wra powes; may fo powes dhe'th ojyon ha dhe'th asen, ha may fo diskwithys mab dha gethes, ha'n alyon.

¹³Koelewgh orth an pyth oll re leveris dhywgh; ha na elwewgh war henwyn duwow erell, na na esiwgh i dhe vos klewys a'gas ganow.

¹⁴Teyrgweyth y'n vlydhen ty a wra gwitha goel dhymm.

¹⁵Ty a wra goelya goel an bara heb goell; dell worhemmynnis dhis, ty a wra dybri bara heb goell seyth dydh dhe'n prys ordenys y'n mis Abib, rag ynno y teuthewgh yn-mes a Ejyp. Ny wra nagonan sevel a-ragov gwag y dhorn.

¹⁶Ty a wra gwitha goel an drevas, a gynsa frut a'th wonis, a'n pyth a hesydh y'n gwel. Ty a wra gwitha goel an kuntell yn diwedh an vlydhen, pan guntellowgh frut dha lavur a'n gwel.

¹⁷Teyrgweyth y'n vlydhen oll dha re worow a wra omdhiskwedhes a-rag an Arloedh DUW.

¹⁸Ny wrewgh offrynna goes ow sakrifis gans bara goell, na gasa blonek ow goel dhe wortos bys y'n myttin.

¹⁹An kynsa a gynsa frut dha dhor ty a wra dri a-ji dhe ji an ARLOEDH. Ny wredh bryjyon mynn yn leth y vamm.

²⁰Otta, y tannvonav el a-ragos, dhe'th witha war an hyns ha'th tri dhe'n tyller re bareusis.

²¹Koelewgh orto ha goslowes orth y lev, na rebellewgh er y bynn, rag ny wra gava agas treuspass, drefenn bos ow hanow ynno.

²²Mes mar koslowydh yn ta orth y lev ha gul pup-tra a lavarav, ena my a vydh eskar dhe'th eskerens hag erbynner dhe'th erbynnoryon.

²³Rag ow el a a-ragos ha'th tri dhe'n Amorysi, ha'n Hittysi, ha'n Perizzysi, ha'n Kananysi, an Hivysi, ha'n Yebusysi, ha my a's distru.

²⁴Ny omblegydh a-rag aga duwow, na'ga servya, na gul herwydh aga oberow, mes ty a wra aga distrui yn tien ha terri aga feulveyn dhe demmyn.

²⁵Ha hwi a wra servya an ARLOEDH agas Duw, ha my a wra benniga dha vara ha'th towr; ha my a wra kemmeres kleves dhe-ves a-dhiworthis.

²⁶Ny wra travyth kammomdhoen na ny vydh gownagh y'th tir; niver dha dhydhyow my a gollenow.

²⁷My a wra dannvon ow euth a-ragos, ha gorra yn deray oll an dus may tewgh er aga fynn, ha my a wra dhe'th eskerens oll treylya keyn er dha bynn.

²⁸Ha my a wra dannvon hwyrnoresow a-ragos, a wra chasya dhe-ves an Hivysi, an Kananysi ha'n Hittysi a-dheragos.

²⁹Ny wrav aga fesya dhe-ves a-dheragos yn unn vlydhen ma na dheffo ha bos an tir ynyal ha'n bestes gwyls ow palshe er dha bynn.

³⁰Tamm ha tamm my a wra aga fesya dhe-ves a-dheragos erna vowgh ynkressys hag ow perghenna an tir.

³¹Ha my a wra settya dha oryon a'n Mor Rudh dhe vor an Filistysi, hag a'n gwylvos dhe'n Ewfrates; rag my a re annedhysi an tir yn agas dorn, ha ty a wra aga fesya a-ragos.

³²Ny wredh kevambos gansa na gans aga duwow.

³³Ny wrons triga y'th tir, ma na wrellons dhis pegha er ow fynn; rag mar servydh aga duwow, y fydh antell ragos sur.